“ஒவ்வொரு கிராமத்திலும் வீடு வீடாகச் செல்லுங்கள்!” - உடன்பிறப்புகளுக்கு முதலமைச்சர் மு.க.ஸ்டாலின் உத்தரவு!

தமிழகச் சட்டமன்றத் தேர்தல் (ஏப்ரல் 23) வாக்குப்பதிவிற்கு இன்னும் பத்து நாட்களே உள்ள நிலையில், திமுக தொண்டர்களுக்கும் கூட்டணி கட்சியினருக்கும் முதலமைச்சர் மு.க. ஸ்டாலின் நெகிழ்ச்சியான மற்றும் வலிமையான வேண்டுகோள் ஒன்றினை விடுத்துள்ளார். "இந்தத் தேர்தல் களத்தில் நாம்தான் வெற்றி பெற்று மீண்டும் ஆட்சி அமைப்போம் என்பதை மக்கள் முடிவு செய்துவிட்டார்கள்" என அவர் நம்பிக்கையுடன் தெரிவித்துள்ளார்.

சமீபத்தில் 5.73 கோடி வாக்காளர்கள் கொண்ட இறுதிப் பட்டியல் வெளியிடப்பட்டுள்ள சூழலில், ‘திராவிட மாடல் 2.0’ ஆட்சியை அமைக்கத் தொண்டர்கள் சுறுசுறுப்புடன் பணியாற்ற வேண்டும் என அவர் அறிவுறுத்தியுள்ளார்.

ஒவ்வொரு கிராமத்திலும் வீடு வீடாகச் சென்று துண்டறிக்கைகளை வழங்கி வாக்குச் சேகரிப்பதில் முழுமையான கவனம் செலுத்த வேண்டும். குறிப்பாக இனிவரும் 10 நாட்களும் மக்களோடு மக்களாகக் களப்பணி ஆற்ற வேண்டும்" என ஸ்டாலின் உத்தரவிட்டுள்ளார்.

இதையும் படிங்க: விறுவிறுப்பாக நடந்த வேட்பு மனுத் தாக்கல் நிறைவு..! கடைசி நாளில் முக்கிய அரசியல் கட்சியினர் வேட்பு மனுத் தாக்கல்..!

 "கூட்டணிக் கட்சியினர் போட்டியிடும் தொகுதிகளிலும் நானே (ஸ்டாலின்) நிற்பதாகக் கருதிப் பணியாற்றி வெற்றியை உறுதி செய்ய வேண்டும்" எனத் தொண்டர்களைக் கேட்டுக்கொண்டுள்ளார். 92 வயதான கி.வீரமணி, 80-ஐ கடந்த வைகோ மற்றும் ப. சிதம்பரம், 87 வயதான துரைமுருகன் ஆகியோர் வெயிலையும் பொருட்படுத்தாமல் பணியாற்றுவதைச் சுட்டிக்காட்டித் தொண்டர்களை ஊக்கப்படுத்தியுள்ளார்.

முதலமைச்சர் தனது மடலில், "முற்றிய நெற்கதிரைக் கவனமாக அறுவடை செய்வதுதான் தேர்தல் களப்பணி எனத் தலைவர் கலைஞர் கூறுவார். ஒவ்வொரு வாக்கும் முக்கியம். 'என் வாக்குச்சாவடி வெற்றி வாக்குச்சாவடி' என்பதைத் தொண்டர்கள் உறுதி செய்ய வேண்டும்" எனக் குறிப்பிட்டுள்ளார். குறிப்பாகப் பெண்கள், இளைஞர்கள் மற்றும் சிறுபான்மை மக்களின் ஆதரவு திமுக கூட்டணிக்கு அமோகமாக இருப்பதாகவும் அவர் தெரிவித்துள்ளார்.

தமிழகத்தில் சென்னை மாநகரக் காவல் ஆணையர் மாற்றம் மற்றும் ஏப்ரல் 17 முதல் கமல்ஹாசன் பிரசாரம் செய்ய உள்ள சூழலில், முதலமைச்சரின் இந்த அறிக்கை திமுக தொண்டர்களிடையே பெரும் உற்சாகத்தை ஏற்படுத்தியுள்ளது.

"கொளுத்தும் வெயிலையும், கோடை மழையையும் பொருட்படுத்தாமல் பணியாற்றும் திமுகவினருக்கு என் வாழ்த்துகள். உங்கள் உழைப்பினால் இந்தியாவுக்கே வழிகாட்டும் திராவிட மாடல் 2.0 ஆட்சியை அமைப்போம்" என முதலமைச்சர் தனது உரையை நிறைவு செய்துள்ளார்.

இதையும் படிங்க: "85% வேட்பாளர்கள் இறுதி!" – நாளை வெளியாகிறது தமிழ்நாடு காங்கிரஸ் வேட்பாளர் பட்டியல்!