திருவல்லிக்கேணி காவல் நிலையத்தில் ஆஜராக முடியாது! விலக்கு கேட்கும் செந்தில் பாலாஜி! புதிய கோரிக்கை!
திருவல்லிக்கேணி காவல் நிலையத்தில் ஆஜராவதில் இருந்து 6 நாட்களுக்கு விலக்கு வேண்டும் என செந்தில் பாலாஜி புதிய மனு ஒன்றை தாக்கல் செய்துள்ளார்.
by
முன்னாள் அமைச்சர் செந்தில் பாலாஜி, திருவல்லிக்கேணி காவல் நிலையத்தில் நேரில் ஆஜராகும் நிபந்தனையில் இருந்து 6 நாட்கள் விலக்கு அளிக்கக் கோரி நீதிமன்றத்தில் புதிய மனு தாக்கல் செய்துள்ளார். இந்த மனு அரசியல் மற்றும் சட்ட வட்டாரங்களில் பரபரப்பை ஏற்படுத்தியுள்ளது.
குதிரைப் பேரம் தொடர்பான வழக்கில் முன்ஜாமின் பெற்றுள்ள செந்தில் பாலாஜிக்கு, தினமும் திருவல்லிக்கேணி காவல் நிலையத்தில் ஆஜராகி கையெழுத்திட வேண்டும் என்ற நிபந்தனையை நீதிமன்றம் விதித்திருந்தது. அந்த நிபந்தனையின்படி அவர் தொடர்ந்து காவல் நிலையத்தில் ஆஜராகி வந்த நிலையில், தற்போது ஆறு நாட்கள் விலக்கு கோரி புதிய மனுவை தாக்கல் செய்துள்ளார்.
செந்தில் பாலாஜி தாக்கல் செய்துள்ள மனுவில், டாஸ்மாக் முறைகேடு வழக்கில் முன்ஜாமின் கோரி உச்சநீதிமன்றத்தை அணுக வேண்டியிருப்பதாகவும், அதற்காக வழக்கறிஞர்களுடன் ஆலோசனை நடத்த வேண்டிய அவசியம் இருப்பதால் காவல் நிலையத்தில் நேரில் ஆஜராக இயலாது என்றும் தெரிவித்துள்ளார்.
இதையும் படிங்க: 2 நாட்களாக காவல் நிலையத்தில் ஆஜராகாத செந்தில் பாலாஜி?! போலீசாரின் அடுத்த கட்ட சட்ட நடவடிக்கை என்ன?
மேலும், இதுகுறித்து திருவல்லிக்கேணி காவல் நிலைய அதிகாரிகளுக்கு ஏற்கனவே கடிதம் அனுப்பியிருப்பதாகவும் அவர் மனுவில் குறிப்பிட்டுள்ளார். இதுவரை நீதிமன்றம் விதித்த முன்ஜாமின் நிபந்தனைகளை முழுமையாக பின்பற்றி வந்துள்ளதாகவும், எந்த விதிமுறையையும் மீறவில்லை என்றும் செந்தில் பாலாஜி விளக்கம் அளித்துள்ளார்.
அத்துடன், வரும் ஆகஸ்ட் 5-ஆம் தேதி கட்டாயமாக திருவல்லிக்கேணி காவல் நிலையத்தில் நேரில் ஆஜராகி கையெழுத்திடுவேன் என்று நீதிமன்றத்தில் உறுதியும் அளித்துள்ளார். இந்த மனு மீது நீதிமன்றம் என்ன முடிவு எடுக்கிறது என்பது தற்போது கவனிக்கப்படும் முக்கிய அம்சமாக உள்ளது.
இதற்கிடையில், டாஸ்மாக் முறைகேடு தொடர்பான வழக்கில் முன்ஜாமின் பெறுவதற்காக செந்தில் பாலாஜி மேற்கொண்டு வரும் சட்ட நடவடிக்கைகளும் அரசியல் வட்டாரங்களில் பேசுபொருளாக மாறியுள்ளன. காவல் நிலையத்தில் ஆஜராகும் நிபந்தனையில் தற்காலிக விலக்கு கிடைக்குமா அல்லது நீதிமன்றம் வேறு நிபந்தனைகளை விதிக்குமா என்பது விரைவில் தெரியவரும் என எதிர்பார்க்கப்படுகிறது.
இதையும் படிங்க: Breaking News! செந்தில் பாலாஜிக்கு சென்னை ஐகோர்ட்டில் அதிர்ச்சி... டாஸ்மாக் முறைகேடு வழக்கில் முன்ஜாமின் மனு தள்ளுபடி!
