நியூ டெல்லி: இந்தியாவில் நிபா வைரஸ் பாதிப்பு இருவருக்கு கண்டறியப்பட்டுள்ள நிலையில், உலக சுகாதார நிறுவனம் (WHO) முக்கிய அறிவிப்பு ஒன்றை வெளியிட்டுள்ளது. நிபா வைரஸ் காரணமாக பயணக் கட்டுப்பாடுகளோ அல்லது வர்த்தகத் தடைகளோ எதுவும் விதிக்கத் தேவையில்லை என்று அது தெளிவுபடுத்தியுள்ளது. இதன்மூலம் இந்த வைரஸ் பெரிய அச்சுறுத்தல் இல்லை என்று உலக அளவில் ஆறுதல் தெரிவிக்கப்பட்டுள்ளது.

நிபா வைரஸ் வவ்வால் மற்றும் பன்றி உள்ளிட்ட விலங்குகளால் பரவக்கூடியது. இது காய்ச்சல், தலைவலி, சுவாசப் பிரச்னைகள், மூளை வீக்கம் போன்ற ஆபத்தான அறிகுறிகளை ஏற்படுத்தும். இதுவரை கேரளா, மேற்கு வங்கம் உள்ளிட்ட மாநிலங்களில் சில சமயங்களில் இந்த வைரஸ் பாதிப்பு கண்டறியப்பட்டுள்ளது. 

தற்போது இந்தியாவில் இருவருக்கு நிபா வைரஸ் இருப்பது உறுதி செய்யப்பட்டுள்ளது. இதையடுத்து சீனா உள்ளிட்ட சில ஆசிய நாடுகள் இந்தியாவிலிருந்து வரும் பயணிகளுக்கு கடுமையான சுகாதார சோதனைகளை மேற்கொண்டு வருகின்றன.

இதையும் படிங்க: சட்டம் ஒழுங்குக்கு சமாதி? கொந்தளிக்கும் நயினார்!! தமிழகத்தை மீட்கும் நாள் வெகு தொலைவில் இல்லை!

ஆனால் உலக சுகாதார நிறுவனம் இதுகுறித்து விரிவான ஆய்வு நடத்திய பிறகு, "நிபா வைரஸ் பாதிப்பு தற்போதைய நிலையில் பெரிய அளவில் பரவும் அபாயம் இல்லை. எனவே பயணக் கட்டுப்பாடுகள் அல்லது வர்த்தகத் தடைகள் தேவையில்லை" என்று அறிவித்துள்ளது. இந்த அறிவிப்பு இந்தியாவுடன் வர்த்தகம் செய்யும் நாடுகளுக்கு பெரும் நம்பிக்கையை அளித்துள்ளது.

இந்திய சுகாதாரத்துறை அமைச்சகமும் இதே கருத்தை ஆதரித்து வருகிறது. நிபா வைரஸ் பாதிப்பு கண்டறியப்பட்ட பகுதிகளில் தீவிர கண்காணிப்பு, விழிப்புணர்வு பிரசாரம், தடுப்பு நடவடிக்கைகள் மேற்கொள்ளப்பட்டு வருகின்றன. பொதுமக்கள் அச்சப்படத் தேவையில்லை என்றும், வழக்கமான சுகாதார முன்னெச்சரிக்கைகளை பின்பற்றினால் போதும் என்றும் அரசு தெரிவித்துள்ளது.

நிபா வைரஸ் பரவல் குறித்து உலக சுகாதார நிறுவனம் தொடர்ந்து கண்காணித்து வருகிறது. இந்த அறிவிப்பு இந்தியாவுக்கு மட்டுமல்லாமல், சுற்றுலா மற்றும் வர்த்தகத்தில் ஈடுபடும் நாடுகளுக்கும் நல்ல செய்தியாக அமைந்துள்ளது. மக்கள் தேவையற்ற பயத்தை தவிர்த்து, சுகாதார வழிகாட்டுதல்களை பின்பற்ற வேண்டும் என்று நிபுணர்கள் அறிவுறுத்தியுள்ளனர். 

இதையும் படிங்க: மேற்கு வங்கம்: 2 செவிலியர்களுக்கு நிபா வைரஸ் தொற்று உறுதி..!! தீவிர கட்டுப்பாடு..!!