சோப்பு, ஷாம்பூ, டூத்பேஸ்ட் உள்ளிட்ட அன்றாட பயன்பாட்டு பொருட்களை வாங்கும்போது, அவை சைவ வகையைச் சேர்ந்ததா அல்லது அசைவ மூலப்பொருட்கள் பயன்படுத்தப்பட்டுள்ளதா என்பதை பாக்கெட்டில் இருக்கும் குறியீடு மூலம் தெரிந்து கொள்ளும் வகையில் புதிய பேக்கேஜிங் விதி அமலுக்கு வந்துள்ளது.
மத்திய நுகர்வோர் விவகாரத்துறை, சட்ட அளவியல் (பொட்டலப் பொருட்கள்) விதிகள், 2011-ல் புதிய திருத்தத்தை அறிவித்துள்ளது. செப்டம்பர் 21, 2026 அன்று வெளியிடப்பட்ட இந்த அறிவிப்பு, வெளியான நாளிலேயே அமலுக்கு வந்ததாக குறிப்பிடப்பட்டுள்ளது.
இதன்படி, சோப்பு, ஷாம்பூ, டூத்பேஸ்ட் மட்டுமின்றி குறிப்பிட்ட அழகு சாதனங்கள் மற்றும் தனிநபர் பராமரிப்பு பொருட்களின் பேக்கேஜிங்கிலும் அவற்றின் மூலப்பொருள் தன்மையை குறிப்பிடும் வண்ணக் குறியீடு இடம்பெற வேண்டும். சைவ மூலப்பொருட்களைக் கொண்ட பொருட்களுக்கு பச்சை நிற புள்ளி பயன்படுத்தப்பட வேண்டும். அசைவ மூலப்பொருட்கள் உள்ள பொருட்களுக்கு சிவப்பு அல்லது பழுப்பு நிற புள்ளி பயன்படுத்த வேண்டும்.
இதையும் படிங்க: சென்னைக்கு வருகிறது 840 டன் வெங்காயம்! கிலோ ரூ.35க்கு விற்க மத்திய அரசு அதிரடி! விலை உயர்வுக்கு செக்!
இந்த குறியீடு பொருளின் பாக்கெட்டின் முக்கிய காட்சிப் பகுதியில், அதாவது நுகர்வோர் எளிதில் பார்க்கக்கூடிய முன்பக்கத்தின் மேற்பகுதியில் இடம்பெற வேண்டும் என விதிகளில் குறிப்பிடப்பட்டுள்ளது. இதனால் கடைகளில் பொருட்களை வாங்கும்போது, நீண்ட நேரம் லேபிளை தேடாமல் குறியீட்டை பார்த்து அதன் தன்மையை அறிந்து கொள்ள முடியும்.
உணவுப் பொருட்களின் பேக்கெட்டுகளில் சைவம் மற்றும் அசைவத்தை அடையாளப்படுத்தும் வண்ணக் குறியீடுகள் ஏற்கனவே பயன்படுத்தப்பட்டு வருகின்றன. தற்போது இதேபோன்ற அடையாள முறையை சோப்பு, ஷாம்பூ, டூத்பேஸ்ட் உள்ளிட்ட தனிநபர் பயன்பாட்டு பொருட்களுக்கும் கொண்டு வருவதற்கான விதி நடைமுறைக்கு வந்துள்ளது.
இந்த மாற்றத்தின் முக்கிய நோக்கம், ஒரு பொருளை வாங்குவதற்கு முன்பே அதன் மூலப்பொருள் சார்ந்த தன்மையை நுகர்வோர் எளிதாக அறிந்து கொள்ள உதவுவதாகும். குறிப்பாக மதம், தனிப்பட்ட நம்பிக்கை அல்லது வாழ்க்கை முறையின் அடிப்படையில் குறிப்பிட்ட வகை பொருட்களைத் தேர்வு செய்பவர்களுக்கு இந்த குறியீடு கூடுதல் தகவலை வழங்கும்.
எனவே இனி சோப்பு, ஷாம்பூ அல்லது டூத்பேஸ்ட் வாங்கும்போது விலை மற்றும் பிராண்டை மட்டும் பார்க்காமல், பாக்கெட்டின் மேல் பகுதியில் இடம்பெறும் பச்சை, சிவப்பு அல்லது பழுப்பு நிற புள்ளியையும் கவனிப்பது முக்கியமாகியுள்ளது.
இதையும் படிங்க: 8 ஆண்டுகள்... 60 கோடி பேர்! ரூ.5 லட்சம் இலவச மருத்துவக் காப்பீடு! ஆயுஷ்மான் பாரத் குறித்து பிரதமர் மோடி பெருமிதம்!