முதலமைச்சர் எப்படியோ, அமைச்சர்களும் அப்படியே!  சென்னை அண்ணா அறிவாலயத்தில் சிவசங்கர் பேட்டி!

தமிழகத்தில் நாள்தோறும் நிலவி வரும் மின்கட்டணக் குளறுபடிகள் குறித்துக் கேட்கப்படும் கேள்விகளுக்குப் பதிலும் சொல்லாமல், தன் துறை பற்றிய அடிப்படைத் தகவல்களையும் தெரிந்து கொள்ளாமல் மின்துறை அமைச்சர் நிர்மல்குமார் பொறுப்பற்ற முறையில் பேசி வருகிறார் என்று மின்சாரத் துறை முன்னாள் அமைச்சரும் திமுக சட்டமன்ற உறுப்பினருமான சிவசங்கர் சென்னை அண்ணா அறிவாலயத்தில் காரசாரமாகச் சாடியுள்ளார்.

தமிழகத்தில் பொதுமக்களைப் பெரிதும் பாதித்து வரும் மின்கட்டணக் குளறுபடிகள் மற்றும் மின்துறை அமைச்சரின் சர்ச்சைக்குரிய பேச்சுகள் குறித்து, சென்னை அண்ணா அறிவாலயத்தில் முன்னாள் அமைச்சரும் திமுக சட்டமன்ற உறுப்பினருமான சிவசங்கர் செய்தியாளர்களைச் சந்தித்துப் பேட்டி அளித்தார்.

அப்போது செய்தியாளர்களிடம் பேசிய அவர், மின்கட்டணக் குளறுபடிகள் குறித்துப் பொறுப்பில் உள்ள மின்துறை அமைச்சர் நிர்மல்குமாரிடம் கேள்விகள் கேட்டால், அதற்கு உரிய பதிலைச் சொல்லாமல் வேறு ஏதேதோ பேசி திசை திருப்புகிறார். திமுக தலைவரின் மகத்தான வரலாற்றை அவர் முதலில் படித்து அறிந்திருக்க வேண்டும். மற்ற துறைகளைப் பற்றி எல்லாம் மேடைகளில் பேசும் அமைச்சர் நிர்மல்குமார், தன் சொந்தத் துறை பற்றிய எந்தவொரு தகவலையும் தெரிந்து கொள்ளாமல் அறியாமையில் உள்ளார் எனச் சாடினார்.

இதையும் படிங்க: வாசிப்புதான் தமிழ்நாட்டின் அடையாளம்! பாளையங்கோட்டை சிறைக்கு 5,000 புத்தகங்களை வழங்கினார் மு.க.ஸ்டாலின்!

தொடர்ந்து அமைச்சரின் முரண்பாடான பேச்சுகளைச் சுட்டிக்காட்டிய அவர், மின்கட்டணக் குளறுபடி குறித்துப் புகாரே வரவில்லை என்று ஒருபுறம் கூறும் அமைச்சர் நிர்மல்குமார், மறுபுறம் மூன்று லட்சம் மின் இணைப்புகள் குறித்து விசாரிக்கச் சொல்வதாகவும் கூறுகிறார். இதுவே அவரது குழப்பத்தைக் காட்டுகிறது. முதலில் இரண்டு, மூன்று மாதங்கள் மின்துறை செயல்படும் விதத்தை அமைச்சர் நிர்மல்குமார் நிதானமாகக் கற்றுத் தெரிந்து கொள்ள வேண்டும். நையாண்டி, நக்கல் மற்றும் ஏகடியம் பேசுவதை விட்டுவிட்டு, மக்கள் பிரச்சனையில் ஆக்கபூர்வமாகச் செயல்பட வேண்டும் எனச் சுடச்சுட அறிவுறுத்தினார்.

மேலும், தவெக அரசின் முதலமைச்சர் விஜய்யை விமர்சித்த சிவசங்கர், முதலமைச்சர் எப்படியோ, அமைச்சர்களும் அவ்வழியே நடந்து கொள்கிறார்கள். நாட்டின் முக்கியப் பிரச்சனைகளுக்கு முதலமைச்சர் எதற்கும் வாய் திறப்பதே இல்லை. ஆட்சி அமைந்த முதல் ஆறு மாத காலம் அமைதியாக இருப்போம் என்று தான் நாங்களும் நினைத்தோம். ஆனால் அன்றாட மக்கள் பிரச்சனைகளைப் பற்றிப் பேசாமல் எங்களால் அமைதியாக இருக்க முடியாது. எங்களுக்கும் மக்கள் வாக்களித்துச் சட்டமன்றப் பிரதிநிதிகளாக அனுப்பி வைத்திருக்கிறார்கள் எனத் தெரிவித்தார்.

இறுதியாகத் திட்டங்களின் பெயர் மாற்றம் குறித்துப் பேசிய அவர், திமுக ஆட்சிக் காலத்தில் கொண்டுவரப்பட்ட 'நான் முதல்வன்', 'காலை உணவுத் திட்டம்' மற்றும் 'தாயுமானவன்' ஆகிய புகழ்பெற்ற திட்டங்களின் பெயர்களை முதலமைச்சர் விஜய் மாற்றி அமைத்துள்ளார். தங்களின் இயலாமையை மறைக்கவும், திமுக அரசின் சாதனைகளை மக்கள் மனதிலிருந்து மறைக்கவும் தான் முதலமைச்சர் விஜய் இவ்வாறு பெயர்களை மாற்றுகிறார். இத்தகைய நடவடிக்கைகளுக்குத் தமிழக மக்கள் விரைவில் கடும் எதிர்வினையாற்றுவார்கள் என எச்சரித்தார்.

இதையும் படிங்க: பெயரை மாற்றினாலும் ஸ்டாலின் கொண்டுவந்த திட்டங்கள் அழியாது...தவெக அரசை சாடிய ஆர்.எஸ்.பாரதி!