நாதக வேட்பாளர் அறிவிப்பு..!! வில்லிவாக்கம் தொகுதியின் வேட்பாளர் இவர் தானாம்..!!

2026-ஆம் ஆண்டு தமிழக சட்டமன்றத் தேர்தல் நெருங்கி வரும் நிலையில், அரசியல் களம் தீவிரமாக சூடுபிடித்துள்ளது. திமுக, அதிமுக, நாம் தமிழர் கட்சி மற்றும் தமிழக வெற்றி கழகம் ஆகிய நான்கு முனைகளில் போட்டி நிலவுவதால், அனைத்து கட்சிகளும் தீவிர பிரசாரப் பணிகளை மேற்கொண்டு வருகின்றன. 

இந்நிலையில், நாம் தமிழர் கட்சி தனித்துப் போட்டியிடும் முடிவில் உறுதியாக உள்ளது. கட்சியின் தலைமை ஒருங்கிணைப்பாளர் சீமான், 234 தொகுதிகளுக்கான வேட்பாளர்களை ஒரே மேடையில் அறிமுகப்படுத்தும் ‘மக்களின் மாநாடு’ என்ற பிரம்மாண்ட நிகழ்ச்சியை ஜனவரி 31-ஆம் தேதி நடத்த திட்டமிட்டுள்ளார். இந்நிகழ்வுக்கு முன்னதாகவே பெரும்பாலான தொகுதிகளுக்கான வேட்பாளர்களை அறிவித்து வருகிறார்.

அதன்படி, சென்னை வில்லிவாக்கம் சட்டமன்றத் தொகுதியில் நாம் தமிழர் கட்சி சார்பில் திருநர் ச.ரோசினி போட்டியிடுவார் என அறிவிக்கப்பட்டுள்ளது. இது தமிழக அரசியலில் மாற்றுப் பாலினத்தவர்களுக்கு முக்கியத்துவம் அளிக்கும் முயற்சியாக கருதப்படுகிறது. ரோசினி அறக்கட்டளையின் நிறுவனரும், இறைவி அறக்கட்டளையின் செயலாளருமான இவர், சமூக நலச் செயற்பாட்டாளராக பல ஆண்டுகளாக பணியாற்றி வருபவர்.

இதையும் படிங்க: 45 சவரன் நகையை ஒப்படைத்த தூய்மை பணியாளர்... சிறப்பு தபால் தலை வெளியிட்டு கௌரவித்த அஞ்சல் துறை..!

வேட்பாளர் அறிமுக நிகழ்ச்சி வரும் 31-ஆம் தேதி வில்லிவாக்கம் தொகுதியில் நடைபெறவுள்ளது. தமிழகத்தில் மாற்றுப் பாலினத்தவர்களுக்கு அரசியல் வாய்ப்பு அளிப்பதில் நாம் தமிழர் கட்சி முன்மாதிரியாக திகழ்கிறது. ஏற்கனவே 2016 சட்டமன்றத் தேர்தலில், ஆர்.கே.நகர் தொகுதியில் அப்போதைய முதல்வர் ஜெயலலிதாவை எதிர்த்து நாம் தமிழர் கட்சி சார்பில் திருநங்கை தேவி போட்டியிட்டிருந்தார்.

முக்கிய கட்சி ஒன்றின் சார்பாக சட்டசபைத் தேர்தலில் போட்டியிட்ட முதல் திருநங்கை என்ற பெருமையை தேவி பெற்றார். இப்போது ரோசினியின் வேட்பாளர் அறிவிப்பு, அக்கட்சியின் சமூக சமத்துவக் கொள்கையை மீண்டும் வலியுறுத்துவதாக அமைந்துள்ளது. ஜனவரி 31-ஆம் தேதி நடைபெறவுள்ள ‘மக்களின் மாநாடு’ நிகழ்ச்சியில், 234 தொகுதிகளுக்கான வேட்பாளர்களும் ஒரே மேடையில் அறிமுகப்படுத்தப்பட உள்ளனர். இது தமிழக அரசியலில் புதிய வரலாறு படைக்கும் நிகழ்வாகவும், சமூக ஒற்றுமை மற்றும் சமத்துவத்தை வலியுறுத்தும் முயற்சியாகவும் பார்க்கப்படுகிறது.

தேர்தல் களத்தில் மாற்றுப் பாலினத்தவர்களுக்கு இடமளிப்பதன் மூலம், நாம் தமிழர் கட்சி தனது கொள்கை அடிப்படையிலான அணுகுமுறையை தொடர்ந்து வெளிப்படுத்தி வருகிறது. தமிழகத்தில் தற்போது நிலவும் நான்கு முனைப் போட்டி சூழலில், ஒவ்வொரு கட்சியும் தனித்துவமான வேட்பாளர் தேர்வுகள் மூலம் வாக்காளர்களை ஈர்க்க முயல்கின்றன. இதில் நாம் தமிழர் கட்சியின் இந்த அறிவிப்பு, சமூக நீதி மற்றும் பன்முகத்தன்மையை முன்னிலைப்படுத்தும் முக்கிய நகர்வாக அமைந்துள்ளது.

இதையும் படிங்க: மீண்டும் திராவிட மாடல் 2.0 தான்... தமிழ்நாட்டுப் பெண்கள் மகுடம் சூட்டுவார்கள்.. அமைச்சர் நேரு உறுதி..!