தனிமரம் தோப்பாகாது...ஓபிஎஸ் திமுக-வில் இணைந்தது குறித்து ஜான் பாண்டியன் விமர்சனம்!

முன்னாள் முதலமைச்சர் ஓ. பன்னீர்செல்வம் இன்று முறைப்படி திமுக-வில் இணைந்ததைத் தொடர்ந்து, தமிழக அரசியல் களம் பெரும் பரபரப்படைந்துள்ளது. இந்நிலையில், சென்னை விமான நிலையத்தில் செய்தியாளர்களைச் சந்தித்த தமிழக மக்கள் முன்னேற்றக் கழகத் தலைவர் ஜான் பாண்டியன், ஓபிஎஸ்-ன் இந்த முடிவை கடுமையாகச் சாடியதுடன், இது தேசிய ஜனநாயகக் கூட்டணியில் (NDA) எந்தத் தாக்கத்தையும் ஏற்படுத்தாது என்று தெரிவித்துள்ளார். அரசியலில் தனிமரம் ஒருபோதும் தோப்பாகாது. ஓ. பன்னீர்செல்வம் திமுக-வில் இணைந்திருப்பது அவரது தனிப்பட்ட முடிவு. இதனால் பாஜக தலைமையிலான தேசிய ஜனநாயகக் கூட்டணிக்கு (NDA) எந்தவிதப் பாதிப்பும் ஏற்படப்போவதில்லை. மக்கள் துரோகத்தை ஒருபோதும் மன்னிக்க மாட்டார்கள்" என ஜான் பாண்டியன் தெரிவித்தார்.

ஓபிஎஸ் என்பவர் திமுக-வின் பி டீம் மற்றும் பினாமி என்று அதிமுக பொதுச்செயலாளர் எடப்பாடி பழனிசாமி கடந்த பல மாதங்களாகக் கூறி வந்த குற்றச்சாட்டு, இன்று ஓபிஎஸ் அண்ணா அறிவாலயத்தில் திமுக-வில் இணைந்ததன் மூலம் 100% உறுதியாகிவிட்டதாக அதிமுக நிர்வாகிகள் சமூக வலைதளங்களில் பதிவிட்டு வருகின்றனர். ஜெயலலிதாவால் அடையாளம் காட்டப்பட்ட ஒருவர், அவர் வாழ்நாள் முழுவதும் எதிர்த்த அதே திமுக-வில் தஞ்சம் புகுந்திருப்பது அதிமுக தொண்டர்களிடையே பெரும் அதிர்ச்சியை ஏற்படுத்தியுள்ளது. பிடித்த சனி விட்டுவிட்டது என அதிமுக-வின் சி.வி. சண்முகம் ஏற்கனவே விமர்சித்திருந்தது குறிப்பிடத்தக்கது.

இதையும் படிங்க: பிடித்த சனி விட்டுவிட்டது.. அதிமுகவுக்கு இன்றுதான் தீபாவளி! ஓபிஎஸ்-ஐ கடுமையாக சாடிய சி.வி. சண்முகம்!

2026 சட்டமன்றத் தேர்தலுக்கு இன்னும் சில மாதங்களே உள்ள நிலையில், தென் மாவட்டங்களில் குறிப்பாகத் தேவர் சமூக வாக்குகளைக் குறிவைத்து ஓபிஎஸ்-ஐ திமுக இழுத்துள்ளதாகப் பார்க்கப்படுகிறது. ஆனால், இது பாஜக மற்றும் அதிமுக கூட்டணிகளின் பலத்தைப் பாதிக்காது என ஜான் பாண்டியன் உறுதிபடக் கூறினார்.

ஓபிஎஸ்-ன் இந்தத் திடீர் அரசியல் மாற்றம், வரும் சட்டமன்றத் தேர்தலில் தென் மாவட்டங்களின் வாக்கு வங்கியில் எந்தளவுக்குப் பிரதிபலிக்கும் என்பது அரசியல் ஆய்வாளர்களிடையே பெரும் விவாதப் பொருளாக மாறியுள்ளது.

இதையும் படிங்க: "நான் என்ன தவறு செய்தேன்? இப்போதே அரசியலை விட்டு விலகத் தயார்!" ஓ. பன்னீர்செல்வம் உருக்கம்!