அதிமுக பிரிட்ஜ்-ஆ..!! அப்போ நாங்க LED TV..!! மக்களை கவர திமுக போடும் மாஸ்டர் பிளான்..!!
அதிமுகவின் தேர்தல் அறிக்கையை தொடர்ந்து, திமுகவும் ஏப்ரல் 2-ந் தேதி தேர்தல் அறிக்கையை வெளியிட திட்டமிட்டுள்ளது.
- Fri, 27 Mar 2026 13:57:38 IST
by
Shanthi M.
- #
தமிழ்நாடு சுதந்திரம் அடைந்த பின்னர், 1952ஆம் ஆண்டு முதல் ஐந்து ஆண்டுகளுக்கு ஒருமுறை சட்டமன்றத் தேர்தல்கள் நடைபெற்று வருகின்றன. இதுவரை 16 தேர்தல்கள் முடிவடைந்துள்ள நிலையில், 2026ஆம் ஆண்டு நடைபெறவுள்ளது 17வது சட்டமன்றத் தேர்தல். இத்தேர்தல் ஏப்ரல் 23ஆம் தேதி ஒரே கட்டமாக நடைபெற உள்ளது.
ஆரம்பகால தேர்தல் பிரச்சாரங்களில் ஆளுங்கட்சியினர் தாங்கள் கொண்டுவந்த திட்டங்கள் மற்றும் சாதனைகளை முன்னிலைப்படுத்தி வாக்கு கேட்டனர். எதிர்க்கட்சியினர், ஆட்சிக்கு வந்தால் புதிய திட்டங்களைச் செயல்படுத்துவதாக வாக்குறுதி அளித்தனர். காலப்போக்கில் இந்த நடைமுறை மாற்றம் கண்டது. செயல்படுத்தப்பட்ட திட்டங்களை விட, மக்களுக்கு கவர்ச்சிகரமான இலவசப் பொருட்களை வழங்குவதாக அறிவிப்பது பிரபலமானது.
2006 சட்டமன்றத் தேர்தலில் எதிர்க்கட்சியாக இருந்த திமுக, ஆட்சிக்கு வந்தால் ஒவ்வொரு வீட்டுக்கும் இலவச வண்ணத் தொலைக்காட்சி பெட்டி வழங்குவதாக அறிவித்து பெரும் வெற்றி பெற்றது. இதைத் தொடர்ந்து 2011ஆம் ஆண்டு தேர்தலில் எதிர்க்கட்சியான அதிமுக, இலவச மிக்சி, கிரைண்டர், மின்விசிறி உள்ளிட்ட பொருட்களை வழங்குவதாக வாக்குறுதி அளித்து ஆட்சியைப் பிடித்தது.
இதையும் படிங்க: விருகம்பாக்கம், ரிஷிவந்தியம் தொகுதிகள்.. தேமுதிகவுக்கு NO சொன்ன திமுக..!! அப்செட்டில் பிரேமலதா..!!
இத்தகைய இலவச அறிவிப்புகள் தொடர்ச்சியாக வந்ததால் மாநிலத்தின் கடன் சுமை கணிசமாக அதிகரித்தது. பின்னர், இலவசப் பொருட்கள் வழங்கும் முறையுடன், வங்கிக் கணக்குகளில் நேரடியாகப் பணம் செலுத்தும் திட்டங்களும் அறிமுகப்படுத்தப்பட்டன. 2021 தேர்தலில் திமுகவின் வெற்றிக்கு மகளிர் உரிமைத் தொகையாக மாதம் ரூ.1,000 வழங்குவதாக அறிவித்தது முக்கிய காரணமாக அமைந்தது.
தற்போது 2026 தேர்தலுக்கான பிரச்சாரம் சூடுபிடித்துள்ளது. எதிர்க்கட்சியான அதிமுக தனது தேர்தல் அறிக்கையில், வங்கிக் கணக்கில் பண உதவியை அதிகரிப்பதுடன், அரிசி ரேஷன் அட்டைதாரர்களுக்கு இலவச பிரிட்ஜ் (குளிர்சாதனப் பெட்டி), எல்.பி.ஜி. சிலிண்டர்கள் உள்ளிட்டவற்றை வழங்குவதாக அறிவித்துள்ளது.
ஆளுங்கட்சியான திமுக ஏப்ரல் 2ம் தேதி தனது தேர்தல் அறிக்கையை வெளியிட திட்டமிட்டுள்ளது. இதில் எல்.இ.டி. டிவி வழங்கும் அறிவிப்பு இடம்பெற வாய்ப்புள்ளதாகக் கூறப்படுகிறது. மேலும், திருச்சியை தலைநகரமாக அறிவிக்கும் வாக்குறுதியும் எதிர்பார்க்கப்படுகிறது.
திமுக தேர்தல் அறிக்கை வெளியீட்டுக்குப் பின்னர், மார்ச் 31ம் தேதி திருவாரூரில் இருந்து முதலமைச்சர் மு.க.ஸ்டாலின் தேர்தல் பிரச்சாரப் பயணத்தைத் தொடங்க உள்ளார். தமிழ்நாட்டில் இலவசங்கள் அரசியல் மேலும் தீவிரமடைந்து வரும் நிலையில், இத்தேர்தல் மாநிலத்தின் எதிர்காலத்தைத் தீர்மானிக்கும் முக்கியமானதாகக் கருதப்படுகிறது.
இதையும் படிங்க: திமுக கூட்டணியில் மஜக-வுக்கு ஒரு தொகுதி: தமிமுன் அன்சாரி அளித்த 5 தொகுதிகள் விருப்பப்பட்டியல்!
