இந்தியா-சீனா எல்லை பிரச்னைக்கு பேச்சுவார்த்தை மூலம் தீர்வு! ராணுவ, தூதரக அளவில் முக்கிய முடிவு

இந்தியா-சீனா இடையிலான எல்லை பிரச்னைகள் மற்றும் நிலுவையில் உள்ள பிற விவகாரங்களுக்கு ராணுவம் மற்றும் தூதரக அளவிலான பேச்சுவார்த்தைகள் மூலம் தீர்வு காண இரு நாடுகளும் ஒப்புக்கொண்டுள்ளதாக இந்திய வெளியுறவு அமைச்சகம் தெரிவித்துள்ளது. இதன் மூலம் கிழக்கு லடாக் எல்லையில் நீடித்து வரும் பதற்றத்தை குறைக்கும் முயற்சிகளில் புதிய முன்னேற்றம் ஏற்பட்டுள்ளதாக பார்க்கப்படுகிறது.

இந்தியா-சீனா உறவில் 2020-ம் ஆண்டு கிழக்கு லடாக்கின் கல்வான் பள்ளத்தாக்கு பகுதியில் ஏற்பட்ட மோதல் மிகப்பெரிய பின்னடைவை ஏற்படுத்தியது. இரு நாட்டு வீரர்கள் இடையே ஏற்பட்ட அந்த மோதலுக்குப் பிறகு, எல்லைப் பகுதியில் இரு தரப்பினரும் அதிக அளவில் படைகளை குவித்தனர். இதனால் இரு நாடுகளுக்கு இடையிலான உறவிலும் பதற்றம் அதிகரித்தது.

இதையடுத்து எல்லையில் அமைதி மற்றும் ஸ்திரத்தன்மையை மீண்டும் ஏற்படுத்த பல்வேறு கட்ட பேச்சுவார்த்தைகள் நடத்தப்பட்டு வருகின்றன. சிறப்பு பிரதிநிதிகள் மட்டத்திலும், ராணுவ தளபதிகள் மட்டத்திலும், இந்தியா-சீனா எல்லை விவகாரங்களுக்கான ஆலோசனை மற்றும் ஒருங்கிணைப்பு அமைப்பு மூலமாகவும் தொடர்ந்து பேச்சு நடைபெற்று வருகிறது.

இதையும் படிங்க: இமாச்சலில் பயங்கரம்! மலைப்பாதையில் கட்டுப்பாட்டை இழந்த பேருந்து! 7 பேர் பலி, 11 பேர் காயம்! பிரதமர் மோடி இரங்கல்!

இந்த நிலையில், டெல்லியில் நேற்று எல்லை விவகாரங்களுக்கான ஆலோசனை மற்றும் ஒருங்கிணைப்பு அமைப்பின் கூட்டம் நடைபெற்றது. இதில் எல்லை வரையறை, எல்லை நிர்வாகம், எல்லை தாண்டிய ஒத்துழைப்பு உள்ளிட்ட பல்வேறு விவகாரங்கள் குறித்து இரு தரப்பினரும் ஆலோசனை நடத்தினர்.

கூட்டத்தில், எல்லைக் கட்டுப்பாட்டு கோடு எனப்படும் எல்.ஏ.சி. பகுதியில் தற்போதைய நிலவரம் குறித்தும் இரு தரப்பினரும் ஆய்வு செய்தனர். எல்லைப் பகுதிகளில் அமைதி மற்றும் ஸ்திரத்தன்மையை தொடர்ந்து பராமரிப்பது, இந்தியா-சீனா இடையிலான இருதரப்பு உறவை மேம்படுத்துவதற்கு மிகவும் அவசியம் என வலியுறுத்தப்பட்டது.

மேலும், நிலுவையில் உள்ள அனைத்து பிரச்னைகளுக்கும் ஏற்கனவே செயல்பாட்டில் உள்ள தூதரக மற்றும் ராணுவ பேச்சுவார்த்தை நடைமுறைகள் மூலம் தீர்வு காண இரு நாடுகளும் ஒப்புக்கொண்டன. குறிப்பாக, சம்பந்தப்பட்ட பகுதிகளின் ராணுவ தளபதிகள் மட்டத்திலான நேரடி சந்திப்புகளை தொடர்ந்து நடத்துவது குறித்து முடிவு செய்யப்பட்டதாக வெளியுறவு அமைச்சகம் தெரிவித்துள்ளது.

இதன் மூலம் எல்லைப் பகுதியில் தேவையற்ற பதற்றம் ஏற்படுவதை தவிர்க்கவும், தவறான புரிதல்கள் காரணமாக புதிய பிரச்னைகள் உருவாகாமல் தடுக்கவும் வாய்ப்பு ஏற்பட்டுள்ளது. எனினும், எல்லை தொடர்பான அடிப்படை பிரச்னைகளுக்கு முழுமையான தீர்வு காண்பது இன்னும் சவாலான ஒன்றாகவே உள்ளது.

இந்தியா-சீனா உறவில் எல்லை விவகாரம் முக்கிய பிரச்னையாக நீடிக்கும் நிலையில், இரு நாடுகளும் பேச்சுவார்த்தை பாதையை தொடர்ந்து தேர்வு செய்திருப்பது அடுத்தகட்ட உறவுகளில் முக்கியத்துவம் பெறுகிறது.

இதையும் படிங்க: Google Pay, PhonePe பயன்படுத்துவோருக்கு ஷாக்? UPI-க்கு இனி கட்டணம்? பேமெண்ட்ஸ் கவுன்சில் முக்கிய விளக்கம்!