கொள்கை உறவு... வெற்றி கூட்டணி! கூட்டணி கட்சி தலைவர்களுடன் முதல்வர் ஸ்டாலின் நெகிழ்ச்சி உரை!

தமிழகச் சட்டமன்றத் தேர்தலை முன்னிட்டு, திமுக தலைமையிலான மதச்சார்பற்ற முற்போக்குக் கூட்டணியின் ஆலோசனைக் கூட்டம் இன்று சென்னையில் நடைபெற்றது. இக்கூட்டத்தில் உரையாற்றிய முதலமைச்சரும் திமுக தலைவருமான மு.க. ஸ்டாலின் அவர்கள், தங்களது கூட்டணி கடந்த பல ஆண்டுகளாகத் தொடர்ந்து வெற்றிகரமாகச் செயல்பட்டு வருவதைப் பெருமிதத்துடன் சுட்டிக்காட்டினார்.

தற்போதைய கூட்டணி என்பது தேர்தலுக்காகப் புதிதாக அமைக்கப்பட்ட ஒன்று அல்ல. கடந்த இரண்டு நாடாளுமன்றத் தேர்தல்கள், 2021 சட்டமன்றத் தேர்தல் மற்றும் உள்ளாட்சித் தேர்தல்களில் மாபெரும் வெற்றி பெற்ற அதே கூட்டணி இப்போதும் தொடர்கிறது.

தமிழ்நாடு மட்டுமல்ல, இந்திய அளவில் வேறு எங்கும் இல்லாத வகையில் இவ்வளவு நீண்ட காலம் கொள்கை ரீதியாகத் தொடர்ந்து நீடிக்கக்கூடிய ஒரே மதச்சார்பற்ற கூட்டணி இதுதான் என்று முதல்வர் பாராட்டினார். வரும் 2026 சட்டமன்றத் தேர்தலிலும் இதே மதச்சார்பற்ற கூட்டணி ஒற்றுமையுடன் களம் காண்கிறது.

இதையும் படிங்க: களைகட்டும் தேர்தல் களம்: தமிழகத்தில் இன்று வேட்புமனு தாக்கல் தொடக்கம்!

கூட்டணிக் கட்சிகளுக்கு எத்தனை இடங்கள் மற்றும் எந்தெந்தத் தொகுதிகள் ஒதுக்கப்பட வேண்டும் என்பது குறித்து விரிவாகக் கலந்து பேசி, ஒரு சுமூகமான முடிவை எட்டிய பிறகே இந்த ஆலோசனைக் கூட்டம் நடைபெறுகிறது. ஏற்கனவே இருந்த கூட்டணியுடன் மேலும் சில கட்சிகள் இணைந்து, இம்முறை இந்தக் கூட்டணி இன்னும் வலிமையாக உருவெடுத்துள்ளது.

இன்று காலை முதல் தமிழகம் முழுவதும் வேட்புமனு தாக்கல் விறுவிறுப்பாகத் தொடங்கியுள்ளது. விசிக தலைவர் திருமாவளவன் காட்டுமன்னார்கோவிலில் போட்டியிடுவதாக அறிவித்துள்ள நிலையில், தவெக தலைவர் விஜய் இன்று சென்னையில் தனது பிரசாரத்தைத் தொடங்கியுள்ளார். இத்தகைய அரசியல் பரபரப்புகளுக்கு மத்தியில், "என்னுடைய அழைப்பை ஏற்று வந்த அனைத்துக் கூட்டணித் தலைவர்களுக்கும் மனமார்ந்த நன்றி" என முதல்வர் ஸ்டாலின் தனது உரையை நிறைவு செய்தார்.
 

இதையும் படிங்க: ஸ்டாலின், இபிஎஸ் காரையும் செக் பண்ணுங்க! தேர்தல் அதிகாரிகளுடன் சீமான் வாக்குவாதம்!