புதுச்சேரியில் தேசிய ஜனநாயக கூட்டணி ஆட்சியமைத்து ஒரு மாதத்திற்கும் மேலாகியும் அமைச்சர்களுக்கான துறை ஒதுக்கீடு இன்னும் இறுதி செய்யப்படாதது அரசியல் வட்டாரங்களில் பரபரப்பை ஏற்படுத்தியுள்ளது. இதனால் புதிய அரசின் நிர்வாக நடவடிக்கைகள் முழுமையாக தொடங்க முடியாத நிலை ஏற்பட்டுள்ளதாக கூறப்படுகிறது.

சமீபத்தில் நடைபெற்ற சட்டசபைத் தேர்தலுக்குப் பிறகு, தேசிய ஜனநாயக கூட்டணி புதுச்சேரியில் ஆட்சியை கைப்பற்றியது. இதையடுத்து, மே 13-ஆம் தேதி என்.ஆர். காங்கிரஸ் தலைவர் ரங்கசாமி முதலமைச்சராக பதவியேற்றார். அவருடன் பாஜகவைச் சேர்ந்த நமச்சிவாயம் மற்றும் என்.ஆர். காங்கிரஸின் மல்லாடி கிருஷ்ணாராவ் உள்ளிட்டோர் அமைச்சர்களாக பதவியேற்றனர். எனினும், பதவியேற்று பல வாரங்கள் கடந்தும் அவர்களுக்கு எந்த துறைகளும் ஒதுக்கப்படவில்லை.

பின்னர், அமைச்சரவை விரிவாக்கத்தின் ஒரு பகுதியாக என்.ஆர். காங்கிரஸைச் சேர்ந்த ராஜவேலு, சிவக்கொழுந்து மற்றும் பாஜகவைச் சேர்ந்த ராஜசேகரன் ஆகியோர் அமைச்சர்களாக பதவியேற்றனர். அமைச்சரவை முழுமையடைந்த நிலையில், துறை ஒதுக்கீடு உடனடியாக அறிவிக்கப்படும் என எதிர்பார்க்கப்பட்டது. ஆனால் அதுவும் நடைபெறாததால் அரசியல் குழப்பம் நீடித்து வருகிறது.

இதையும் படிங்க: முக்கிய துறைகளை குறி வைக்கும் பாஜக! இலாகா ஒதுக்குவதில் நீடிக்கும் இழுபறி! புதுவை அரசியலில் புயல்!

கூட்டணியில் இடம்பெற்றுள்ள என்.ஆர். காங்கிரஸ் மற்றும் பாஜக இடையே முக்கிய துறைகள் தொடர்பாக கருத்து வேறுபாடு நிலவுவதாக தகவல்கள் வெளியாகியுள்ளன. குறிப்பாக உள்துறை, நிதித்துறை மற்றும் பொதுப்பணித்துறை போன்ற முக்கிய பொறுப்புகளை யார் வசம் வைத்துக் கொள்வது என்பது தொடர்பாக இரு கட்சிகளுக்கும் இடையே இழுபறி நீடிப்பதாக கூறப்படுகிறது.

இந்த நிலையில், பாஜக புதுச்சேரி மாநில பொறுப்பாளர் நிர்மல் குமார் சுரானா சமீபத்தில் முதலமைச்சர் ரங்கசாமியை சந்தித்து ஆலோசனை நடத்தியது அரசியல் முக்கியத்துவம் பெற்றது. அந்த சந்திப்புக்குப் பிறகு துறை ஒதுக்கீடு தொடர்பாக முடிவு வெளியாகும் என எதிர்பார்க்கப்பட்ட நிலையில், அது மரியாதை நிமித்தமான சந்திப்பு மட்டுமே என முதலமைச்சர் விளக்கம் அளித்தார்.

இதற்கிடையில், கூட்டணிக்குள் நிலவும் கருத்து வேறுபாடுகள் காரணமாக துறை ஒதுக்கீடு தொடர்ந்து தாமதமாகி வருவதாக அரசியல் வட்டாரங்கள் தெரிவிக்கின்றன. முழுமையான நிர்வாக அமைப்பு இன்னும் செயல்பாட்டிற்கு வராததால், அரசின் பல முக்கிய முடிவுகள் காத்திருப்பில் உள்ளதாகவும் கூறப்படுகிறது.

இதையும் படிங்க: முக்கிய துறைகளை குறி வைக்கும் பாஜக! இலாகா ஒதுக்குவதில் நீடிக்கும் இழுபறி! புதுவை அரசியலில் புயல்!