மதுரை மீனாட்சி அம்மன் கோவில் குடமுழுக்கு தொடர்பான வழக்கில் சமீபத்தில் வெளியான நீதிமன்றத் தீர்ப்பை படித்ததாக முன்னாள் அமைச்சர் பிடிஆர் பழனிவேல் தியாகராஜன் தெரிவித்துள்ளார். இந்த விவகாரம் குறித்து இதுவரை அமைதியாக இருந்ததாக கூறிய அவர், தற்போது உண்மையின் பொருட்டு கருத்து தெரிவிக்க வேண்டிய நிலை ஏற்பட்டுள்ளதாக தனது எக்ஸ் தளப் பதிவில் குறிப்பிட்டுள்ளார்.

மீனாட்சி அம்மன் கோவில் குடமுழுக்கு தொடர்பான வழக்கு நீதிமன்றத்தில் விசாரணைக்கு வந்தபோது, இந்து சமய அறநிலையத்துறை அமைச்சர் மற்றும் அதிகாரிகள் குறித்து நீதிபதிகள் வாய்மொழியாக சில கண்டனங்களை தெரிவித்ததாக ஊடகங்களில் செய்திகள் வெளியாகியிருந்தன. இந்த நிலையில், அந்த அமைச்சர் மற்றும் அதிகாரிகள் இந்த விவகாரத்தின் உண்மையான குற்றவாளிகள் அல்ல என பிடிஆர் பழனிவேல் தியாகராஜன் தெரிவித்துள்ளார்.

அதிகபட்சமாக அவர்கள் செய்த தவறு, தகுதியற்ற மற்றும் சந்தர்ப்பவாதமான ஒருவரிடம் தேவையற்ற அளவுக்கு பணிந்து நடந்துகொண்டதுதான் என அவர் கடுமையாக விமர்சித்துள்ளார். எனினும், தனது பதிவில் குறிப்பிட்ட அந்த நபரின் பெயரை பிடிஆர் வெளிப்படையாக குறிப்பிடவில்லை.

இதையும் படிங்க: மதுரை மீனாட்சி அம்மன் கோயில் கும்பாபிஷேகம்: அன்னதானம் வழங்குபவர்களுக்கு புதிய ரூல்ஸ்!

தான் பொதுவாழ்வில் இருந்த அனைத்து ஆண்டுகளிலும், இந்த விவகாரத்தில் முக்கிய நபராக தான் கருதும் ஒருவரின் செயல்பாடுகள் மீது கடும் அதிருப்தி கொண்டிருந்ததாகவும், அதன் காரணமாக அவரிடம் இருந்து விலகியே இருக்க முயன்றதாகவும் பிடிஆர் தெரிவித்துள்ளார்.

Just read the recently issued judgment on the Meenakshi Amman Temple Kumbabishegam Case.

So far I have tried to stay detached from the matter for multiple reasons. One of them being that I have found the malodor of the main culprit very distasteful for all the years I have been… pic.twitter.com/SO4YGovndi

— Dr P Thiaga Rajan (PTR) (@ptrmadurai) September 4, 2026

மேலும், மீனாட்சி அம்மன் கோவில் அறங்காவலர் குழுவில் இடம்பெற்றுள்ள மூன்று பெண் அறங்காவலர்கள் குறித்து அவர் பாராட்டு தெரிவித்துள்ளார். சட்ட விதிகளின்படியும், ஏற்கனவே வழங்கப்பட்ட நீதிமன்றத் தீர்ப்புகளின் அடிப்படையிலும் தங்களுக்கு இருந்த உரிமைகளுக்காக அவர்கள் உறுதியாக நின்றதாக பிடிஆர் குறிப்பிட்டுள்ளார்.

அதேநேரத்தில், இரண்டு ஆண் அறங்காவலர்கள் நீதிமன்றத்திலேயே தங்களுடைய உரிமைகளை உடனடியாக விட்டுக்கொடுத்ததாகவும், பின்னர் அந்த உரிமைகள் மீண்டும் நிலைநாட்டப்படுவதற்கு பெண் அறங்காவலர்களின் உறுதியான நிலைப்பாடே காரணமாக இருந்ததாகவும் அவர் தெரிவித்துள்ளார்.

இரண்டு ஆண் அறங்காவலர்கள் குறித்து இதற்கு மேல் கூறுவதற்கு ஒன்றுமில்லை என்றும், அவர்களைப் பற்றி பேசாமல் இருப்பதே நல்லது என்றும் பிடிஆர் தனது பதிவில் கடுமையாக குறிப்பிட்டுள்ளார்.

மீனாட்சி அம்மன் கோவில் குடமுழுக்கு வழக்கு தொடர்பான நீதிமன்றத் தீர்ப்பு மற்றும் அதனைத் தொடர்ந்து பிடிஆர் வெளியிட்டுள்ள இந்தக் கருத்து தற்போது அரசியல் மற்றும் கோவில் நிர்வாக வட்டாரங்களில் கவனம் பெற்றுள்ளது.

இதையும் படிங்க: மதுரை, பழநி கோயில் நிலமோசடி வழக்கில் கைதான 2 அதிகாரிகளுக்கு அடுத்தடுத்து நெஞ்சுவலி! திடீர் ட்விஸ்ட்