கட்டுக்கட்டாய் சிக்கிய ரூ.8 ஆயிரம் கூப்பன்கள்!! 1800 டோக்கன்கள் பறிமுதல்! தர்மபுரியில் அதிர்ச்சி!
தர்மபுரி, பாலக்கோடு தொகுதியில் தி.மு.க., நிர்வாகி செந்தில்குமார், 45, வைத்திருந்த 1150 எண்ணிக்கையிலான ரூ.8,000 கூப்பன்கள், 1800 கிப்ட் டோக்கன்களை தேர்தல் பறக்கும் படையினர் பறிமுதல் செய்தனர்.
by
சென்னை: தமிழ்நாடு சட்டசபைத் தேர்தல் ஏப்ரல் 23ஆம் தேதி நடைபெற உள்ள நிலையில், தர்மபுரி மாவட்டம் பாலக்கோடு தொகுதியில் தேர்தல் பறக்கும் படையினர் அதிரடி சோதனையில் ஈடுபட்டு, திமுக நிர்வாகி ஒருவரிடம் இருந்து ரூ.8,000 மதிப்புள்ள 1,150 கூப்பன்கள் மற்றும் 1,800 கிப்ட் டோக்கன்களை பறிமுதல் செய்துள்ளனர்.
பாலக்கோடு தொகுதியில் திமுக சார்பில் மருத்துவர் டி.என்.வி. செந்தில்குமார், அதிமுக சார்பில் முன்னாள் அமைச்சர் கே.பி. அன்பழகன், நாம் தமிழர் கட்சி சார்பில் பூபதி, த.வெ.க. சார்பில் கோபி ஆகியோர் போட்டியிடுகின்றனர்.
தேர்தல் பிரசாரம் தீவிரமடைந்துள்ள இந்த சூழலில், திமுக நிர்வாகிகள் சிலர் வீடு வீடாக சென்று வாக்காளர்களுக்கு பரிசு கூப்பன்கள் வழங்கி, “எங்கள் சின்னத்தில் ஓட்டு போடுங்கள், வெற்றி பெற்ற பிறகு ரொக்கப் பணம், மளிகை பொருட்கள், வீட்டுத் தேவைப் பொருட்கள் வழங்கப்படும்” என வாக்குறுதி அளித்ததாக புகார் எழுந்தது.
இதையும் படிங்க: கை நழுவிய மாம்பழம்!! சிலிண்டர், குக்கர், பச்சை மிளகாய் சின்னங்களில் போட்டியிடும் ராமதாஸ் தரப்பு!
இந்தப் புகாரின் அடிப்படையில் தேர்தல் பறக்கும் படையினர் தீவிர சோதனை நடத்தினர். அப்போது, பாலக்கோடு பகுதியில் திமுக நிர்வாகி செந்தில்குமார் (45) எடுத்துச் சென்ற வாகனத்தில் இருந்து ரூ.8,000 மதிப்பிலான 1,150 கூப்பன்கள் மற்றும் 1,800 கிப்ட் டோக்கன்கள் பறிமுதல் செய்யப்பட்டன. இந்த நிகழ்வின்போது சில திமுக நிர்வாகிகள் அதிகாரிகளுடன் வாக்குவாதத்தில் ஈடுபட்டதால், அப்பகுதியில் சிறிது நேரம் பதற்றம் ஏற்பட்டது.
தேர்தல் ஆணையம் விதித்துள்ள விதிமுறைகளின்படி, பணம், பரிசுப் பொருட்கள், கூப்பன்கள் மூலம் வாக்குகளை பெற முயற்சிப்பது தேர்தல் நடத்தை விதிகளுக்கு எதிரானது. பாலக்கோடு தொகுதியில் இந்த சம்பவம் பெரும் பேச்சாகியுள்ளது. திமுக தரப்பில் இது தொடர்பாக உடனடி விளக்கம் ஏதும் அளிக்கப்படவில்லை.
தமிழ்நாடு முழுவதும் தேர்தல் பறக்கும் படைகள் தீவிர சோதனையில் ஈடுபட்டு வரும் நிலையில், பாலக்கோடு சம்பவம் தேர்தல் செலவு மற்றும் நடைமுறைகள் குறித்து மீண்டும் கேள்விகளை எழுப்பியுள்ளது. வாக்காளர்களுக்கு இலவசப் பரிசுகள் வழங்குவது தேர்தல் அமைதியை பாதிக்கும் என அரசியல் பார்வையாளர்கள் கருதுகின்றனர். தேர்தல் அதிகாரிகள் இந்த விவகாரத்தில் மேலும் விசாரணை நடத்தி வருவதாக தெரிகிறது.
இதையும் படிங்க: அதிமுகவின் பார்முலாவை கையில் எடுக்கும் மு.க.ஸ்டாலின்! எடுபடுமா சென்டிமென்ட் பிரசாரம்!
