தவெகவுக்கு க்ரீன் சிக்னல் காட்டிய பிரேமலதா! கூட்டணி அமைச்சரவைக்கு அச்சாரம்! சூடுபிடிக்கும் தேர்தல்களம்!

திருப்பூர்: “2026 சட்டமன்றத் தேர்தலில் தமிழக அரசியலில் இதுவரை யாரும் பார்த்திராத அதிசயம் நடக்கும். கூட்டணி அமைச்சரவைதான் அமையும் – அதில் தே.மு.தி.க. இடம் பெறும், நம் தொண்டர்கள் அமைச்சர்களாக உட்காருவார்கள்” என்று தே.மு.தி.க. பொதுச்செயலாளர் பிரேமலதா விஜயகாந்த் அதிரடியாக அறிவித்தார். திருப்பூரில் நேற்று நடந்த பூத் முகவர்கள் ஆலோசனைக் கூட்டத்தில் அவர் பேசியது தமிழக அரசியலில் பெரும் பரபரப்பை ஏற்படுத்தியுள்ளது.

பிரேமலதா பேசுகையில், “எத்தனை தடைகள் வந்தாலும் பீனிக்ஸ் பறவை போல் தே.மு.தி.க. உயர்ந்து பறக்கும். நம் தொண்டர்கள் விரும்பும் கூட்டணியே அமையும். நாம் இருக்கும் கூட்டணிதான் ஆட்சி அமைக்கும். 20 ஆண்டுகளாக உழைத்துக் கொண்டிருக்கும் உங்களை 2026-ல் அரசுப் பதவியில் உட்கார வைக்கும் தேர்தலாக இது இருக்கும். 

அனைவருக்கும் அங்கீகாரம் தரும் வகையில் கூட்டணி அமையும். டிசம்பர் 28-ல் கேப்டன் குருபூஜை, ஜனவரி 9-ல் கடலூரில் மக்கள் உரிமை மீட்பு மாநாடு – இவை தே.மு.தி.க.வின் புத்தெழுச்சியை உலகிற்கு காட்டும்” என்று உரையாற்றினார்.

இதையும் படிங்க: உதயநிதி பிறந்தநாளில் அலைக்கழிப்பு!! இளைஞரணியினர் கெடுபிடியால் மூத்த நிர்வாகிகள் அதிருப்தி!

கூட்டத்துக்குப் பின் நிருபர்களிடம் பேசிய பிரேமலதா, “கேப்டன் விஜயகாந்த் எப்போதும் சொல்வார் – ரேஷன் அரிசியை அவரவர் வீட்டுக்கே கொண்டு போய் கொடுக்க வேண்டும் என்று. ஆனால் இன்றைய திமுக அரசு முதியோர்கள், மாற்றுத்திறனாளிகளுக்கு தரமில்லாத அரிசி கொடுக்கிறது” என்று கடுமையாக விமர்சித்தார். அப்போது ஒரு தொண்டர் கொண்டு வந்த ரேஷன் அரிசி மூட்டையை வாங்கிக் காட்டி, “பாருங்கள்… இந்த அரிசியை எப்படி சாப்பிட முடியும்?” என்று கேள்வி எழுப்பினார்.

தே.மு.தி.க.வின் இந்த “கூட்டணி அமைச்சரவை” அறிவிப்பு, 2026 தேர்தலுக்கு முன்பாகவே புதிய கூட்டணி அலையை ஏற்படுத்தியுள்ளது. அதிமுக, பாஜக, தே.மு.தி.க. இடையே மும்முனைப் பேச்சுவார்த்தை நடப்பதாகவும், “கேப்டன் மகன்” விஜய பிரபாகரனை முதல்வர் வேட்பாளராக முன்னிறுத்தும் திட்டம் இருப்பதாகவும் கட்சி வட்டாரங்கள் தெரிவிக்கின்றன.

அதேசமயம் தவெக தலைவர் விஜய் அறிவித்த ஆட்சி, அதிகாரத்தில் பங்கு பிரசாரத்தை கையிலெடுத்து, கூட்டணி அமைச்சரவை குறித்து பேசி உள்ளதால் அவர் தவெக கூட்டணியில் இடம் பெறலாம் என்றும் பேச்சு அடிபடுகிறது. பிரேமலதாவின் இந்த அதிரடி பேச்சு, தமிழக அரசியல் களத்தில் புதிய புயலைத் தூண்டியுள்ளது.

இதையும் படிங்க: அமைச்சர் பண்ணுற காரியமா இது? கேவலம்! கொஞ்சமாச்சும் தகுதி இருக்கா? பெரியகருப்பனை பொளந்த பாஜக!