நீட் தேர்வு சமூக நீதிக்கு எதிரானது! டெல்லி போராட்டத்தை சுட்டிக்காட்டி அன்புமணி இராமதாஸ் அதிரடி!

 டெல்லி ஜந்தர் மந்தரில் நீட் தேர்வுக்கு எதிராகத் தொடர்ந்து நடைபெற்று வரும் போராட்டங்கள் மற்றும் மாணவர்கள் சந்திக்கும் அவலங்கள் குறித்துப் பாட்டாளி மக்கள் கட்சியின் தலைவர் மருத்துவர் அன்புமணி இராமதாஸ் தனது கடுமையான கருத்துக்களைத் தெரிவித்துள்ளார். நீட் தேர்வு என்பது வணிகமயமாக்கப்பட்ட, சமூக நீதிக்கு எதிரான ஒரு தோல்வியடைந்த தேர்வு முறை என்றும், அதனை மத்திய அரசு உடனடியாக ரத்து செய்ய வேண்டும் என்றும் அவர் வலியுறுத்தியுள்ளார்.

டெல்லி ஜந்தர் மந்தரில் நடைபெற்று வரும் போராட்டம் என்பது வெறும் மாணவர்கள் மட்டுமே கலந்துகொண்ட போராட்டம் அல்ல. சமூகத்தின் அனைத்துத் தரப்பு மக்களும் ஒன்றிணைந்து நீட் தேர்வைக் கண்டித்தும், அதனைச் சரி செய்ய வலியுறுத்தியும் குரல் கொடுத்து வருகின்றனர். குறிப்பாக, கடந்த 21, 22 நாட்களாக மாணவர்கள் தொடர் உண்ணாவிரதப் போராட்டத்தில் ஈடுபட்டு வருவதால், அங்கு மிக மோசமான பதற்றமும் கவலையளிக்கும் சூழலும் நிலவி வருகிறது.

இதையும் படிங்க: டெல்லி தடியடியை கண்டித்து சென்னையில் CJP ஆர்ப்பாட்டம்! பனகல் மாளிகை அருகே மத்திய அரசுக்கு எதிராக முழக்கம்!

நீட் தேர்வு என்பது சமூக நீதிக்கும், மாநிலங்களின் இறையாண்மை மற்றும் உரிமைகளுக்கும் முற்றிலும் எதிரானது. இத்தேர்வு தமிழ்நாட்டின் கிராமப்புற மற்றும் ஏழை எளிய மாணவர்களின் மருத்துவக் கனவைச் சிதைக்கும் வகையில் அமைந்துள்ளது. இதில் எண்ணற்ற குளறுபடிகளும் பண நடமாட்டமும் நிறைந்துள்ளன. நீட் தேர்வு முற்றிலும் வணிகமயமாக்கப்பட்டு, தகுதியற்றவர்கள் கூடத் தேர்ச்சி பெறும் அளவிற்குக் குளறுபடி நிறைந்த ஒரு தோல்வியடைந்த தேர்வாக மாறியுள்ளது.

மாணவர்களின் நலனைக் கருத்திற் கொண்டு, இந்திய அரசு இனியும் தாமதிக்காமல் நீட் தேர்வை முற்றிலும் ரத்து செய்ய வேண்டும் என்பதே தங்களின் மாறாத நோக்கம் எனத் தெரிவித்த அன்புமணி ராமதாஸ், இந்த விவகாரத்தில் மத்திய அரசு உடனடியாக நல்லதொரு முடிவை எடுக்க வேண்டும் என வலியுறுத்தினார்.

இதையும் படிங்க: "உண்ணாவிரதத்தை கைவிட தயார்! ஆனா.. மத்திய அரசுக்கு சோனம் வாங்சு விதித்த நிபந்தனைகள்!