கோவையில் உலக தரத்தில் புதிய ஸ்டேடியம்! விபத்துகள் மற்றும் போதை கலாச்சாரம் குறித்து அமைச்சர் ஆதவ் அர்ஜுனா பேட்டி!

கோயம்புத்தூர் மாவட்டத்தின் ஒட்டுமொத்த வளர்ச்சித் திட்டங்கள் மற்றும் சட்டம் ஒழுங்கு குறித்த அனைத்துத் துறை அரசு உயர் அதிகாரிகளுடனான மெகா ஆலோசனைக் கூட்டம் இன்று விறுவிறுப்பாக நடைபெற்றது. மாண்புமிகு முதலமைச்சரின் நேரடி வழிகாட்டுதல் மற்றும் அறிவுறுத்தலின் பேரில் நடைபெற்ற இந்த ஆய்வுக் கூட்டத்திற்குப் பிறகு, தமிழக விளையாட்டு மேம்பாடு மற்றும் பொதுப்பணி, நெடுஞ்சாலைத் துறை அமைச்சர் திரு. ஆதவ் அர்ஜுனா அவர்கள் செய்தியாளர்களைச் சந்தித்து, கோவையின் உள்கட்டமைப்பு மற்றும் இளைஞர் நலன் சார்ந்த பல்வேறு அசாத்திய அதிரடி முடிவுகளைப் பிரகடனப்படுத்தினார்.

கோவையைப் பொறுத்தவரைத் தொழில்துறை, பொருளாதாரத் துறை மற்றும் விவசாயத் துறை ஆகிய மூன்றும் மிக முக்கியத்துவம் வாய்ந்த துறைகளாகும். தற்போதைய தவெக ஆட்சியில் கல்வித் துறைக்கு இணையான முக்கியத்துவம் விளையாட்டுத் துறைக்கு வழங்கப்பட்டு வருகிறது. தற்பொழுது கோவை நேரு ஸ்டேடியத்தின் உள்கட்டமைப்பு மற்றும் கட்டமைப்பு வசதிகள் மிகவும் பழுதாகி, மோசமான நிலையில் உள்ளன. இதனை உடனடியாக முதலமைச்சரின் கவனத்திற்கு எடுத்துச் சென்று, சென்னையில் உள்ள நேரு ஸ்டேடியத்தைப் போன்று கோவையிலும் பிரம்மாண்டமாக மாற்றுவதற்கு உரிய ஆய்வுகளை மேற்கொண்டுள்ளோம். அதுமட்டுமன்றி, கோவை மற்றும் நாகப்பட்டினம் போன்ற பகுதிகளில் உலகத் தரத்திலான (World-class) புதிய ஸ்டேடியங்களை அமைக்க அரசு அதிரடியாகத் திட்டமிட்டுள்ளது" என்று அமைச்சர் தெரிவித்தார்.

மாநிலத்தில் பெண்கள் பாதுகாப்பு குறித்துப் பேசிய அமைச்சர், தமிழகத்தில் பெண்கள் பாதுகாப்புக்கான அச்சுறுத்தல்கள் ஒவ்வொரு நாளும் அசாத்தியமாக அதிகரித்து வருகின்றன. இதற்கு மிக முக்கியக் காரணம், பள்ளி மற்றும் கல்லூரி மாணவர்களிடையே தற்பொழுது பெருகி வரும் போதை பழக்கம் தான். இதனால் தான் பெண்களின் பாதுகாப்பு இன்று பெரிய கேள்விக்குள்ளாகி உள்ளது. தமிழகத்தில் போதிய அடிப்படை விளையாட்டு வசதிகள் இல்லாததால் தான் இளைஞர்கள் விளையாட முடியாமல், தங்களது கவனத்தை மாற்றிப் போதை பழக்கத்தை நோக்கிச் செல்கின்றனர். எனவே, மாநகராட்சி பகுதிகள் உட்பட அனைத்துப் பகுதிகளிலும் உள்ள விளையாட்டு மைதானங்களைச் சீரமைக்க முதலமைச்சர் உத்தரவிட்டுள்ளார். தனியார் கல்வி நிறுவனங்களிடம் பேசி, அங்குப் பயன்படுத்தப்படாமல் பூட்டிக் கிடக்கும் மைதானங்களையும் இளைஞர்களின் பயன்பாட்டிற்குக் கொண்டு வர நடவடிக்கை எடுக்கப்பட்டு வருகிறது என உருக்கமாகக் குறிப்பிட்டார்.

