கட்சி தாவிய விவகாரம்..! 6 எம்எல்ஏக்கள் தகுதி நீக்க வழக்கு..!! சென்னை உயர்நீதிமன்றம் சரமாரி கேள்வி..!!

சென்னை உயர்நீதிமன்றத்தில் அதிமுக சட்டமன்ற உறுப்பினர்கள் ஆறு பேரின் ராஜினாமா ஏற்பு தொடர்பான வழக்கு விசாரணை நடைபெற்று வருகிறது. இந்த வழக்கு தமிழக அரசியலில் பெரும் கவனத்தை ஈர்த்துள்ளது. மே 13 ஆம் தேதி நடைபெற்ற நம்பிக்கை வாக்கெடுப்பின்போது கட்சி கொறடா உத்தரவை மீறி ஆளும் தமிழக வெற்றி கழக அரசுக்கு ஆதரவாக வாக்களித்த அதிமுக எம்எல்ஏக்கள் மீது தகுதி நீக்க நடவடிக்கை தொடங்கப்பட்டது. பின்னர் அவர்களில் பலர் கட்சியுடன் சமரசம் செய்துகொண்ட நிலையில், ஆறு எம்எல்ஏக்கள் தங்கள் பதவிகளை ராஜினாமா செய்து தவெகவில் இணைந்தனர்.

இந்த ராஜினாமாக்களை சட்டப்பேரவை சபாநாயகர் ஏற்றுக்கொண்டதுதான் இப்போதைய சர்ச்சைக்குக் காரணம்.அதிமுக கொறடா அக்ரி கிருஷ்ணமூர்த்தி தரப்பில் தொடரப்பட்ட வழக்கில், தகுதி நீக்க நடவடிக்கை நிலுவையில் இருக்கும்போதே ராஜினாமாக்களை ஏற்றுக்கொண்டது அரசியலமைப்புச் சட்டத்தின் பத்தாவது அட்டவணையை மீறுவதாகவும், ஜனநாயக விழுமியங்களுக்கு எதிரானது என்றும் வாதிடப்பட்டுள்ளது. ராஜினாமாக்கள் அவசர அவசரமாக ஏற்றுக்கொள்ளப்பட்டதாகவும், உரிய விசாரணை இல்லாமல் முடிவு எடுக்கப்பட்டதாகவும் குற்றம்சாட்டப்பட்டுள்ளது.

இதனால் இடைத்தேர்தல்கள் நடத்தப்படும் சூழல் உருவாகிவிட்டது என்றும், இது கட்சித் தாவல் தடைச் சட்டத்தின் நோக்கத்தை முறியடிக்கும் முயற்சி என்றும் மனுதாரர் தரப்பு வாதிட்டு வருகிறது.இந்த வழக்கு தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் அடங்கிய முதல் அமர்வு முன் விசாரணைக்கு வந்தபோது, சபாநாயகர் தரப்பில் விரிவான பதில் மனு தாக்கல் செய்யப்பட்டது. அதில், ஆறு எம்எல்ஏக்களும் தங்கள் கைப்பட எழுதிய ராஜினாமா கடிதங்களை நேரில் சமர்ப்பித்ததாகவும், அவை தன்னார்வத்துடன் அளிக்கப்பட்டவையா என்பதை உறுதிப்படுத்தும் வகையில் ஒவ்வொருவரிடமும் தனித்தனியாக விசாரணை நடத்தப்பட்டதாகவும் தெரிவிக்கப்பட்டுள்ளது. எந்தவிதமான அழுத்தம் அல்லது வற்புறுத்தல் இல்லாமல் அவர்கள் ராஜினாமா செய்துள்ளனர் என்பதில் திருப்தியடைந்த பின்னரே ராஜினாமாக்கள் ஏற்றுக்கொள்ளப்பட்டதாக சபாநாயகர் தரப்பு தெளிவுபடுத்தியுள்ளது.

இதையும் படிங்க: முல்லை பெரியாறு நீர் திறப்பின் போது ரீல்ஸ்..! தவெக MLA மீது கேரள வனத்துறை வழக்குப்பதிவு.!

அரசியலமைப்புச் சட்டத்தின் 190-வது பிரிவு மற்றும் தமிழ்நாடு சட்டப்பேரவை விதிகளின்படி இந்த விசாரணை நடத்தப்பட்டதாகவும், அதில் எந்தவிதமான சட்டவிரோதமும் இல்லை என்றும் வாதிடப்பட்டுள்ளது.நீதிமன்றத்தில் விசாரணையின் போது பல்வேறு அம்சங்கள் குறித்து விரிவாக கேள்விகள் எழுப்பப்பட்டன. ராஜினாமா ஏற்பு நடைமுறைகள் சரியாகப் பின்பற்றப்பட்டனவா, தகுதி நீக்க நடவடிக்கை நிலுவையில் இருக்கும்போது ராஜினாமா ஏற்றுக்கொள்வது சட்டரீதியாக சரியா, விசாரணை எந்த அளவுக்கு முழுமையானது என்பன போன்ற விஷயங்கள் குறித்து நீதிபதிகள் ஆழமாக விசாரித்தனர். சபாநாயகர் நேரில் ஆஜராகாமல் பேரவைச் செயலாளர் மூலம் பதில் மனு தாக்கல் செய்தது குறித்தும் கேள்விகள் எழுந்தன. இருப்பினும், சபாநாயகர் தரப்பில் மூத்த வழக்கறிஞர் மூலம் வாதங்கள் முன்வைக்கப்பட்டன.இரு தரப்பு வாதங்களையும் கேட்ட நீதிபதிகள், சபாநாயகர் தாக்கல் செய்த பதில் மனுவுக்கு மனுதாரர் தரப்பில் பதில் அளிக்க அவகாசம் வழங்கினர். அதன்பிறகு வழக்கு விசாரணையை செப்டம்பர் 1 ஆம் தேதிக்கு ஒத்திவைத்தனர். 

இதையும் படிங்க: திமுகவின் மாடித் தோட்டம்... தவெகவின் பூந்தோட்டம்..! பெயர் மாற்றத்தை விமர்சித்த எம்எல்ஏ மார்க்கண்டேயன்..!!