சட்டவிரோத பணப்பரிமாற்றம்!! அமைச்சர் ஐ.பெரியசாமி மீதான அமலாக்கத்துறை வழக்கு ரத்து!

சென்னை உயர் நீதிமன்றம், தமிழக அமைச்சர் ஐ. பெரியசாமி மீது அமலாக்கத்துறை பதிவு செய்த சட்டவிரோத பணப்பரிமாற்ற வழக்கை ரத்து செய்து உத்தரவிட்டுள்ளது.

2008-ம் ஆண்டு தி.மு.க. ஆட்சியில் வீட்டுவசதித் துறை அமைச்சராக இருந்த ஐ. பெரியசாமி, தமிழக அரசின் விருப்புரிமை ஒதுக்கீட்டின் கீழ் சென்னை திருவான்மியூரில் சிலருக்கு வீட்டுமனைகளை ஒதுக்கீடு செய்தார். இதில் முறைகேடு நடைபெற்றதாகக் கூறி, 2013-ம் ஆண்டு அதிமுக ஆட்சியின் போது லஞ்ச ஒழிப்புத் துறை வழக்குப் பதிவு செய்தது.

இந்த வழக்கில் அமைச்சர் ஐ. பெரியசாமி உள்ளிட்ட 7 பேர் மீது குற்றச்சாட்டு பதிவு செய்யப்பட்டது. பின்னர், மற்றவர்கள் மீதான வழக்குகள் உச்ச நீதிமன்றம் மற்றும் உயர் நீதிமன்றத்தால் ரத்து செய்யப்பட்டன. இதையடுத்து, 2020-ம் ஆண்டு அமலாக்கத்துறை சட்டவிரோத பணப்பரிமாற்றத் தடைச்சட்டத்தின் கீழ் தனி வழக்கு ஒன்றைப் பதிவு செய்தது.

இதையும் படிங்க: அமைச்சர் நேரு மீது வழக்குப்பதிவு செய்யுமாறு உத்தரவிடவில்லை! சென்னை ஐகோர்ட் விளக்கம்!

இந்த வழக்கை ரத்து செய்யக் கோரி அமைச்சர் ஐ. பெரியசாமி சென்னை உயர் நீதிமன்றத்தில் மனு தாக்கல் செய்திருந்தார். இன்று இந்த மனு தலைமை நீதிபதி எஸ்.ஏ. தர்மாதிகாரி தலைமையிலான அமர்வு முன் விசாரணைக்கு வந்தது.

அப்போது, நீதிபதிகள் “குற்றச் சதி அல்லது நிதி இழப்பு எதுவும் இல்லை என்று லஞ்ச ஒழிப்புத் துறை வழக்கை நீதிமன்றங்கள் ஏற்கனவே ரத்து செய்துவிட்டன. எனவே, அதே அடிப்படையில் அமலாக்கத்துறை பதிவு செய்த வழக்கும் நிலைக்காது” என்று கூறி, வழக்கை ரத்து செய்து உத்தரவிட்டனர்.

இந்தத் தீர்ப்பு அமைச்சர் ஐ. பெரியசாமிக்கு பெரும் நிம்மதியை அளித்துள்ளது. தி.மு.க. வட்டாரங்கள் இந்தத் தீர்ப்பை வரவேற்றுள்ளன. இந்த வழக்கு தொடர்பான சட்டப் போராட்டம் பல ஆண்டுகளாக நீடித்து வந்த நிலையில், உயர் நீதிமன்றத்தின் இந்த உத்தரவு முக்கியத்துவம் வாய்ந்ததாகப் பார்க்கப்படுகிறது.

இந்தச் சம்பவம் தமிழக அரசியல் வட்டாரத்தில் பெரும் கவனத்தை ஈர்த்துள்ளது. 

இதையும் படிங்க: உதயநிதி ஸ்டாலினுக்கு சிக்கல்! சொத்துக்கணக்கில் பிழை?! வருமான வரித்துறைக்கு கோர்ட் உத்தரவு!