இதையும் படிங்க: காதலிக்க மறுத்த பெண்ணின் வீட்டில் குண்டு வீச்சு! கோவையில் அடுத்த பயங்கரம்!

நெடுஞ்சாலைத் துறை குறித்து அதிரடிப் புள்ளிவிவரங்களை வெளியிட்ட அமைச்சர் ஆதவ் அர்ஜுனா, "ஒரு மாநிலத்தின் நெடுஞ்சாலைகள் சரியாக இல்லை என்றால், அங்குத் தொழில்துறை சரியாக இருக்காது. இதுவரை இருந்த பொதுப்பணி மற்றும் நெடுஞ்சாலைத் துறையினர், வெறும் சாலை அமைப்பதை மட்டுமே தங்களது ஒரே வேலையாகப் பார்த்து வந்துள்ளனர். இந்தியாவில் அதிக சாலை விபத்துகள் (Road Accidents) நடக்கும் மாநிலமாகத் தமிழகம் இருப்பது மிகவும் அதிர்ச்சியளிக்கிறது. கடந்த ஓராண்டில் மட்டும் தமிழகத்தில் சாலை விபத்துகளால் 18,000 பேர் உயிரிழந்துள்ளனர். இது ஒட்டுமொத்த கொரோனா காலத்தில் ஏற்பட்ட மரணங்களை விடவும் மிகக் கொடூரமான எண்ணிக்கையாகும். வாகனங்களின் அதீத வேகம் தான் இந்த விபத்துகளுக்கு முக்கியக் காரணம். இதனை எவ்வாறு குறைப்பது எனத் தற்பொழுது தீவிரமாக ஆய்வு செய்யப்பட்டு வருகிறது என்றார்.

கோவையின் போக்குவரத்து நெரிசலுக்கு முற்றுப்புள்ளி வைக்கப் புதிய திட்டங்களை அறிவித்த அமைச்சர், நெடுஞ்சாலைகளில் உள்ள 'U-Turn' பகுதிகளில் முறையான சிக்னல் வசதிகள் இதுவரை எந்த அரசாலும் பக்காவாகச் செய்யப்படவில்லை; பாதுகாப்புக்காக யாரும் செலவு செய்யவில்லை. தற்பொழுது கோவையின் ஜிடி மேம்பாலம் (GD Flyover) முடியும் இடத்தில் கடுமையான போக்குவரத்து நெரிசல் ஏற்படுகிறது. இதனைச் சீரமைக்க அந்தப் பகுதியில் புதிதாக 5 கிலோமீட்டர் நீளத்திற்குப் (5 km) புதிய மேம்பாலம் கட்டுவதற்கான அவசர ஆய்வுகள் மேற்கொள்ளப்பட்டுள்ளன. அதுமட்டுமன்றி, விபத்துகளைத் தடுக்க சென்னை - கன்னியாகுமரி வழித்தடத்தில் 'ஹைவே பேட்ரோல்' (Highway Patrol) கண்காணிப்பு வாகனங்களின் எண்ணிக்கையை அதிகப்படுத்த உள்ளோம். விபத்தில் சிக்குபவர்களை உடனடியாகக் காப்பாற்ற நெடுஞ்சாலைகளிலேயே அவசர விபத்து சிகிச்சை மருத்துவமனைகளைக் (Accident Trauma Hospitals) கட்டவும் திட்டமிட்டுள்ளோம். கோவையில் கட்டப்பட்டு வரும் 'பெரியார் அறிவுலகம்' புராஜெக்ட் மிகச் சிறந்த ஒன்றாகும்; அதன் கட்டுமானத்தில் உள்ள ஒரு சில சிறு குறைகள் விரைவில் சரி செய்யப்படும். முதலமைச்சர் விஜய்யின் கோவை வருகை குறித்த அதிகாரப்பூர்வ அறிவிப்பு விரைவில் வெளியாகும் என்று அமைச்சர் ஆதவ் அர்ஜுனா பேட்டியில் தெரிவித்தார்.

இதையும் படிங்க:  பரபரப்பின் உச்சத்தில் கோவை..!! 10 வயது சிறுமிக்கு நேர்ந்த கொடூரம்..!! கொந்தளிப்பில் சாலையில் இறங்கிய உறவினர்கள்..!!