“சுவாமியே சரணம் ஐயப்பா!” மகர விளக்கு பூஜைக்காக சபரிமலை நடை இன்று திறப்பு!

புகழ்பெற்ற சபரிமலை ஐயப்பன் கோவிலில் மகர விளக்கு திருவிழாவிற்காக இன்று மாலை நடை திறக்கப்பட உள்ளது. மண்டல பூஜை நிறைவடைந்து மூன்று நாட்கள் இடைவேளைக்குப் பிறகு, ஐயப்பனின் பொன்னம்பல மேடு ஜோதி தரிசனத்தைக் காணப் பக்தர்கள் இன்று முதல் சபரிமலைக்கு வருகை தரத் தொடங்கியுள்ளனர்.

ஜனவரி 14-ஆம் தேதி நடைபெறவுள்ள சிகர நிகழ்வான மகர ஜோதி தரிசனத்தைக் கருத்தில் கொண்டு, பாதுகாப்பு ஏற்பாடுகள் பலப்படுத்தப்பட்டுள்ளன. நாளொன்றுக்கு 80,000-க்கும் அதிகமான பக்தர்கள் தரிசனம் செய்ய அனுமதிக்கப்படுவார்கள் என்பதால், நிலக்கல் மற்றும் பம்பையில் விரிவான வசதிகளைத் திருவிதாங்கூர் தேவஸ்தானம் செய்துள்ளது.

சபரிமலை ஐயப்பன் கோவிலில் கடந்த டிசம்பர் 26-ஆம் தேதி மண்டல பூஜை மிகச் சிறப்பாக நடைபெற்று நடை அடைக்கப்பட்டது. இதனைத் தொடர்ந்து, மகர விளக்கு பூஜையை முன்னிட்டு இன்று மாலை 5 மணியளவில் தந்திரிகள் முன்னிலையில் மேல்சாந்தி நடை திறக்க உள்ளார். இன்று நடை திறக்கப்பட்டாலும், பூஜைகள் ஏதும் நடைபெறாது; நாளை அதிகாலை முதலே பக்தர்கள் நெய்யபிஷேகம் மற்றும் வழக்கமான பூஜைகளில் பங்கேற்க அனுமதிக்கப்படுவார்கள்.

இதையும் படிங்க: “பூலோக வைகுண்டமானது திருமலை!” - ஏழுமலையான் கோவிலில் சொர்க்கவாசல் திறப்பு!

இந்த ஆண்டின் மகர விளக்கு காலத்தின் முக்கிய நிகழ்வான ‘பேட்டைத் துள்ளல்’ ஜனவரி 11-ஆம் தேதியும், பந்தளம் அரண்மனையிலிருந்து ஐயப்பனின் திருவாபரண ஊர்வலம் ஜனவரி 12-ஆம் தேதியும் புறப்பட உள்ளது. விழாவின் உச்சக்கட்ட நிகழ்வான மகர ஜோதி தரிசனம் மற்றும் மகர விளக்கு பூஜை ஜனவரி 14-ஆம் தேதி மாலையில் நடைபெற உள்ளது. இதனைத் தரிசிக்க லட்சக்கணக்கான பக்தர்கள் சபரிமலையில் குவிவார்கள் என்பதால், சுமார் 5,000 போலீசார் பாதுகாப்புப் பணியில் ஈடுபடுத்தப்பட்டுள்ளனர்.

பக்தர்களின் வசதிக்காக ஆன்லைன் மூலம் முன்பதிவு செய்யும் முறை கட்டாயமாக்கப்பட்டுள்ளது. மேலும், சபரிமலை செல்லும் முக்கியப் பாதைகளில் உள்ள மருத்துவ முகாம்கள் மற்றும் குடிநீர் வசதிகள் மேம்படுத்தப்பட்டுள்ளன. மகர விளக்கு பூஜை முடிந்து, ஜனவரி 20-ஆம் தேதி காலை பந்தளம் ராஜ குடும்பத்தினரின் தரிசனத்திற்குப் பிறகு நடை மீண்டும் அடைக்கப்படும். ஐயப்பனின் சரண கோஷம் விண்ணதிர இன்று மாலை நடை திறக்கப்படுவதால், கேரளா மற்றும் தமிழகத்தின் எல்லைப் பகுதிகளில் ஐயப்ப பக்தர்களின் கூட்டம் அலைமோதி வருகிறது.

இதையும் படிங்க: BREAKING "புடின் இல்லம் மீது ட்ரோன் தாக்குதல்?" – ரஷ்யாவின் குற்றச்சாட்டால் மீண்டும் உச்சகட்டப் பதற்றம்!