சென்னை: 2026 தமிழக சட்டமன்றத் தேர்தலுக்கு இன்னும் நாட்கள் இருந்தாலும், பாட்டாளி மக்கள் கட்சியில் (பாமக) ஏற்பட்டுள்ள பிளவு மற்றும் புதிய கூட்டணி கணக்குகள் தமிழக அரசியலில் பெரும் பரபரப்பை ஏற்படுத்தியுள்ளன.

பாமக தலைவர் அன்புமணி ராமதாஸ் தலைமையிலான அணி அதிமுக தலைமையிலான தேசிய ஜனநாயக கூட்டணியில் (NDA) இணைந்துள்ள நிலையில், மருத்துவர் ராமதாஸ் தலைமையிலான மற்றொரு அணி தற்போது திமுகவுடன் கூட்டணி பேச்சுவார்த்தை நடத்தி வருவதாக தகவல்கள் வெளியாகியுள்ளன.

சமீபத்தில் தைலாபுரத்தில் நடைபெற்ற விருப்ப மனு விநியோக நிகழ்ச்சியில் திமுக அரசின் செயல்பாடுகளை மருத்துவர் ராமதாஸ் பாராட்டி பேசியது அரசியல் வட்டாரத்தில் பெரும் விவாதத்தை ஏற்படுத்தியது. தற்போது வெளியாகும் தகவல்களின்படி, ராமதாஸ் தரப்புக்கு திமுக சுமார் 5 சட்டமன்ற தொகுதிகள் ஒதுக்குவதற்கு தயாராக இருப்பதாகக் கூறப்படுகிறது.

இதையும் படிங்க: புது டெல்லி செல்கிறேன்!! எனக்காக அல்ல!! காங்கிரஸ் எம்.பி பதிவு!! கூட்டணிக்கு சூசகம்!!

ஆனால் மிக முக்கியமான நிபந்தனை ஒன்று உள்ளது – ராமதாஸ் தரப்பு வேட்பாளர்கள் திமுகவின் உதயசூரியன் சின்னத்திலேயே போட்டியிட வேண்டும் என்பதுதான். பாமகவின் சொந்த சின்னமான 'மாம்பழம்' சின்னத்தைத் தவிர்த்து உதயசூரியன் சின்னத்தில் போட்டியிடுவது ராமதாஸுக்கு மிகப்பெரிய முடிவாக இருக்கும்.

இந்தக் கூட்டணியில் பாமகவின் மூத்த தலைவர் ஜி.கே. மணி, எம்.எல்.ஏ அருள், மருத்துவர் ராமதாஸின் மகள் ஸ்ரீகாந்தி உள்ளிட்ட முக்கிய பெயர்கள் அடிபடுவதாகவும் தகவல்கள் தெரிவிக்கின்றன.

திமுக கூட்டணியில் ஏற்கனவே விடுதலை சிறுத்தைகள் கட்சி (விசிக்) போன்ற தலித் அமைப்புகள் இருக்கும் நிலையில், ராமதாஸ் தரப்பு இணைவது வன்னியர் சமூக வாக்குகளை பெருமளவு பாதிக்கக்கூடிய மாற்றமாக இருக்கும். இதுவரை திமுகவோ அல்லது ராமதாஸ் தரப்போ இந்தத் தகவலை அதிகாரப்பூர்வமாக உறுதிப்படுத்தவில்லை.

ஆனால் "தேர்தலில் எது வேண்டுமானாலும் நடக்கலாம்" என்று மருத்துவர் ராமதாஸ் சமீபத்தில் கூறியிருப்பது, 2026 தேர்தல் களம் பல அதிரடி திருப்பங்களை கொண்டிருக்கும் என்பதை உணர்த்துகிறது.

இதையும் படிங்க: திமுக வேணவே வேணாம்! விஜய் கூட பரவாயில்லை!! ராகுல்காந்திக்கு காங்கிரசார் எழுதிய கடிதம்!