இந்தியா மற்றும் ரஷ்யா இடையிலான உறவு தொடர்ந்து வலுவாக இருப்பதாக ரஷ்ய அதிபர் விளாடிமிர் புடின் தெரிவித்துள்ளார். இந்தியா - அமெரிக்கா உறவுகள் வளர்ந்தாலும், அதனால் ரஷ்யாவுடனான நட்புறவுக்கு எந்த பாதிப்பும் ஏற்படாது என்றும் அவர் தெளிவுபடுத்தியுள்ளார்.

செய்தியாளர்களிடம் பேசிய புடின், இந்தியா ரஷ்யாவின் முக்கியமான மற்றும் நம்பகமான கூட்டாளி நாடாக இருப்பதாக கூறினார். உலகின் வேகமாக வளர்ந்து வரும் பொருளாதாரங்களில் ஒன்றாக இந்தியா திகழ்வதாகவும், எதிர்காலத்தில் இந்தியா - ரஷ்யா வர்த்தக உறவுகள் மேலும் விரிவடையும் என்றும் நம்பிக்கை தெரிவித்தார்.

இரு நாடுகளுக்கிடையேயான வர்த்தக மதிப்பு எதிர்காலத்தில் 100 பில்லியன் அமெரிக்க டாலரை எட்டும் வாய்ப்பு இருப்பதாகவும் அவர் கூறினார். இந்தியா மற்ற நாடுகளுடன் வைத்திருக்கும் இருதரப்பு உறவுகள் ரஷ்யாவுக்கு எந்தவித பாதகமான விளைவுகளையும் ஏற்படுத்தவில்லை என்றும் புடின் குறிப்பிட்டார்.

இதையும் படிங்க: எனக்கு மோடியை ரொம்ப புடிக்கும்! நல்ல நண்பர்! விரைவில் ஒப்பந்தம் கையெழுத்தாகும் என அதிபர் ட்ரம்ப் நம்பிக்கை!

பிரதமர் நரேந்திர மோடிக்கு வெளிநாடுகள் அழுத்தம் கொடுக்க முயன்றாலும் அதனால் எந்த பலனும் கிடைக்காது எனவும் அவர் தெரிவித்தார். இந்தியா தனது தேசிய நலன்களை அடிப்படையாகக் கொண்டு முடிவுகளை எடுக்கும் நாடு என்றும் புடின் பாராட்டினார்.

மேலும் பாதுகாப்பு மற்றும் ராணுவ துறைகளில் இந்தியாவுடன் ரஷ்யா தொடர்ந்து இணைந்து செயல்பட்டு வருவதாகவும் அவர் கூறினார். குறிப்பாக பிரம்மோஸ் ஏவுகணை திட்டம் இரு நாடுகளின் ஒத்துழைப்புக்கு சிறந்த உதாரணம் என்றும் தெரிவித்தார்.

அதேபோல், நவீன Su-57 போர் விமான தொழில்நுட்பத்தில் இணைந்து பணியாற்ற இந்தியாவுக்கு ரஷ்யா முன்மொழிவு வழங்கியுள்ளதாகவும், இந்த துறையில் ஒத்துழைப்பை மேலும் வலுப்படுத்த தயாராக இருப்பதாகவும் புடின் கூறினார்.

சீனா, அமெரிக்கா, இந்தியா மற்றும் ரஷ்யா ஆகிய நாடுகள் உலகின் முன்னணி பொருளாதார சக்திகளாக இருப்பதாகவும் அவர் குறிப்பிட்டார். சீன அதிபர் ஷி ஜின்பிங் மற்றும் பிரதமர் மோடி ஆகியோர் இரு நாடுகளுக்கிடையேயான பிரச்சினைகளை பேச்சுவார்த்தை மூலம் தீர்க்க முயற்சி செய்து வருவதாகவும் புடின் தெரிவித்தார்.

புடினின் இந்த கருத்துகள், இந்தியா - ரஷ்யா உறவுகள் எதிர்காலத்திலும் வலுவாக தொடரும் என்ற சிக்னலாக பார்க்கப்படுகின்றன.

இதையும் படிங்க: உஷாரா இருந்துக்குங்க!! முதல்வர் விஜய்க்கு பிரதமர் மோடி அட்வைஸ்! டெல்லி சந்திப்பில் நடந்த சுவாரஸ்யம்!