நாடு முழுவதும் பெட்ரோல் மற்றும் டீசல் விலைகள் லிட்டருக்கு தலா ₹3 உயர்த்தப்பட்டுள்ளன. இந்த அதிரடி முடிவால் சென்னையில் பெட்ரோல் ஒரு லிட்டர் ₹103.98-க்கும், டீசல் ₹95.50-க்கும் விற்பனை செய்யப்படுகிறது. கச்சா எண்ணெய் விலை உயர்வு மற்றும் சர்வதேச சந்தை நிலவரங்களை காரணமாகக் காட்டி எண்ணெய் நிறுவனங்கள் இந்த விலை உயர்வை அமல்படுத்தியுள்ளன. 

கடந்த சில மாதங்களாக மத்திய கிழக்கில் நிலவும் பதற்றமான சூழல் மற்றும் போர் நிலைமைகள் காரணமாக உலக சந்தையில் கச்சா எண்ணெய் விலை கணிசமாக உயர்ந்தது. அமெரிக்க டாலருக்கு நிகரான இந்திய ரூபாயின் மதிப்பில் ஏற்பட்ட ஏற்ற இறக்கங்களும் இதற்கு கூடுதல் பங்களிப்பு செய்தன. இந்த நிலையில் பெட்ரோல் மற்றும் டீசல் விலை உயர்வு எதிர்பார்க்கப்பட்டாலும், ஐந்து மாநிலங்களில் சட்டமன்றத் தேர்தல் நடைபெற்று வந்ததால் மத்திய அரசு விலை உயர்வை ஒத்திவைத்திருந்தது. 

தேர்தல் முடிவடைந்த உடனேயே இந்த உயர்வு அறிவிக்கப்பட்டுள்ளது. இந்த விலை உயர்வு போக்குவரத்து, லாரி, பேருந்து, ஆட்டோ உள்ளிட்ட அத்தியாவசிய போக்குவரத்து சேவைகளின் கட்டணத்தை உயர்த்தும் என எதிர்பார்க்கப்படுகிறது. இதனால் காய்கறி, பழங்கள், பால் உள்ளிட்ட அத்தியாவசியப் பொருட்களின் விலையும் பாதிக்கப்படும் சூழல் உருவாகியுள்ளது. ஏற்கெனவே பணவீக்க அழுத்தத்தில் தவிக்கும் நடுத்தர மற்றும் ஏழை மக்களுக்கு இது கூடுதல் சுமையாக அமையும் என்று பொருளாதார நிபுணர்கள் கவலை தெரிவிக்கின்றனர்.

இதையும் படிங்க: தங்கம் வாங்காதீங்க.. பிரதமர் மோடியின் மக்கள் தியாக வேண்டுகோள்..!! ராகுல் காந்தி கடும் எதிர்ப்பு..!!

காங்கிரஸ் மூத்த தலைவர் ராகுல் காந்தி இந்த முடிவுக்கு கடும் கண்டனம் தெரிவித்துள்ளார். எக்ஸ் தளத்தில் அவர் வெளியிட்ட பதிவில், “மத்திய அரசின் தவறான கொள்கைகளுக்கும் நிர்வாக சோர்வுக்கும் பொதுமக்கள்தான் விலை கொடுக்க வேண்டியிருக்கிறது. பெட்ரோல், டீசல் லிட்டருக்கு ₹3 உயர்வு எனும் அதிர்ச்சி ஏற்கனவே வந்துவிட்டது. மீதமுள்ள தொகையை தவணை முறையில் வசூலித்துக் கொள்வார்கள்” என்று விமர்சித்துள்ளார்.

எண்ணெய் இறக்குமதியில் பெரும்பாலும் அந்நியச் சார்பு கொண்டுள்ள இந்தியா போன்ற நாடுகளுக்கு சர்வதேச கச்சா எண்ணெய் விலை ஏற்றம் எப்போதும் சவாலாகவே உள்ளது. அரசு வரி விகிதங்கள், எண்ணெய் நிறுவனங்களின் லாப நோக்கு, சர்வதேச சந்தை ஏற்ற இறக்கம் ஆகிய பல்வேறு காரணிகள் விலை நிர்ணயத்தில் தீர்மானகரமான பங்கு வகிக்கின்றன. 

இந்த விலை உயர்வு விவசாயிகள், சிறு வியாபாரிகள், தினசரி கூலி தொழிலாளர்கள் உள்ளிட்ட பொதுமக்களின் அன்றாட வாழ்க்கையை பாதிக்கும் என்பதால், அரசு மாற்று நடவடிக்கைகளை எடுக்க வேண்டும் என்ற கோரிக்கை எழுந்துள்ளது. மத்திய அரசு இந்த உயர்வை உடனடியாக மறு பரிசீலனை செய்ய வேண்டும் என எதிர்க்கட்சிகள் வலியுறுத்தி வருகின்றன.

இதையும் படிங்க: புதிய தலைமுறை; புதிய குரல்..!! தமிழக முதல்வர் விஜய்க்கு ராகுல் காந்தி வாழ்த்து..!!