கார் முதல் டிவி வரை இனி ‘மேட் இன் இந்தியா’ சிப்! 5 ஆண்டுகளில் இந்தியாவின் மெகா திட்டம்! மத்திய அரசின் அடுத்த இலக்கு!
செமிகண்டக்டர் திட்டத்தின் இரண்டாம் கட்டத்தின் கீழ் உள்நாட்டு தொழில்துறை சூழலை விரிவுபடுத்தவும், சர்வதேச முதலீடுகளை ஈர்க்கவும் ரூ.1.27 லட்சம் கோடி ஒதுக்கப்பட்டுள்ளதாகவும் அவர் குறிப்பிட்டுள்ளார்.
by
புதுடெல்லி: கார்கள், தொலைக்காட்சிகள், குளிர்சாதனப் பெட்டிகள் உள்ளிட்ட பல்வேறு பொருட்களுக்குத் தேவையான சிப்களை இந்தியாவிலேயே வடிவமைத்து உற்பத்தி செய்யும் இலக்கை மத்திய அரசு நிர்ணயித்துள்ளது. அடுத்த 5 ஆண்டுகளில் இந்த இலக்கை எட்ட நடவடிக்கை எடுக்கப்பட்டு வருவதாக மத்திய தகவல் தொழில்நுட்பத் துறை அமைச்சர் அஸ்வினி வைஷ்ணவ் தெரிவித்துள்ளார்.
ஆங்கில செய்தி சேனலுக்கு அளித்த பேட்டியில் அவர் கூறியதாவது: செமிகண்டக்டர் துறையில் இந்தியா வேகமாக முன்னேறி வருகிறது. அடுத்த கட்டமாக கார்கள், மின் அமைப்புகள், தொலைக்காட்சிகள், ஏசி, குளிர்சாதனப் பெட்டிகள் உள்ளிட்ட வீட்டு உபயோகப் பொருட்களுக்குத் தேவையான சிப்களை இந்தியாவிலேயே வடிவமைத்து தயாரிக்கும் திறனை உருவாக்க வேண்டும்.
தற்போது உலகளவில் தொழில்நுட்பம் முதல் வாகன உற்பத்தி வரை பல துறைகளின் வளர்ச்சியில் சிப்கள் முக்கிய பங்கு வகிக்கின்றன. இதனால், சிப் தயாரிப்பில் தன்னிறைவு பெறுவது இந்தியாவின் தொழில்துறை மற்றும் விநியோகச் சங்கிலிக்கு முக்கியமானதாக பார்க்கப்படுகிறது.
இதையும் படிங்க: ரூ.1.50 டிரில்லியன் பொருளாதார இலக்கு! தமிழகத்தில் அதிரடியாக களமிறங்கும் 20 துறைகள்!
இந்த இலக்கை அடைய சிப் தயாரிப்பு மட்டுமின்றி, அதன் வடிவமைப்பு, உற்பத்தி உபகரணங்கள் மற்றும் சோதனை உள்ளிட்ட முழுமையான கட்டமைப்பை இந்தியாவில் உருவாக்க அரசு முயற்சி மேற்கொண்டு வருவதாக வைஷ்ணவ் தெரிவித்துள்ளார்.
செமிகண்டக்டர் திட்டத்தின் இரண்டாம் கட்டத்தின் கீழ் உள்நாட்டு தொழில்துறை சூழலை விரிவுபடுத்தவும், சர்வதேச முதலீடுகளை ஈர்க்கவும் ரூ.1.27 லட்சம் கோடி ஒதுக்கப்பட்டுள்ளதாகவும் அவர் குறிப்பிட்டுள்ளார்.
அதே நேரத்தில், சிப் உற்பத்தித் துறைக்கு இணையவழித் தாக்குதல்கள் மற்றும் புவிசார் அரசியல் பதற்றங்கள் முக்கிய சவால்களாக இருக்கலாம் என்றும் அமைச்சர் எச்சரித்துள்ளார். உலகளாவிய விநியோகச் சங்கிலியில் இந்தியாவின் பங்கு அதிகரிக்கும் நிலையில், சைபர் தாக்குதல்கள் மற்றும் உற்பத்தித் தடைகளை எதிர்கொள்ள நிறுவனங்கள் தயாராக இருக்க வேண்டும் என்றும் அவர் தெரிவித்துள்ளார்.
இந்தியாவின் சிப் திட்டம் வெறும் உற்பத்தியை மட்டும் நோக்கமாகக் கொண்டிருக்காமல், வடிவமைப்பு முதல் உபகரண உற்பத்தி வரை முழுமையான செமிகண்டக்டர் சூழலை உருவாக்குவதை இலக்காகக் கொண்டுள்ளது. இதன் மூலம் கார், டிவி உள்ளிட்ட பல்வேறு துறைகளின் எதிர்கால தேவையை உள்நாட்டிலேயே பூர்த்தி செய்யும் திறனை உருவாக்க மத்திய அரசு திட்டமிட்டுள்ளது.
இதையும் படிங்க: வெளிநாடு செல்லாதீங்க! தங்கமும் வாங்காதீங்க! பிரதமர் மோடி ரீல்ஸ் மூலம் அதிரடி வேண்டுகோள்!
