SBI வாடிக்கையாளர்களுக்கு அதிர்ச்சி! 4 முறைக்கு மேல் பணம் எடுத்தால் கட்டணம்!

பாரத ஸ்டேட் வங்கி தனது கிளைகள் மூலம் தொடங்கப்பட்ட அடிப்படை சேமிப்பு வங்கி வைப்பு நிதி கணக்குகளுக்கு பணம் எடுக்கும் சேவைக் கட்டணங்களை மாற்றி அமைத்துள்ளதாக அதிகாரப்பூர்வமாக அறிவித்துள்ளது. இந்தப் புதிய நடைமுறையானது வரும் அக்டோபர் 1-ஆம் தேதி முதல் நாடு முழுவதும் அமலுக்கு வரவுள்ளது.

புதிய அறிவிப்பின்படி, BSBD கணக்கு வைத்திருக்கும் வாடிக்கையாளர்கள் ஒரு மாதத்திற்கு 4 முறை வழக்கம்போல எவ்வித கட்டணமும் இன்றி இலவசமாகப் பணம் எடுத்துக்கொள்ளலாம். எனினும், ஒரு மாதத்தில் அனுமதிக்கப்பட்ட 4 முறைகளைத் தாண்டி 5-வது முறையாகப் பணம் எடுக்கும் போது, ஒவ்வொரு கூடுதல் பரிவர்த்தனைக்கும் ரூ.15 உடன் ஜிஎஸ்டி கட்டணம் சேர்த்து பிடித்தம் செய்யப்படும்.  

வங்கிக் கிளைகள், எஸ்பிஐ மற்றும் பிற வங்கிகளின் ஏடிஎம் மையங்கள் மற்றும் கிளை வழிப் பரிவர்த்தனைகள் வாயிலாக மேற்கொள்ளப்படும் பணம் எடுக்கும் சேவைகளுக்கு இந்த வரம்பு பொருந்தும். அதே சமயம், சாதாரண சேமிப்புக் கணக்குகள் அல்லாமல், குறைந்தபட்ச இருப்புத் தொகை பராமரிக்கத் தேவையில்லாத எளிய மக்களுக்கான அடிப்படை சேமிப்புக் கணக்குகளுக்கு மட்டுமே இக்கட்டண விதிமுறை மாற்றப்பட்டுள்ளது என்பது குறிப்பிடத்தக்கது.  

இதையும் படிங்க: பள்ளிகளில் புகையிலை பொருள் தடுப்பு! தமிழக அரசுக்கு ஐகோர்ட் மதுரை கிளை முக்கிய உத்தரவு!

மேலும், நெட் பேங்கிங், மொபைல் பேங்கிங், யுபிஐ உள்ளிட்ட அனைத்து வகையான டிஜிட்டல் பரிவர்த்தனைகளும் எவ்வித கட்டுப்பாடுகளோ அல்லது கூடுதல் கட்டணங்களோ இன்றி எப்போதும் போல முற்றிலும் இலவசமாகவே தொடரும் என எஸ்பிஐ வங்கி நிர்வாகம் தெளிவுபடுத்தியுள்ளது. வாடிக்கையாளர்கள் தங்களது மாதாந்திர பணப் பரிவர்த்தனைகளைத் திட்டமிட்டு மேற்கொள்வதன் மூலம் கூடுதல் கட்டணங்களைத் தவிர்க்கலாம் என அறிவுறுத்தப்பட்டுள்ளது.  

இதையும் படிங்க: ஆட்சியை இழந்த பொறாமையில் திமுக பிதற்றுகிறது! மேகதாது விவகாரத்தில் தவெக பதிலடி!