தேர்தல் வரலாற்றிலேயே இதுதான் முதல்முறை!! கம்யூனிஸ்ட்டுகள் களம் காணாத கோவை எலெக்‌ஷன்!!

கோவை: தமிழக சட்டமன்றத் தேர்தல் வரலாற்றில் முதல் முறையாக கோவை மாவட்டத்தில் கம்யூனிஸ்ட் கட்சிகள் எந்தத் தொகுதியிலும் போட்டியிடாத நிலை ஏற்பட்டுள்ளது. தொழில் நகரமான கோவையில் ஒரு காலத்தில் தொழிலாளர் இயக்கத்தின் மையமாகவும், கம்யூனிஸ்ட் கட்சிகளின் வலுவான கோட்டையாகவும் இருந்த பகுதியில் இந்த மாற்றம் பெரும் கவனத்தை ஈர்த்துள்ளது.

கடந்த பல தசாப்தங்களாக கோவை எம்.பி. தொகுதியில் கம்யூனிஸ்ட் கட்சிகளே தொடர்ந்து போட்டியிட்டு வந்தன. கோவை கிழக்கு, பேரூர், தொண்டாமுத்தூர், சிங்காநல்லூர், வால்பாறை உள்ளிட்ட தொகுதிகளில் கம்யூனிஸ்ட் தலைவர்கள் பலமுறை வெற்றி பெற்றுள்ளனர். பார்வதி கிருஷ்ணன், உமாநாத், ரமணி, பாலதண்டாயுதம் போன்ற முன்னணி கம்யூனிஸ்ட் தலைவர்கள் கோவையை தங்களது அரசியல் களமாகக் கொண்டு செயல்பட்டவர்கள்.

ஆனால் காலப்போக்கில் கம்யூனிஸ்ட் கட்சிகளின் செல்வாக்கு கணிசமாகக் குறைந்துவிட்டது. இந்த முறை மாநில அளவில் கம்யூனிஸ்ட் கட்சிகளுக்கு வெறும் ஐந்து தொகுதிகள் மட்டுமே ஒதுக்கப்பட்டுள்ளன. அதிலும் கோவை மாவட்டத்தில் எந்தத் தொகுதியும் கிடைக்கவில்லை. இதனால், கோவையில் கம்யூனிஸ்ட் கட்சிகள் இல்லாத முதல் சட்டமன்றத் தேர்தலாக இது அமைந்துள்ளது.

இதையும் படிங்க: கோவையில் வெளியூர் வேட்பாளர்கள் வென்றதே இல்லை?! வரலாற்றை மாற்றி எழுதுவாரா செந்தில் பாலாஜி!!

கம்யூனிஸ்ட் கட்சியினர் இதற்கு கூட்டணிச் சிக்கல்களை முக்கிய காரணமாகக் கூறுகின்றனர். ஆனால் அரசியல் விமர்சகர்கள் வேறு காரணங்களைச் சுட்டிக்காட்டுகின்றனர். “வறட்டு சித்தாந்தத்தைப் பிடித்துக் கொண்டு மக்களின் மாறிய எதிர்பார்ப்புகளுடன் ஒத்துப்போகாதது, தொழிலாளர் மத்தியில் ஏற்பட்டுள்ள புதிய விழிப்புணர்வு, தொழில் மாற்றங்கள் ஆகியவைதான் கம்யூனிஸ்ட் கட்சிகளின் வீழ்ச்சிக்கு முக்கிய காரணம்” என்று அவர்கள் தெரிவிக்கின்றனர்.

தொழில் நிறுவனங்கள் மற்றும் தொழிலாளர்கள் அதிகம் உள்ள கோவை மாவட்டத்தில் ஒரு காலத்தில் தொழிற்சங்க இயக்கங்கள் வலுவாக இருந்தன. ஆனால் இப்போது அந்த இயக்கங்கள் பலவீனமடைந்து, புதிய அரசியல் சக்திகள் முன்னுக்கு வந்துள்ளன. இந்த மாற்றம் கோவை அரசியல் களத்தை முழுமையாக மாற்றியமைத்துள்ளது.

கம்யூனிஸ்ட் கட்சிகளின் இந்த விலகல் தமிழக அரசியலில் ஒரு முக்கிய திருப்புமுனையாகப் பார்க்கப்படுகிறது. கோவை போன்ற தொழில் நகரங்களில் இடதுசாரி அரசியலின் செல்வாக்கு குறைந்து வருவது தெளிவாகத் தெரிகிறது. இந்தத் தேர்தல் முடிவுகள் கம்யூனிஸ்ட் கட்சிகளின் எதிர்காலத்தைப் பற்றியும் பல கேள்விகளை எழுப்பியுள்ளன.

இதையும் படிங்க: கோவைக்கு குறி வைக்கும் அண்ணாமலை!! வெற்றி வாய்ப்புகள் என்ன?!! ஆதரவாளர்களுடன் தீவிர ஆலோசனை!