பீகாரில் நீட் மறுதேர்வு: வெளிச்சத்திற்கு வந்த ஆள்மாறாட்ட முறைகேடு..!! 30 பேர் அதிரடி கைது..!!

பீகார் மாநிலத்தில் நடைபெற்ற நீட் மருத்துவ நுழைவுத் தேர்வு மறுதேர்வின்போது பெரும் ஆள்மாறாட்ட மோசடி வெளிச்சத்துக்கு வந்துள்ளது. இந்த சம்பவம் மருத்துவப் படிப்பு கனவில் இருக்கும் லட்சக்கணக்கான மாணவர்களுக்கு பெரும் அதிர்ச்சியையும், ஏமாற்றத்தையும் ஏற்படுத்தியுள்ளது. மொத்தம் 30 பேர் இதுவரை கைது செய்யப்பட்டுள்ளனர்.

நடப்பாண்டு எம்பிபிஎஸ், பிடிஎஸ் உள்ளிட்ட மருத்துவப் படிப்புகளுக்கான நீட் தேர்வு மே 3 அன்று நாடு முழுவதும் நடைபெற்றது. சுமார் 22 லட்சம் மாணவ-மாணவிகள் தங்களது எதிர்காலத்தைத் தீர்மானிக்கும் இந்த முக்கியத் தேர்வில் தீவிரமாகப் பங்கேற்றனர். இருப்பினும், தேர்வுக்குப் பின் வினாத்தாள் கசிவு புகார்கள் பலத்து எழுந்தன. குறிப்பாக வட மாநிலங்களில் இந்த முறைகேடுகள் உறுதி செய்யப்பட்டதால், மத்திய அரசு ஜூன் 12 அன்று முழு தேர்வையும் ரத்து செய்தது. இதைத் தொடர்ந்து, தேசிய தேர்வு முகமை (என்டிஏ) நேற்று மறுதேர்வை நடத்தியது.

இந்த மறுதேர்வின்போது பீகாரின் லகிசராய் மாவட்டத்தில் அதிர்ச்சியூட்டும் சம்பவங்கள் அரங்கேறின. பல்வேறு தேர்வு மையங்களில் உண்மையான தேர்வர்களுக்குப் பதிலாக வேறு நபர்கள் தேர்வு எழுத முயற்சி செய்தனர். இதில் 9 பேர் நேரடியாக ஆள்மாறாட்டத்தில் ஈடுபட்டதாகக் கண்டுபிடிக்கப்பட்டு உடனடியாகக் கைது செய்யப்பட்டனர். இவர்களில் 7 பேர் கேந்திரிய வித்யாலயா பள்ளி தேர்வு மையத்திலும், ஒருவர் கே.ஆர்.கே. மேல்நிலைப் பள்ளியிலும், மற்றொருவர் ஹசன்பூர் பள்ளி மையத்திலும் பிடிபட்டனர். இந்த 9 பேரும் வெவ்வேறு மாவட்டங்களைச் சேர்ந்தவர்கள் என்பது குறிப்பிடத்தக்கது.

இதையும் படிங்க: துடிதுடித்து உயிர் போன 3 வயது பிஞ்சு..! பெற்றோரிடம் உடல் ஒப்படைப்பு..! கதறும் உறவுகள்..!!

இந்த மோசடி நெட்வொர்க்குடன் தொடர்புடையதாக சந்தேகிக்கப்படும் மேலும் 21 பேரும் கைது செய்யப்பட்டுள்ளனர். அவர்களிடம் தீவிர விசாரணை மேற்கொள்ளப்பட்டு வருகிறது. இந்த வழக்கை முழுமையாக விசாரிக்க ஒரு சிறப்பு போலீஸ் படை அமைக்கப்பட்டுள்ளது. பல்வேறு இடங்களில் சோதனைகள் தீவிரப்படுத்தப்பட்டுள்ளன. மேலும் பலர் இந்த மோசடியில் ஈடுபட்டிருக்கலாம் என அதிகாரிகள் சந்தேகம் வெளியிட்டுள்ளனர். விசாரணை முடிவுகளின் அடிப்படையில் கூடுதல் நடவடிக்கைகள் எடுக்கப்படும் என்று தெரிவிக்கப்பட்டுள்ளது.

இத்தகைய மோசடிகளைத் தடுக்க மத்திய மற்றும் மாநில அரசுகள் உடனடியாக கடுமையான நடவடிக்கைகளை எடுக்க வேண்டும். தேர்வு மையங்களில் மேம்பட்ட கண்காணிப்பு அமைப்புகள், உயர் தொழில்நுட்ப பாதுகாப்பு, பயோமெட்ரிக் அடையாள சரிபார்ப்பு, சிசிடிவி கேமராக்கள், மற்றும் கடுமையான தண்டனை விதிகள் ஆகியவற்றை அமல்படுத்த வேண்டும் என்ற கோரிக்கை வலுத்து வருகிறது.  

இதையும் படிங்க: நாடு முழுவதும் தொடங்கிய நீட் மறுதேர்வு: கூடுதல் 15 நிமிட நேரத்துடன் தேர்வு எழுதும் 22 லட்சம் மாணவர்கள் !