பீகாரில் புதிய அமைச்சரவை பதவியேற்பு! அமைச்சரானார் நிதிஷ்குமாரின் மகன் நிஷாந்த் குமார்!

பீகார் மாநில அரசியலில் ஒரு முக்கிய மைல்கல்லாக, முன்னாள் முதலமைச்சர் நிதிஷ் குமாரின் மகன் நிஷாந்த் குமார் இன்று அமைச்சராகப் பதவியேற்றுக் கொண்டார். பாட்னாவில் உள்ள காந்தி மைதானத்தில் நடைபெற்ற பிரம்மாண்ட விழாவில், பாஜக-வைச் சேர்ந்த முதலமைச்சர் சாம்ராட் சவுத்ரி தலைமையிலான அமைச்சரவை விரிவாக்கம் செய்யப்பட்டது.

பீகாரில் கடந்த மாதம் நிதிஷ் குமார் தனது முதலமைச்சர் பதவியைத் துறந்து மாநிலங்களவைக்குச் சென்றதைத் தொடர்ந்து, பாஜக-வின் சாம்ராட் சவுத்ரி முதலமைச்சராகப் பொறுப்பேற்றார். இந்நிலையில், இன்று நடைபெற்ற அமைச்சரவை விரிவாக்கத்தில் நிஷாந்த் குமார் உட்பட மொத்தம் 32 அமைச்சர்கள் இன்று பொறுப்பேற்றுக் கொண்டனர்.

பாஜக-வில் இருந்து 15 பேர், ஐக்கிய ஜனதா தளத்தில் (JD-U) இருந்து நிஷாந்த் குமார் உட்பட 13 பேர், லோக் ஜனசக்தி (ராம்விலாஸ்) கட்சியில் இருந்து 2 பேர், ஹெச்.ஏ.எம் (HAM) மற்றும் ஆர்.எல்.எம் (RLM) கட்சிகளில் இருந்து தலா ஒருவர் அமைச்சர்களாகப் பதவியேற்றனர். இந்த விழாவில் பிரதமர் நரேந்திர மோடி, மத்திய அமைச்சர்கள் அமித் ஷா, ராஜ்நாத் சிங், ஜே.பி. நட்டா மற்றும் நிதிஷ் குமார் உள்ளிட்ட பல முக்கியத் தலைவர்கள் பங்கேற்றனர்.

இதையும் படிங்க: பீகாரில் 21 ஆண்டுகால நிதிஷ் குமார் ஆட்சி முடிவு! பாஜகவின் சாம்ராட் சௌத்ரி புதிய முதலமைச்சர் நாளை பதவி ஏற்பு!

நிதிஷ் குமாரின் ஒரே மகனான நிஷாந்த் குமார், ஆரம்பத்தில் அரசியலில் ஈடுபடத் தயக்கம் காட்டி வந்தார். ஐக்கிய ஜனதா தளத்தின் மூத்த தலைவர்களான லல்லன் சிங் மற்றும் சஞ்சய் ஜா ஆகியோரின் தொடர் வலியுறுத்தலாலேயே அவர் அமைச்சராகப் பொறுப்பேற்கச் சம்மதித்ததாகக் கூறப்படுகிறது. முன்னதாக அவருக்குத் துணை முதலமைச்சர் பதவி வழங்க முன்வந்ததாகவும், ஆனால் அதை அவர் மறுத்துவிட்டு தற்போது அமைச்சராகப் பொறுப்பேற்றுள்ளதாகவும் தகவல்கள் தெரிவிக்கின்றன.

பீகாரில் 21 ஆண்டுகள் முதலமைச்சராக இருந்த நிதிஷ் குமாரின் வாரிசாக நிஷாந்த் குமார் தற்போது அமைச்சரவையில் நுழைந்துள்ளது, அம்மாநில அரசியலில் ஒரு புதிய தலைமுறை மாற்றத்தின் தொடக்கமாகப் பார்க்கப்படுகிறது.

இதையும் படிங்க: லாலு வழக்கை ரத்து செய்ய முடியாது! வேலைக்கு நிலம் விவகாரத்தில் உச்ச நீதிமன்றம் அதிரடி தீர்ப்பு!