ரூ.42.90 கோடியில் வாட்டர் ஸ்போர்ட்ஸ் அகாடமி..! புதிய அத்தியாயம்..! முதல்வர் விஜய் தொடங்கி வைப்பு..!!
தமிழ்நாடு ஒலிம்பிக் நீர் விளையாட்டு அகாடமி ஆகியவற்றை முதல்வர் விஜய் தொடங்கி வைத்தார்.
ராமநாதபுரம் மாவட்டத்தில் புதிய அத்தியாயம் தொடங்கியுள்ளது. ராமேசுவரம் அருகே பிரப்பன்வலசை கடற்கரையில் ரூ.42.90 கோடி மதிப்பீட்டில் அமைக்கப்பட்ட தமிழ்நாடு ஒலிம்பிக் நீர்விளையாட்டு அகாடமியை முதல்வர் விஜய் திறந்து வைத்தார். இந்தியாவிலேயே முதல் முறையாக உருவாக்கப்பட்டுள்ள இந்த அகாடமி, உலகத் தரத்திலான நீர்விளையாட்டுப் பயிற்சி மையமாகத் திகழ்கிறது. ஆறு ஏக்கர் பரப்பளவில் சுற்றுச்சூழலுக்கு ஏற்ப கட்டப்பட்டுள்ள இதில் ஆண் மற்றும் பெண் வீரர்களுக்காக தலா நாற்பது பேர் தங்கும் விடுதிகள் உள்ளன. பயிற்சியாளர்களுக்கான பத்து அறைகளும் அமைக்கப்பட்டுள்ளன.
கடல் நோக்கி அமைந்த கட்டிடத்தின் பெரிய ஜன்னல்கள் மூலம் பயிற்சியாளர்கள் கரையிலிருந்தே வீரர்களைக் கண்காணிக்க முடியும். நவீன தொழில்நுட்ப வசதிகளுடன் கூடிய வகுப்பறைகளில் வீடியோ பகுப்பாய்வு மூலம் பயிற்சி மேம்படுத்தப்படும். ஜிம், யோகா அறை, பிசியோதெரபி வசதி, படகு நிறுத்தும் இடம், போட் ஹாங்கர், திறந்தவெளி ஓய்விடம் ஆகியவை இங்கே இடம்பெற்றுள்ளன.செயிலிங், கேனோயிங், சர்பிங், கயாக்கிங், ஸ்டாண்டப் பேடில் போர்டிங் உள்ளிட்ட ஒலிம்பிக் நீர்விளையாட்டுகளுக்கு இங்கு உலகத் தர பயிற்சி அளிக்கப்படும். வாட்டர் போலோ, ஆர்ட்டிஸ்டிக் ஸ்விம்மிங், ரோயிங் ஆகியவற்றுக்கும் வசதிகள் உள்ளன.
இந்தப் பகுதியின் காற்று மற்றும் அலைகளின் இயக்கம் நீர்விளையாட்டுக்கு மிகவும் ஏற்றது. கடலில் ஐந்து கிலோமீட்டர் வரை ஆழம் குறைவாக இருப்பதால் தொடக்கநிலை பயிற்சிக்கு பாதுகாப்பான சூழல் கிடைக்கிறது. ஆறு மாதங்கள் அமைதியான கடல் நிலை நிலவுவதால் உள்நாட்டு மற்றும் வெளிநாட்டு வீரர்கள் இங்கு பயிற்சி பெற வருவார்கள் என எதிர்பார்க்கப்படுகிறது. உள்ளூர் இளைஞர்கள் மற்றும் மீனவர் சமூகத்தினருக்கு வேலைவாய்ப்புகளும் உருவாகும் வாய்ப்பு உள்ளது. இந்த அகாடமி சர்வதேச போட்டிகளை நடத்துவதற்கும் தயாராக உள்ளது.அதே நேரத்தில் சேலம் மாவட்டம் கருப்பூரில் உள்ள அரசு பொறியியல் கல்லூரி வளாகத்தில் ரூ.20 கோடி மதிப்பீட்டில் அமைக்கப்பட்ட பல்நோக்கு விளையாட்டு வளாகத்தையும் முதல்வர் விஜய் திறந்து வைத்தார்.
இதையும் படிங்க: அம்பாசமுத்திரத்தில் நானே போட்டி: மெர்சல் காட்டுபவர்களை பார்சல் பண்ணுவேன் சீமான் ஆவேசம்!
சுமார் பதினெட்டு ஏக்கர் நிலப்பரப்பில் உருவாக்கப்பட்டுள்ள இந்த வளாகத்தில் நானூறு மீட்டர் தடகளப் பாதை, கால்பந்து, ஹாக்கி, கூடைப்பந்து, வாலிபால், டென்னிஸ் மைதானங்கள், ஸ்கேட்டிங் ரிங்க், கோ-கோ திடல், ஜிம்னாஸ்டிக்ஸ் அரங்கம், உடற்பயிற்சி கூடம், நீச்சல் குளம், உள்விளையாட்டு அரங்கம் ஆகியவை அடங்கும். நிர்வாக அலுவலகம், விளையாட்டு விடுதி, கேஃபே போன்ற வசதிகளும் இங்கே உள்ளன. மாவட்ட இளைஞர்கள், மாணவர்கள் மற்றும் பொதுமக்கள் இதனைப் பயன்படுத்தி பயிற்சி பெறலாம்.இந்த இரு திட்டங்களும் தமிழகத்தின் விளையாட்டு உள்கட்டமைப்பை மேம்படுத்தி ஒலிம்பிக் அளவிலான சாதனைகளை ஊக்குவிக்கும் நோக்கில் செயல்படுத்தப்பட்டுள்ளன.
இதையும் படிங்க: ஜாக்பாட்..!! கோப்பை, பதக்கம், ரொக்கப் பரிசு..! முதலமைச்சர் கோப்பைக்கான பரிசுகள்..! CM விஜய் பங்கேற்பு..!
