விஜய் உட்பட தவெக வேட்பாளர்கள் அனைவரும் டெபாசிட் இழப்பார்கள்! அர்ஜுன் சம்பத் ஆவேச பேட்டி!

தமிழகச் சட்டமன்றத் தேர்தல் களம் சூடுபிடித்துள்ள நிலையில், நடிகர் விஜய் தலைமையிலான தமிழக வெற்றிக் கழகத்தின் (தவெக) அரசியல் வருகை குறித்து இந்து மக்கள் கட்சித் தலைவர் அர்ஜுன் சம்பத் மிகக் கடுமையான விமர்சனங்களை முன்வைத்துள்ளார். சென்னையில் இன்று செய்தியாளர்களைச் சந்தித்த அவர், தவெக-வின் அரசியல் எதிர்காலம் குறித்துப் பல அதிரடியான கருத்துகளைப் பகிர்ந்து கொண்டார்.

நடைபெற உள்ள 2026 சட்டமன்றத் தேர்தலில், நடிகர் விஜய் போட்டியிடும் தொகுதி உட்பட, தமிழக வெற்றிக் கழகம் களம் காணும் 234 தொகுதிகளிலும் அக்கட்சியின் வேட்பாளர்கள் டெபாசிட் இழப்பார்கள். மக்கள் சினிமா செல்வாக்கிற்கும் நிஜ அரசியல் களத்திற்கும் உள்ள வித்தியாசத்தை வாக்கு எண்ணும் நாளில் தெளிவுபடுத்துவார்கள்" எனச் சவால் விடுத்தார். தவெக-வின் கொள்கைகளைப் பற்றிச் சாடிய அவர், "விஜய் முன்வைக்கும் கொள்கைகள் அனைத்தும் திமுக-வின் திராவிட மாடல் கொள்கைகளின் மறுபதிப்பாகவே உள்ளன. உண்மையில் தவெக என்பது திமுக-வின் 'பி-டீம்' (B Team) ஆகத்தான் செயல்பட்டு வருகிறது. இவர்களால் தமிழகத்தில் எந்தவொரு ஆன்மீக அல்லது சமூக மாற்றத்தையும் கொண்டு வர முடியாது" என்றார்.

வெறும் ரசிகர் மன்றங்களை வைத்துக் கொண்டு தேர்தலில் வென்றுவிட முடியாது என்றும், தமிழக மக்கள் தெளிவான அரசியல் முதிர்ச்சியுடன் இருப்பதாகவும் அவர் குறிப்பிட்டார். விஜய்யின் அரசியல் நகர்வுகள் தேச நலனுக்கு எதிராக இருப்பதாகவும் அவர் குற்றம் சாட்டினார். தமிழகத்தில் உண்மையான ஆன்மீக அரசியலை முன்னெடுப்பவர்களுக்கு விஜய்யின் அரசியல் ஒருபோதும் தடையாக இருக்காது என்றும், தேசியச் சிந்தனை கொண்டக் கட்சிகளே வெற்றி பெறும் என்றும் அர்ஜுன் சம்பத் நம்பிக்கை தெரிவித்தார்.

இதையும் படிங்க: தவெக டூ மீண்டும் அதிமுக..!! எஸ்.பி.வேலுமணி சொன்ன பரபரப்பு விஷயம்..!! அரசியல் களத்தில் பூகம்பம்..!!

விஜய்யின் தமிழக வெற்றிக் கழகம் தேர்தல் பணிகளில் தீவிரம் காட்டி வரும் வேளையில், அர்ஜுன் சம்பத்தின் இந்த டெபாசிட் குறித்த விமர்சனம் சமூக வலைதளங்களில் விவாதத்தைக் கிளப்பியுள்ளது.

இதையும் படிங்க: தேர்தலில் போட்டியிடாத கட்சிகளுக்கு எதற்கு முன்னுரிமை? தவெக மனு மீதான விசாரணையில் உயர் நீதிமன்றம் கேள்வி!