பெங்களூரு: தொழிலதிபர் கவுதம் அதானியை பிரதமர் நரேந்திர மோடியுடன் தொடர்புபடுத்தி காங்கிரஸ் மூத்த தலைவர் ராகுல் காந்தி தொடர்ந்து விமர்சித்து வரும் நிலையில், கர்நாடக முதல்வர் டி.கே. சிவகுமார் அதானியை சந்தித்திருப்பது அரசியல் வட்டாரத்தில் விவாதத்தை ஏற்படுத்தியுள்ளது.

கர்நாடகாவில் காங்கிரஸ் ஆட்சி நடைபெற்று வரும் நிலையில், சமீபத்தில் டெல்லி சென்ற முதல்வர் சிவகுமார், மக்களவை எதிர்க்கட்சித் தலைவர் ராகுல் காந்தியை சந்தித்துப் பேசினார். அப்போது கட்சி மற்றும் மாநிலம் தொடர்பான பல்வேறு விஷயங்கள் குறித்து ஆலோசிக்கப்பட்டதாக கூறப்படுகிறது. அதானி குழுமம் தொடர்பான விவகாரங்கள் குறித்தும் ராகுல் விளக்கம் கேட்டதாக தகவல் வெளியாகியுள்ளது.

இதற்கிடையே, கடந்த 23-ம் தேதி பெங்களூருவில் உள்ள முதல்வர் சிவகுமாரின் இல்லத்துக்கு தொழிலதிபர் கவுதம் அதானி சென்றதாக கூறப்படுகிறது. இருவரும் கர்நாடகாவில் முதலீடு செய்வது உள்ளிட்ட விவகாரங்கள் தொடர்பாக ஆலோசனை நடத்தியதாக தகவல்கள் தெரிவிக்கின்றன.

இதையும் படிங்க: முதல்வர் விஜய்யா? ராகுல் காந்தியா? 2029-ல் பிரதமர் யார்? அமைச்சர் விஸ்வநாதன் அதிரடி பேச்சு!

இந்த சந்திப்பு குறித்து விளக்கம் அளித்த சிவகுமார், இது தனிப்பட்ட சந்திப்பு அல்ல என்றும், கர்நாடக முதல்வர் என்ற முறையில் மாநிலத்தில் அதானி குழுமம் மேற்கொள்ள உள்ள முதலீடுகள் தொடர்பாக ஆலோசனை நடத்தப்பட்டதாகவும் ராகுலிடம் தெரிவித்ததாக கூறப்படுகிறது.

இதனிடையே, பெங்களூருவின் சில்க் போர்டு பகுதியில் இருந்து ஹெப்பால் வரை சுரங்கப்பாதை அமைக்கும் மிகப்பெரிய திட்டத்தை கர்நாடக அரசு முன்னெடுத்து வருகிறது. சுமார் ரூ.22,276 கோடி மதிப்பிலான இந்தத் திட்டம் நகரின் போக்குவரத்து நெரிசலுக்கு தீர்வு காணும் நோக்கத்தில் உருவாக்கப்பட்டுள்ளதாக தெரிவிக்கப்பட்டுள்ளது.

திட்டத்துக்கான டெண்டர் நடவடிக்கையில் பல நிறுவனங்கள் பங்கேற்ற நிலையில், அதானி குழுமம் குறைந்த தொகையில் பணியை மேற்கொள்ள முன்வந்துள்ளதாக தகவல்கள் தெரிவிக்கின்றன. இதனால் திட்டம் தொடர்பாக அதானி குழுமத்தின் பெயர் முக்கியமாக பேசப்படுகிறது.

ஆனால், இந்த சுரங்கப்பாதை திட்டம் குறித்து சில வல்லுநர்கள் மாறுபட்ட கருத்துகளை தெரிவித்துள்ளனர். தற்போதைய போக்குவரத்து நெரிசலுக்கு தீர்வு கிடைத்தாலும், எதிர்காலத்தில் மீண்டும் நெரிசல் ஏற்படக்கூடும் என்பதே அவர்களின் கருத்தாக கூறப்படுகிறது.

இந்நிலையில், காங்கிரஸ் ஆளும் மாநிலத்தில் அதானி குழுமத்துடன் அரசு மேற்கொள்ளும் தொடர்புகளை பா.ஜ.க. அரசியல் ரீதியாக விமர்சித்து வருகிறது. தெலுங்கானாவிலும் அதானி குழுமம் முதலீடு செய்துள்ளதை சுட்டிக்காட்டி, காங்கிரஸின் அதானி எதிர்ப்பு நிலைப்பாட்டை பா.ஜ.க. கேள்வி எழுப்பி வருகிறது.

இதனால், ராகுல் காந்தியின் அதானி எதிர்ப்பு அரசியலுக்கும், காங்கிரஸ் ஆளும் மாநில அரசுகளின் முதலீட்டு அணுகுமுறைக்கும் இடையே முரண்பாடு உள்ளதா என்ற விவாதம் தற்போது தீவிரமடைந்துள்ளது.

இதையும் படிங்க: காங்., தலைவர் கார்கேவுக்கு அவமரியாதை? கொந்தளித்த ராகுல் காந்தி! வழக்குபதிவு செய்ய கோரிக்கை!