'எனக்கு எம்எல்ஏ டிக்கெட் தரும் வரை நகர மாட்டேன்' - முதல்வர் வீட்டின் முன் அமர்ந்து சிட்டிங் எம்எல்ஏ அதகளம்...!

பீகார் தேர்தலை அடுத்து, ஜேடியுவில் சீட்டுக்கான மோதல் தொடங்கியுள்ளது. சிட்டிங் எம்.எல்.ஏ. கோபால் மண்டல் முதல்வர் நிதிஷ் குமாரின் வீட்டின் முன் அமர்ந்து போராட்டத்தில் இறங்கியுள்ளார். 

பீகார் சட்டமன்றத் தேர்தலுக்கு முன்னதாக ஆளும் கட்சிக்கும் எதிர்க்கட்சிகளுக்கும் இடையிலான மோதல் உச்சத்தை எட்டியுள்ளது. குறிப்பாக, ஆளும் ஜேடியு கட்சியில் பெரும் அதிருப்தி நிலவுகிறது. அந்த கட்சியின் சிட்டிங் எம்.எல்.ஏ கோபால் மண்டல் முதல்வர் நிதிஷ் குமாரின் வீட்டின் முன் போராட்டம் நடத்தி வருகிறார். தேர்தல் பின்னணியில், ஆளும் கட்சி மற்றும் எதிர்க்கட்சிகள் விநியோகம் மற்றும் வேட்பாளர் தேர்வில் மும்முரமாக உள்ளன. முதல் கட்ட வாக்குப்பதிவிற்கான வேட்புமனு தாக்கல் செய்ய இன்னும் நான்கு நாட்கள் மட்டுமே உள்ளன. என்டிஏ மற்றும் மகாகத்பந்தன் கூட்டணிகள் இன்னும் தங்கள் வேட்பாளர்களின் முழுமையான பட்டியலை அறிவிக்கவில்லை.

இந்தச் சூழலில், ஆளும் கூட்டணியின் ஒரு பகுதியாக உள்ள ஜேடியு எம்.எல்.ஏ. கோபால் மண்டல் தற்போது சட்டமன்ற உறுப்பினராக உள்ள கோபால்பூர் தொகுதி அதன் கூட்டணி கட்சியான பாஜகவிற்கு ஒதுக்கப்பட்டுள்ளது. இதனால் கொதித்தெழுந்த கோபால் மண்டல் இன்று காலை முதலே முதலமைச்சர் நிதிஷ் குமாரின் வீட்டின் முன்பு அமர்ந்து கொண்டு போராட்டத்தில் இறங்கியுள்ளார். 

இதையும் படிங்க: ஆட்டம் ஆரம்பம்! கரூர் சம்பவம் இனி சிபிஐ வசம்... ஆவணங்கள் அனைத்தும் ஒப்படைப்பு...!

இன்று  காலை கோபால் மண்டல் முதல்வர் நிதிஷ் குமாரின் இல்லத்திற்குச் சென்று, தனக்கு எம்.எல்.ஏ தான் சிட்டிங் எம்.எல்.ஏ.வாக உள்ள தொகுதியையே மீண்டும் தனக்கு ஒதுக்க வேண்டும் என கோரிக்கை விடுக்க முனைந்துள்ளார். இருப்பினும், முதல்வர் அவருக்கு அப்பாயின்ட்மென்ட் வழங்காததால், பாதுகாப்பு ஊழியர்கள் அவரை உள்ளே அனுமதிக்கவில்லை.

இதனால் கடும் கோபமடைந்த எம்எல்ஏ கோபால் மண்டல், முதல்வர் நிதிஷ் குமாரின் வீட்டு வாயிலின் முன் அமர்ந்து போராட்டத்தில் ஈடுபட்டார். காலை 8.30 மணி முதல் அங்கு காத்திருப்பதாகவும், தனக்கு சீட் கிடைக்கும் வரை இங்கிருந்து நகர மாட்டேன் என்றும் தெரிவித்துள்ளார். அதுமட்டுமின்றி தனக்கான எம்.எல்.ஏ.சீட்டை நிச்சயம் பெறுவேன் என்றும், அது கிடைக்காமல் நிச்சயமாக அங்கிருந்து செல்ல மாட்டேன் என்றும் ஊடகங்கள் முன்பு சபதம் ஏற்றுள்ளார். 

கோபால் மண்டல் மட்டுமல்ல, பல்வேறு தொகுதிகளைச் சேர்ந்த ஜேடியு தொண்டர்களும் முதல்வரின் வீட்டின் முன் கவலை தெரிவித்து வருகின்றனர். கூட்டணியில் பாஜக தலைவர்களுக்கு சீட் வழங்குவதன் மூலம் அவர்கள் தங்கள் சொந்தக் கட்சித் தலைவர்களுக்கே அநீதி இழைப்பதாக அவர்கள் விமர்சித்து வருகின்றனர். இந்தச் சூழலில், முதல்வரின் இல்லத்தைச் சுற்றி காவல்துறையினர் பாதுகாப்பை மேலும் பலப்படுத்தியுள்ளனர்.

இதையும் படிங்க: தவெக கொடி பறக்குதா? - ஜனார்த்தனனை தூக்கியடித்த ஜெயலலிதா... எடப்பாடி மறந்த பீதி கிளப்பும் பிளாஷ்பேக்...!