திமுக ஓட்டு தவெகவுக்கு போகும்! வெற்று திட்டங்களால் மக்கள் கோவம்! ஸ்டாலின் மீது அன்புமணி புகார்!

பாமக இளைஞர் அணி பொதுக்குழு கூட்டம் சென்னையில் நடைபெற்றது. கூட்டத்திற்குப் பிறகு செய்தியாளர்களிடம் பேசிய பாமக தலைவர் அன்புமணி ராமதாஸ், திமுக ஆட்சியை கடுமையாக விமர்சித்தார். கடந்த 5 ஆண்டுகளில் தமிழகத்தில் மிக மோசமான ஆட்சி நடப்பதாகவும், 12 முதலமைச்சர்களில் ஸ்டாலின் தான் மிக மோசமானவர் என்றும் குற்றம்சாட்டினார்.

அமைச்சர்களாக உள்ள தொழிலதிபர்கள் ஸ்டாலினை சுற்றி இருப்பதாகவும், எங்கும் கலெக்ஷன், கரப்ஷன், கமிஷன் நிலவுவதாகவும் தெரிவித்தார். சமூக நீதியை திமுக குழிதோண்டி புதைத்துவிட்டதாகவும், பெண்கள், குழந்தைகளுக்கு பாதுகாப்பு இல்லை என்றும் கூறினார். மாநிலம் முழுவதும் போதை புழக்கம் அதிகரித்துள்ளது திமுகவின் மிகப்பெரிய தோல்வி என்று விமர்சித்தார்.

மது விற்பனையால் ஏற்கனவே 3 தலைமுறைகள் பாழாகியுள்ளன. போதை புழக்கத்தில் பிற மாநிலங்களை விஞ்சிவிட்டோம் என்றும், குற்றங்கள் அதிகரித்து வருவதாகவும் சுட்டிக்காட்டினார்.

இதையும் படிங்க: நான் சொல்றபடி செய்யுங்க! திமுக கூட்டணி வேணும்னு கேளுங்க!! மாவட்ட தலைவர்களுக்கு செல்வப்பெருந்தகை சைலண்ட் ஆர்டர்!

தற்போது ஸ்டாலின் தினமும் புதிய திட்டங்கள் அறிவிப்பதாகவும், கடந்த 45 நாட்களில் 25 திட்டங்கள் அறிவிக்கப்பட்டுள்ளதாகவும் கூறினார். கடந்த 5 ஆண்டுகளாக என்ன செய்தார்? இதற்கு நிதி எங்கிருந்து வரும்? இவை வெற்று அறிவிப்புகள் என்று கேள்வி எழுப்பினார்.

எதிர்க்கட்சிகள் பிரிந்திருந்ததால் கடந்த 2 தேர்தல்களில் திமுக வென்றது. ஆனால் இப்போது எதிர்க்கட்சி கூட்டணி வலிமையாக உள்ளது என்றார். திமுக வாக்குறுதிகளை நிறைவேற்றாததால் பல தரப்பினரும் போராட்டம் நடத்தி வருகின்றனர். சட்டமன்ற தேர்தலில் திமுக ஒற்றை இலக்க இடங்களை மட்டுமே பிடிக்கும். எங்கள் கூட்டணி 200க்கு மேற்பட்ட இடங்களை வெல்லும் என்று நம்பிக்கை தெரிவித்தார்.

திமுக மீது மக்கள் கோபத்தில் உள்ளனர். தனது கட்சி விவகாரத்தில் தலையிட்டதால் தான் இரட்டிப்பு கோபத்தில் இருப்பதாகவும், பாமகவை உடைக்க முடியாது என்றும் கூறினார். இந்த முறை திமுகவின் ஓட்டுகளில் பெரும்பங்கு தவெக (தமிழக வெற்றிக் கழகம்) கட்சிக்கு செல்லும். இது எங்கள் கூட்டணிக்கு பெரிய வெற்றியை தரும் என்று அன்புமணி தெரிவித்தார்.

அரசுப் பள்ளி மாணவர்களுக்கான 7.5% உள் இட ஒதுக்கீடு திமுக அழுத்தத்தால் வந்தது என்று ஸ்டாலின் கூறுவது நல்ல ஜோக் என்று கிண்டலடித்தார். 2026 தேர்தலில் திமுகவுக்கு பெரும் சவால் ஏற்படும் என்பது அன்புமணியின் கணிப்பு. இது தமிழக அரசியலில் புதிய விவாதத்தை ஏற்படுத்தியுள்ளது. 

இதையும் படிங்க: டிடிவி, எடப்பாடியை வீழ்த்த வியூகம்!? விஜயுடன் கைகோர்க்கும் சசிகலா! தென் தமிழகத்தில் பலம் சேர்க்கும் கூட்டணி!