தேமுதிகவில் இருந்து விலகி அதிமுகவில் இணைந்தார் 'மீசை' ராஜேந்திரன்!

தேமுதிகவின் மூத்த நிர்வாகியும், பிரபல நடிகருமான 'மீசை' ராஜேந்திரன், இன்று அதிகாரப்பூர்வமாகத் தனது தாய் கழகமான தேமுதிகவிலிருந்து விலகி, அதிமுகவில் இணைந்தார். சென்னை பசுமை வழிச்சாலையில் உள்ள அதிமுக பொதுச்செயலாளர் எடப்பாடி கே. பழனிசாமி அவர்களை நேரில் சந்தித்த அவர், அக்கட்சியின் அடிப்படை உறுப்பினராகத் தன்னை இணைத்துக் கொண்டார்.

இன்று காலைதான் தேமுதிக பொதுச்செயலாளர் பிரேமலதா விஜயகாந்திற்குத் தனது விலகல் கடிதத்தை மீசை ராஜேந்திரன் அனுப்பியிருந்தார். கடிதம் அனுப்பிய சில மணி நேரங்களிலேயே அதிமுக தலைமையகத்திற்குச் சென்று எடப்பாடி பழனிசாமியைச் சந்தித்தது அரசியல் வட்டாரத்தில் வியப்பை ஏற்படுத்தியுள்ளது.

அதிமுகவில் இணைந்த பிறகு செய்தியாளர்களிடம் பேசிய மீசை ராஜேந்திரன்: மறைந்த கேப்டன் விஜயகாந்தின் கொள்கைகளைத் தாங்கிப் பிடிக்கும் ஒரே இயக்கமாக அதிமுகவே உள்ளது. எடப்பாடி பழனிசாமியின் தலைமையிலான ஆட்சியில் தமிழகம் கண்ட வளர்ச்சியை மீண்டும் கொண்டுவரவே இந்த முடிவு எனத் தெரிவித்தார். எடப்பாடி பழனிசாமி அவருக்கு அதிமுகவின் உறுப்பினர் படிவத்தை வழங்கி, சால்வை அணிவித்து வரவேற்றார்.

இதையும் படிங்க: தேமுதிகவில் இருந்து விலகினார் மீசை ராஜேந்திரன்! பிரேமலதா விஜயகாந்திற்கு அதிரடி கடிதம்!

மறைந்த விஜயகாந்தின் மிக நெருக்கமான தளபதிகளில் ஒருவரான மீசை ராஜேந்திரனின் இந்த முடிவு, தேர்தல் நேரத்தில் தேமுதிகவிற்குப் பெரும் பின்னடைவாகப் பார்க்கப்படுகிறது. கட்சியின் முக்கிய நட்சத்திரப் பேச்சாளராக இருந்த அவர் தற்போது அதிமுகவிற்குச் சென்றுள்ளது, தேமுதிக தொண்டர்களிடையே ஒருவித சலசலப்பை ஏற்படுத்தியுள்ளது. கட்சியில் மூத்தவர்களுக்கு உரிய மரியாதை அளிக்கப்படாததே தனது விலகலுக்குக் காரணம்" என அவர் மறைமுகமாகக் குற்றம் சாட்டியுள்ளார்.

ஏற்கனவே அதிமுக கூட்டணியில் பலம் வாய்ந்த கட்சிகள் இணைந்துள்ள நிலையில், தேமுதிகவிலிருந்து ஒரு முக்கிய நிர்வாகி இணைந்திருப்பது அதிமுகவின் தேர்தல் களப்பணியை மேலும் வலுப்படுத்தும் என எதிர்பார்க்கப்படுகிறது.

தேர்தல் நெருங்கும் வேளையில் நிகழும் இத்தகைய கட்சித் தாவல்கள், வரும் சட்டமன்றத் தேர்தல் முடிவுகளில் எத்தகைய தாக்கத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.

இதையும் படிங்க: திமுக தேர்தல் அறிக்கை ஒரு மணிமகுடம்! - வில்லிவாக்கத்தில் திமுக வேட்பாளருக்காக பிரேமலதா விஜயகாந்த் அதிரடி பிரசாரம்!