யார் தலைவர் என்பதே தெரியவில்லை! அதிமுக, நாம் தமிழர் கட்சிகளை சாடிய தவெக நிர்மல் குமார்!

தமிழக வெற்றி கழகத்தின் (தவெக) சார்பில் 2026 சட்டமன்றத் தேர்தலில் போட்டியிடும் வேட்பாளர்களுக்கான இரண்டாம் கட்ட நேர்காணல் இன்று சென்னை பனையூர் தலைமையகத்தில் நடைபெற்றது. இதில் தேர்வு செய்யப்பட்டவர்களின் பட்டியலைத் தலைவர் விஜய் இறுதி செய்துள்ள நிலையில், கட்சியின் இணை பொதுச் செயலாளர் சி.டி.ஆர். நிர்மல் குமார் செய்தியாளர்களைச் சந்தித்துப் பேசினார்.

தமிழகத்திலும் புதுவையிலும் தேர்தல் பணிகளைத் தலைவர் விஜய் முடுக்கி விட்டுள்ளார். களம் எங்களுக்கு 100 சதவீதம் சாதகமாக உள்ளது என அவர் நம்பிக்கை தெரிவித்தார். புதுச்சேரியில் வரும் திங்கட்கிழமை (மார்ச் 23) தவெக வேட்பாளர்கள் வேட்புமனுத் தாக்கல் செய்வார்கள். இதற்கான பட்டியலை விஜய் ஏற்கனவே இறுதி செய்து வைத்துள்ளார். சமூக வலைதளங்களில் வெளியாகும் உத்தேசப் பட்டியல்களை நம்ப வேண்டாம் என்றும், அதிகாரப்பூர்வப் பட்டியலைத் தலைவர் விஜய் விரைவில் வெளியிடுவார் என்றும் அவர் குறிப்பிட்டார்.

கூட்டணி பேச்சுவார்த்தையை டெல்லி சென்று நடத்தும் அளவிற்கு அதிமுக-வின் நிலைமை மோசமாகிவிட்டது. தமிழகத்தில் தேசிய ஜனநாயகக் கூட்டணிக்குத் (NDA) தலைமை யார் என்பதே தெரியாத குழப்ப நிலை நீடிக்கிறது எனச் சாடினார். திமுக பல கட்சிகளைத் தனது வண்டியில் ஏற்றிக்கொண்டு தேர்தலைச் சந்திக்கிறது. ஆனால், சென்னையில் கூட திமுக-விற்குச் சாதகமான சூழல் இல்லை. சேகர் பாபு போன்ற மூத்த அமைச்சர்களே பாதுகாப்பான வேறு தொகுதிகளைத் தேடி வருகின்றனர் என்றார்.

இதையும் படிங்க: யாருமின்றி தனியாக மும்பை சென்ற விஜய்! ரகசிய திட்டமா? குடும்ப விழாவா? சென்னை விமான நிலையத்தில் பரபரப்பு!

சிபிஐ என்ன கேள்விகள் கேட்டது என்பது எங்களுக்குத் தெரியும். கரூர் சம்பவம் தொடர்பாக சிபிஐ கேட்ட அனைத்து ஆதாரங்களையும் விஜய் முறையாகக் கொடுத்துள்ளார் எனத் தெரிவித்தார்.கரூர் சம்பவத்தை வைத்து அரசியல் செய்ய நினைப்பவர்களுக்கு மக்கள் தகுந்த பதிலடி கொடுப்பார்கள். அடிப்படை அறிவற்ற சில புரோக்கர்கள் அரசியல் காழ்ப்புணர்வு காரணமாகவே இதனைக் கையில் எடுக்கிறார்கள் என ஆவேசமாகப் பேசினார்.

மற்றொரு கட்சியைக் (நாம் தமிழர் கட்சி) குறித்து மறைமுகமாகக் குறிப்பிட்ட அவர், அங்கு யார் தலைவர் என்றே தெரியாத நிலை இருக்கிறது என விமர்சித்தார்.

இதையும் படிங்க: நம்மளோட தலைமையில்தான் ஆட்சி! இஃப்தார் விருந்தில் வதந்திகளுக்கு முற்றுப்புள்ளி வைத்த விஜய்!