அதிகாலையே அதிபயங்கரம்… நின்றிருந்த கன்டெய்னர் மீது படுவேகமாக மோதிய சொகுசு பேருந்து… 6 பேர் பலி; 12 பேர் படுகாயம்…!

இன்று அதிகாலை, தெலங்கானாவின் சூர்யபேட் மாவட்டத்தில் உள்ள ஐதராபாத்-விஜயவாடா தேசிய நெடுஞ்சாலையில் ஒரு தனியார் சொகுசு பேருந்து, கன்டெய்னர் லாரி மீது மோதியதில், 3 பெண்கள் உட்பட  ஆறு பேர் உயிரிழந்தனர் மற்றும் சுமார் 12 பேர் காயமடைந்தனர்.

அதிகாலை சுமார் 4:30 மணியளவில், ஐதராபாத்தில் இருந்து ஏலூரு வழியாக விஜயவாடா நோக்கிச் சென்று கொண்டிருந்த பேருந்து, பின்னால் வந்த கன்டெய்னர் லாரியுடன் மோதியதில் இந்த விபத்து ஏற்பட்டது. இந்த மோதலின் தாக்கத்தால் பேருந்தின் முன்பகுதி பலத்த சேதமடைந்தது.

தோரகுண்டா அருகே நிகழ்ந்த விபத்தில், ஆறு பயணிகள் சம்பவ இடத்திலேயே உயிரிழந்ததாகவும், மேலும் சுமார் 12 பேர் பலத்த காயமடைந்ததாகவும் கூறப்படுகிறது. காயமடைந்தவர்களில் மூவர் கவலைக்கிடமான நிலையில் உள்ளதாகவும், அவர்கள் மேல்சிகிச்சைக்காக விஜயவாடாவுக்கு மாற்றப்பட்டுள்ளதாகவும் தகவல்கள் வெளியாகியுள்ளன. 

இதையும் படிங்க: அமெரிக்கா செல்ல தடை? தெலுங்கானா மக்களை மத்திய அரசு அவமதித்துவிட்டது! ரேவந்த் ரெட்டி கண்டனம்!

"இந்த விபத்தில் 3 பெண்கள் உட்பட ஆறு பேர் உயிரிழந்தனர். காயமடைந்த மேலும் 12 பேர் மருத்துவமனையில் அனுமதிக்கப்பட்டுள்ளனர்," என மூத்த காவல்துறை அதிகாரி ஒருவர் பிடிஐ செய்தி நிறுவனத்திடம் தெரிவித்துள்ளார். 

பேருந்து மோதுவதற்கு முன்பே, அந்த லாரி சாலைத் தடுப்பில் மோதியிருக்கலாம் என சந்தேகிக்கப்படுவதாக காவல்துறை தெரிவித்தது. விபத்து நடந்த நேரத்தில் பேருந்தில் 42 பயணிகள் பயணம் செய்ததாக முதற்கட்ட தகவல் தெரிவிக்கிறது.

விபத்தில் உயிரிழந்தவர்களுக்கு தெலங்கானா முதலமைச்சர் ஏ. ரேவந்த் ரெட்டி இரங்கல் தெரிவித்ததோடு, அவர் உயிரிழந்தவர்களின் குடும்பத்தினருக்குத் தனது இரங்கலைத் தெரிவித்தார். காயமடைந்தவர்களுக்கு மேம்பட்ட மருத்துவ சிகிச்சை அளிக்கத் தேவையான நடவடிக்கைகளை எடுக்குமாறு தலைமைச் செயலாளருக்கு உத்தரவு பிறப்பித்துள்ளார். 

விபத்துக்கான சரியான காரணத்தைக் கண்டறிய காவல்துறை விசாரணையைத் தொடங்கியுள்ளது.

இதையும் படிங்க: லண்டனில் இருக்கும் ரேவந்த் ரெட்டி அமெரிக்கா செல்ல தடை? மத்திய அரசு அனுமதி மறுத்ததால் பரபரப்பு!