அதிமுகவில் மீண்டும் உட்கட்சி பரபரப்பு அதிகரித்துள்ள நிலையில், முன்னாள் அமைச்சர் எஸ்.பி. வேலுமணி, தனக்கு வழங்கப்பட்ட பதவியை விட தன்னுடன் இருந்த நிர்வாகிகளுக்கு உரிய பொறுப்புகள் வழங்கப்பட வேண்டும் என்று வலியுறுத்தியுள்ளார். கோவையில் தனது ஆதரவாளர்களுடன் நடைபெற்ற ஆலோசனைக் கூட்டத்தில் அவர் பேசிய கருத்துகள் கட்சிக்குள் புதிய அரசியல் விவாதத்தை ஏற்படுத்தியுள்ளன.

சட்டப்பேரவைத் தேர்தலுக்குப் பிறகு எதிர்க்கட்சி அந்தஸ்தை இழந்த அதிமுகவில் பல்வேறு கருத்து வேறுபாடுகள் உருவாகின. தவெக உடனான கூட்டணி விவகாரம் உள்ளிட்ட பல காரணங்களை முன்வைத்து, எஸ்.பி. வேலுமணி, சி.வி. சண்முகம் உள்ளிட்ட முக்கிய நிர்வாகிகள் எடப்பாடி பழனிசாமியின் தலைமையை விமர்சித்தனர். இதையடுத்து கட்சி நடவடிக்கையாக சிலரின் பதவிகள் பறிக்கப்பட்டன.

பின்னர் ஏற்பட்ட அரசியல் மாற்றங்களால் இரு தரப்புக்கும் இடையே சமரசம் ஏற்பட்டது. அதன் தொடர்ச்சியாக, எஸ்.பி. வேலுமணிக்கு துணைப் பொதுச்செயலாளர் பதவி வழங்கப்பட்டது. இருப்பினும், அவர் முன்பு வகித்த மாவட்டச் செயலாளர் பொறுப்பு மீண்டும் வழங்கப்படவில்லை. இதுவே தற்போது மீண்டும் அதிருப்திக்கு காரணமாக இருப்பதாக கூறப்படுகிறது.

இதையும் படிங்க: தவெகவில் இணைவும் விஜய பாஸ்கர்கள்!!! ஜூலையில் தேதி குறிச்சாச்சு!! அதிமுகவில் தொடரும் அதிருப்தி!

ஆலோசனைக் கூட்டத்தில் பேசிய எஸ்.பி. வேலுமணி, தனக்கு பதவி கிடைப்பது முக்கியமல்ல என்றும், தன்னை நம்பி வந்த நிர்வாகிகளுக்கு உரிய அங்கீகாரம் கிடைக்க வேண்டும் என்பதே தனது நிலைப்பாடு என்றும் தெரிவித்தார். “நான் மட்டும் பதவியை ஏற்றுக்கொள்ள தயாராக இல்லை. என்னுடன் 30-க்கும் மேற்பட்ட மாவட்டத் தலைவர்கள் வந்துள்ளனர். அவர்களுக்கு எந்தப் பொறுப்பும் வழங்கப்படவில்லை. அவர்கள் இல்லாமல் நான் மட்டும் பதவியில் இருப்பது சரியாக இருக்காது” என்று அவர் கூறினார்.

மேலும், வீரமணி, தங்கமணி, விஜயபாஸ்கர், சி.வி. சண்முகம் உள்ளிட்டோர் கட்சிக்காக பல ஆண்டுகள் உழைத்தவர்கள் என்றும், கட்சியை வளர்ப்பதற்காக தங்களது நேரத்தையும் வளங்களையும் செலவிட்டவர்கள் என்றும் அவர் குறிப்பிட்டார். அத்தகைய மூத்த தலைவர்களுக்கு உரிய முக்கியத்துவம் வழங்கப்படவில்லை என்ற ஆதங்கத்தையும் வெளிப்படுத்தினார்.

எஸ்.பி. வேலுமணியின் இந்தக் கருத்துகள் அதிமுகவில் மீண்டும் உட்கட்சி விவாதத்தை தீவிரப்படுத்தியுள்ளன. அவரது கோரிக்கைக்கு கட்சித் தலைமை என்ன பதில் அளிக்கிறது, அதிருப்தியில் உள்ள நிர்வாகிகளுக்கு புதிய பொறுப்புகள் வழங்கப்படுமா என்பதைக் கட்சித் தொண்டர்கள் மற்றும் அரசியல் வட்டாரங்கள் உன்னிப்பாக கவனித்து வருகின்றன.

இதையும் படிங்க: அதிமுகவில் அடுத்த மேஜர் விக்கெட்! தவெக தாவ தயாராகும் கே.சி.பழனிசாமி! ஆதரவாளர்களுடன் ஆலோசனை!