எல்லா மனஸ்தாபங்களும் விரைவில் சரியாகி விடும்!! அதிமுக நிர்வாகிகளுக்கு தெம்பூட்டிய எடப்பாடி பழனிசாமி!

உள்ளாட்சி தேர்தலை முன்னிட்டு அ.தி.மு.க.வில் அமைப்பு ரீதியான மாற்றங்கள் வேகமெடுத்துள்ளன. சென்னை ராயப்பேட்டையில் உள்ள கட்சியின் தலைமை அலுவலகத்தில் பொதுச்செயலாளர் எடப்பாடி கே. பழனிசாமி தலைமையில் கோவை மற்றும் திண்டுக்கல் மாவட்ட நிர்வாகிகள் ஆலோசனைக் கூட்டம் நடைபெற்றது. இந்தக் கூட்டத்தில் பல்வேறு முக்கிய முடிவுகள் எடுக்கப்பட்டதாக தகவல் வெளியாகியுள்ளது.

குறிப்பாக, கோவை மாவட்ட நிர்வாகிகள் கூட்டத்தில் முன்னாள் அமைச்சர் எஸ்.பி. வேலுமணியும், திண்டுக்கல் மாவட்ட கூட்டத்தில் முன்னாள் அமைச்சர் நத்தம் விஸ்வநாதனும் பங்கேற்காதது அரசியல் வட்டாரத்தில் பேசுபொருளாகியுள்ளது. இதற்கு அதிகாரப்பூர்வ விளக்கம் வெளியாகாத நிலையில், கட்சிக்குள் பல்வேறு யூகங்கள் எழுந்துள்ளன.

கூட்டத்தில் பேசிய நிர்வாகிகள், கடந்த 2021 தேர்தலில் கோவை மாவட்டத்தின் 10 தொகுதிகளிலும் அ.தி.மு.க. வெற்றி பெற்ற நிலையில், தற்போது ஒரு தொகுதியை மட்டுமே தக்கவைத்திருப்பது கட்சிக்கு பின்னடைவு என சுட்டிக்காட்டினர். வரவிருக்கும் உள்ளாட்சி தேர்தலில் வெற்றி பெற மாவட்ட நிர்வாகிகள் அனைவரும் ஒருங்கிணைந்து செயல்பட வேண்டியது அவசியம் என்றும் வலியுறுத்தினர்.

இதையும் படிங்க: “எங்களுக்கு ஜனநாயகன் வேண்டாம்... ஜனநாயகம் வேண்டும்!” முதல்வர் விஜய்யை குறிவைத்து அதிமுக அதிரடி கேள்வி!

இதற்கு பதிலளித்த பழனிசாமி, "ஒரே குடும்பமாக செயல்படும் கட்சியில் கருத்து வேறுபாடுகள் வருவது இயல்புதான். ஆனால் அவை நீண்ட காலம் நீடிக்கக் கூடாது. அனைத்து மனக்கசப்புகளையும் மறந்து, மக்கள் மத்தியில் தீவிரமாக பணியாற்ற வேண்டும். ஒற்றுமையுடன் செயல்பட்டால் உள்ளாட்சி தேர்தலில் வெற்றி நிச்சயம்" என்று அறிவுறுத்தியதாக கூறப்படுகிறது.

இதற்கிடையில், கட்சி அமைப்பை வலுப்படுத்தும் நடவடிக்கையாக விழுப்புரம் மாவட்டத்தில் முன்னாள் எம்.எல்.ஏ. அர்ஜுனன் மற்றும் காணை மேற்கு ஒன்றிய செயலர் முத்தமிழ்செல்வம் ஆகியோரின் கட்சிப் பொறுப்புகள் நீக்கப்பட்டுள்ளன. அவர்களுக்கு பதிலாக புதிய நிர்வாகிகள் நியமிக்கப்பட்டுள்ளனர்.

தொடர்ந்து மாவட்ட வாரியாக ஆலோசனைக் கூட்டங்களை நடத்தி, தேர்தலுக்கு முன்பே கட்சி அமைப்பை பலப்படுத்தும் திட்டத்தில் அ.தி.மு.க. தலைமை தீவிரமாக செயல்பட்டு வருகிறது. உள்ளாட்சி தேர்தலை இலக்காக வைத்து அமைப்பு ரீதியான மாற்றங்கள் மேலும் தொடரும் என அரசியல் வட்டாரங்கள் கருதுகின்றன.

இதையும் படிங்க: EPS-க்கு புதிய தலைவலி? எடப்பாடி கூட்டத்தை புறக்கணித்த எஸ்.பி. வேலுமணி! அதிமுகவில் மீண்டும் உட்கட்சி பூகம்பம்?