முதல்வருக்கு நன்றி கூறிய தூய்மை பணியாளர்கள்! எப்போதும் துணை நிற்போம் - முதலமைச்சர் ஸ்டாலின் உறுதி..!

சென்னையில் 13 நாட்களாக பணி நிரந்தரம் உள்ளிட்ட கோரிக்கைகளை வலியுறுத்தி போராட்டத்தில் ஈடுபட்ட தூய்மை பணியாளர்கள் கைது செய்யப்பட்டனர். இந்த சம்பவத்திற்கு பல்வேறு அரசியல் கட்சி தலைவர்கள் கடும் கண்டனம் தெரிவித்துள்ளனர். இந்த நிலையில் தூய்மை பணியாளர்களுக்கு நேற்று நடைபெற்ற தமிழக அமைச்சரவை கூட்டத்தில் பல்வேறு சிறப்பு திட்டங்களை செயல்படுத்த முடிவு செய்யப்பட்டது. 

அமைச்சர் தங்கம் தென்னரசு பேசுகையில், தூய்மை பணியாளர்கள் பணியின்போது இறந்தால் கூடுதலாக 5 லட்ச ரூபாய் என 10 லட்சம் இழப்பீடு தர நடவடிக்கை எடுக்கப்படும் என கூறினார். தூய்மை தொழிலாளர்கள் கடன் உதவிக்காக 10 கோடி ரூபாய் டிக்கெட் செய்யப்படும் என்றும் தூய்மை பணியாளர்களின் குழந்தைகள் எந்த பள்ளியில் பயின்றாலும் புதிய உயர் கல்வி உதவித் தொகை திட்டம் உருவாக்கப்படும் என்றும் தெரிவித்தார். 

மேலும் நகர்ப்புற தூய்மை பணியாளர்களுக்கு 30,000 குடியிருப்புகள் கட்டித் தரப்படும் என்றும் கிராமப்புற தூய்மை பணியாளர்களுக்கு கலைஞர் வீடு திட்டத்தில் முன்னுரிமை அளிக்கப்படும் என்றும் கூறினார். தூய்மை பணியாளர்கள் வாங்கிய கடனை திருப்பி செலுத்த ஆறு சதவீத வட்டி மானியமும் வழங்கப்படும் என்று கூறினார். தூய்மை பணியாளர்களுக்கு காலை உணவு திட்டம் முதல் முறையாக சென்னை மாநகராட்சியில் தொடங்கப்பட உள்ளதாகவும், தூய்மை பணியாளர்கள் குழந்தைகளின் உயர்கல்வி கட்டணத்தை அரசே ஏற்கும் வகையில் திட்டம் தொடங்கப்பட உள்ளதாகவும் கூறினார். தூய்மை பணியாளர்கள் குழந்தைகளுக்கு உயர்கல்வி, விடுதி மற்றும் புத்தக கட்டணம் வழங்கப்படும் எனவும் கூறினார்.

இதையும் படிங்க: போதும் சாமி... ரீல் அந்து போச்சு! மேயரை பந்தாடும் விமர்சனங்கள்..!

தூய்மை பணியாளர்களுக்கு காலை உணவு உள்ளாட்சி அமைப்புகளால் வழங்கப்படும் என்றும் தூய்மை பணியாளர்களின் பணி நிரந்தரம் தொடர்பான வழக்கு நிலுவையில் உள்ளதாகவும்., வழக்குகளின் முடிவில் பணி நிரந்தரம் தொடர்பாக முடிவெடுக்கப்படும் என்றும் தெரிவித்தார். சிறப்பு திட்டங்களை அறிவித்த முதலமைச்சர் ஸ்டாலினுக்கு நன்றி தெரிவிக்கும் விதமாக தூய்மை பணியாளர்கள் இன்று பேரணி நடத்தினர். 

 200-க்கும் மேற்பட்ட தூய்மைப் பணியாளர்கள் பதாகைகள் ஏந்தி பேரணி சென்றனர். பேரணியின் முடிவில் தூய்மை பணியாளர்களுக்கு உணவு பரிமாறப்பட்டது. இந்து சமய அறநிலையத்துறை அமைச்சர் சேகர்பாபு மற்றும் சென்னை மேயர் பிரியா ஆகியோர் தூய்மை பணியாளர்களுக்கு உணவு பரிமாறினர்.

இதனையடுத்து தூய்மைப் பணியாளர்கள் முதலமைச்சர் மு.க.ஸ்டாலினை நேரில் சந்தித்து நன்றி தெரிவித்து உள்ளனர். இது தொடர்பாக முதலமைச்சர் ஸ்டாலின் கூறுகையில், தூய்மைப் பணியாளர்களின் பல்வேறு சங்கங்களைச் சேர்ந்த நிர்வாகிகளைச் சந்தித்ததாகவும்., நமது அரசு வெளியிட்ட அறிவிப்புகளுக்கு மகிழ்ச்சி தெரிவித்து, மேலும் சில கோரிக்கைகளை முன்வைத்து உள்ளதாகவும் கூறினார். அவற்றையும் பரிசீலித்து நிறைவேற்றிக் கொடுப்போம் என்றும் என்றைக்கும் உழைக்கும் மக்களுக்குத் துணையாக நிற்போம் எனவும் கூறியுள்ளார்.

இதையும் படிங்க: குடும்ப ஆட்சிக்கு முடிவு கட்டியே தீரணும்... சுதந்திர தினத்தில் இபிஎஸ் சூளுரை!