இந்தியாவின் உயரிய சிவில் விருதுகளில் ஒன்றான பத்ம விருதுகள் வழங்கும் மிக முக்கிய விழா இன்று ஜனாதிபதி மாளிகையில் கோலாகலமாக நடைபெற்றது. குடியரசுத் தலைவர் திரௌபதி முர்மு தலைமையில் நடைபெற்ற இந்த விழாவில் 66 சிறப்புமிக்க தனிநபர்களுக்கு பத்ம விருதுகள் வழங்கப்பட்டன. இந்த ஆண்டு மொத்தம் 131 பத்ம விருதுகளுக்கு ஜனாதிபதி ஒப்புதல் அளித்துள்ள நிலையில், முதல் கட்டமாக 66 பேருக்கு விருதுகள் வழங்கப்பட்டுள்ளன. இதில் 2 பத்ம விபூஷண், 6 பத்ம பூஷண் மற்றும் 58 பத்மஸ்ரீ விருதுகள் அடங்கும். 

பத்ம விபூஷண் இந்தியாவின் இரண்டாவது உயரிய சிவில் விருதாகக் கருதப்படுகிறது. பத்ம பூஷண் மற்றும் பத்மஸ்ரீ ஆகியவை முறையே மூன்றாவது மற்றும் நான்காவது உயரிய விருதுகளாகும். இந்த விருதுகள் கலை, இலக்கியம், கல்வி, மருத்துவம், சமூக சேவை, விளையாட்டு, அறிவியல் உள்ளிட்ட பல்வேறு துறைகளில் சிறப்பான பங்களிப்பை வழங்கியவர்களுக்கு வழங்கப்படுகின்றன. விழாவில் துணை ஜனாதிபதி சி.பி. ராதாகிருஷ்ணன், பிரதமர் நரேந்திர மோடி, மத்திய உள்துறை அமைச்சர் அமித் ஷா உள்ளிட்ட முக்கிய பிரமுகர்கள் கலந்துகொண்டு விருது பெற்றவர்களுக்கு வாழ்த்து தெரிவித்தனர். 

ஜனாதிபதி மாளிகையின் பிரமாண்டமான தர்பார் ஹாலில் நடைபெற்ற இந்த விழா, தேசிய கீதத்துடன் தொடங்கி, பாரம்பரிய மற்றும் அதிகாரப்பூர்வ முறைப்படி நடைபெற்றது. குறிப்பாக, தமிழ்நாட்டைச் சேர்ந்த முன்னாள் சுகாதாரத்துறை அமைச்சரும், மருத்துவருமான டாக்டர் எச்.வி. ஹண்டே அவர்களுக்கு மருத்துவத் துறையில் ஆற்றிய வாழ்நாள் சாதனைக்காக பத்மஸ்ரீ விருது வழங்கப்பட்டது. தமிழக சுகாதாரத் துறையின் முன்னேற்றத்துக்கு அடித்தளம் அமைத்தவர்களில் ஒருவரான டாக்டர் ஹண்டே, பொது சுகாதாரம், மருத்துவக் கல்வி மற்றும் மருத்துவ சேவையில் தொடர்ந்து அர்ப்பணிப்புடன் செயல்பட்டு வருபவர்.

இதையும் படிங்க: 66 பேருக்கு பத்ம விருதுகள்! இன்று வழங்கி கவுரவிக்கிறார் ஜனாதிபதி திரவுபதி முர்மு!

ஜனாதிபதி திரௌபதி முர்முவிடமிருந்து விருதை பெற்றுக்கொண்ட அவர், இந்த கௌரவம் தனது வாழ்நாள் சேவைக்குக் கிடைத்த அங்கீகாரம் என உணர்வுகளைப் பகிர்ந்துகொண்டார். இந்த விருதுகள் நாட்டின் பல்வேறு மாநிலங்கள் மற்றும் துறைகளைச் சேர்ந்த சாதனையாளர்களை ஊக்குவிப்பதுடன், இளைஞர்களுக்கு உத்வேகம் அளிக்கும் வகையில் அமைந்துள்ளன. 

பத்ம விருதுகள் ஒவ்வொரு ஆண்டும் குடியரசு தினத்தை முன்னிட்டு அறிவிக்கப்படுவது வழக்கம். இந்த ஆண்டு ஒப்புதல் அளிக்கப்பட்ட மொத்த 131 விருதுகளில் பல துறைகளைச் சேர்ந்த முக்கிய பிரமுகர்கள் இடம்பெற்றுள்ளனர். இந்த விழா இந்தியாவின் பாரம்பரிய கலாச்சாரத்தையும், சாதனையாளர்களுக்கு அளிக்கப்படும் மரியாதையையும் பிரதிபலிக்கிறது. விருது பெற்ற அனைவருக்கும் பொதுமக்களின் வாழ்த்துகள் குவிந்து வருகின்றன. 

இதையும் படிங்க: பத்ம விருதுகள் 2027: விண்ணப்பிக்க ஜூலை 31 கடைசி நாள் - மத்திய அரசு முக்கிய அறிவிப்பு!''