"கும்பகோணம் தனி மாவட்டமாகுமா?" - முஸ்லிம் லீக் மாநாட்டில் முதலமைச்சருக்கு விடுக்கப்பட்ட முக்கிய கோரிக்கை..!

தஞ்சாவூர் மாவட்டம் கும்பகோணம் அருகே உள்ள சுவாமிமலையில் இன்று நடைபெற்ற இந்திய யூனியன் முஸ்லிம் லீக் (IUML) மாநில மாநாட்டில், கும்பகோணத்தைத் தலைமையிடமாகக் கொண்டு புதிய மாவட்டத்தை உருவாக்க வேண்டும் என ஒருமனதாகத் தீர்மானம் நிறைவேற்றப்பட்டது. தமிழக முதலமைச்சர் மு.க.ஸ்டாலின் முன்னிலையில் இந்த வரலாற்றுச் சிறப்புமிக்கக் கோரிக்கை முன்வைக்கப்பட்டது.

தமிழகத்திலுள்ள சுமார் 7,000-க்கும் மேற்பட்ட மஹல்லா ஜமாஅத் நிர்வாகிகளை ஒருங்கிணைத்து நடத்தப்பட்ட இந்த மாநாட்டில், சமுதாய மற்றும் வளர்ச்சி சார்ந்த பல முக்கியத் தீர்மானங்கள் நிறைவேற்றப்பட்டன திருக்கோயில்களின் நகரம்’ என்று உலகப்புகழ் பெற்ற கும்பகோணத்தை உடனடியாகத் தனி மாவட்டமாக அறிவித்து, நிர்வாகப் பணிகளை எளிமைப்படுத்த வேண்டும். கும்பகோணத்தில் நடைபெறவுள்ள ‘மகாமக’ திருவிழாவிற்கான உள்கட்டமைப்பு மற்றும் பாதுகாப்புப் பணிகளை அரசு இப்போதே திட்டமிட்டுத் தொடங்க வேண்டும். முஸ்லிம் சமூகத்தினருக்கான கல்வி மற்றும் வேலைவாய்ப்பு இடஒதுக்கீட்டைச் சமூக நீதியின் அடிப்படையில் உயர்த்தி வழங்க வேண்டும். நீண்ட காலமாகப் பட்டா இல்லாமல் இருக்கும் பள்ளிவாசல்களுக்கு உடனடியாகப் பட்டா வழங்க அரசு சிறப்பு நடவடிக்கை எடுக்க வேண்டும்.

மாநாட்டில் சிறப்புரையாற்றிய முதலமைச்சர் மு.க.ஸ்டாலின், சிறுபான்மையினரின் நலன்களைப் பாதுகாப்பதில் ‘திராவிட மாடல்’ அரசு எப்போதும் அரணாக இருக்கும் என உறுதி அளித்தார். கும்பகோணம் தனி மாவட்டக் கோரிக்கை குறித்து அரசு உரிய முறையில் பரிசீலிக்கும் என்றும் அவர் தெரிவித்தார். 2026 சட்டமன்றத் தேர்தலை முன்னிட்டு ‘இந்தியா’  கூட்டணியின் ஒருமைப்பாட்டை விளக்கும் விதமாக இந்த மாநாடு அமைந்தது.

இதையும் படிங்க: கூட்டணி பற்றி வாய் திறக்க கூடாது! - திமுக நிர்வாகிகளுக்கு ஆர்.எஸ். பாரதி அதிரடி உத்தரவு!

இந்த மாநாட்டில் IUML தேசியத் தலைவர் பேராசிரியர் கே.எம். காதர் மொகிதீன், மாநிலத் தலைவர்கள் மற்றும் 52 மாவட்டங்களைச் சேர்ந்த ஆயிரக்கணக்கான ஜமாஅத் நிர்வாகிகள் பங்கேற்றுச் சிறப்பித்தனர்.
 

இதையும் படிங்க: “கருப்பை வாய் புற்றுநோய் இனி இல்லை!” - இளம்பெண்களுக்கு இலவச HPV தடுப்பூசித் திட்டத்தைத் தொடங்கும் முதல்வர்.