மக்களால் நடந்த மாற்றம்..!! நாளையுடன் ஒரு மாதம் நிறைவு..!! விஜய்யின் தவெக ஆட்சி எப்படி இருக்கு..?? ஒரு பார்வை..!!

தமிழக அரசியல் வரலாற்றில் புதிய அத்தியாயத்தை எழுதிய தமிழக வெற்றிக் கழகத்தின் ஆட்சி, அதன் முதல் மாத நிறைவைக் கொண்டாடும் தருணத்தை எட்டியுள்ளது. 2026 சட்டசபைத் தேர்தலில் பாரம்பரிய திராவிடக் கட்சிகளை பின்னுக்குத் தள்ளி பெரும் வெற்றியைப் பெற்ற த.வெ.க., தனிப்பெரும்பான்மையை எட்டாத நிலையிலும் கூட்டணிக் கட்சிகளின் ஆதரவுடன் ஆட்சியை அமைத்தது. இதன் தொடர்ச்சியாக, மே 10-ஆம் தேதி தமிழகத்தின் 12-வது முதலமைச்சராக விஜய் பதவியேற்றார்.

பதவியேற்ற முதல் நாளிலேயே மக்கள் நலன் மற்றும் சட்டம்-ஒழுங்கை மையப்படுத்திய மூன்று முக்கிய அறிவிப்புகளில் கையெழுத்திட்டார். வீட்டு மின்நுகர்வோருக்கு 200 யூனிட் வரை இலவச மின்சாரம் வழங்குதல், பெண்கள் பாதுகாப்புக்காக “சிங்கப்பெண்” சிறப்பு அதிரடிப்படை அமைத்தல் மற்றும் போதைப்பொருள் ஒழிப்புக்கென தனிப்படை உருவாக்குதல் ஆகியவை அவற்றில் முக்கியமானவை. அதேவேளையில், மாநில நிதிநிலை மோசமடைந்துள்ளதாகக் கூறி வெள்ளை அறிக்கை வெளியிடப்படும் என்றும் அறிவித்தார்.

மதுவிலக்கு மற்றும் போதைப்பொருள் ஒழிப்பில் கவனம்

ஆட்சியின் தொடக்க நாட்களிலேயே பள்ளிகள், கல்லூரிகள் மற்றும் வழிபாட்டுத் தலங்களுக்கு அருகில் செயல்பட்ட டாஸ்மாக் கடைகள் மீது நடவடிக்கை எடுக்கப்பட்டது. மாநிலம் முழுவதும் ஆய்வு மேற்கொள்ளப்பட்டதில் நூற்றுக்கணக்கான கடைகள் விதிமுறைகளை மீறி இயங்குவதாக கண்டறியப்பட்டு, அவற்றை மூடும் நடவடிக்கை தொடங்கப்பட்டது.

இதையும் படிங்க: பார்த்திபனின் புதிய யோசனை! டாஸ்மாக் கடையை சுடுகாட்டில் வைக்க சொல்லி முதல்வரிடம் கோரிக்கை!

அதேநேரத்தில், பள்ளி மற்றும் கல்லூரி வளாகங்களுக்கு அருகில் போதைப்பொருள் விற்பனையை முற்றிலும் தடுக்க காவல்துறை மற்றும் சிறப்பு படைகளுக்கு தொடர் கண்காணிப்பு உத்தரவுகள் வழங்கப்பட்டன. பின்னர், மாநிலம் முழுவதும் பல்வேறு சோதனைகள் நடத்தப்பட்டு நூற்றுக்கணக்கான ரவுடிகள் கைது செய்யப்பட்டதாக அதிகாரப்பூர்வ தகவல்கள் வெளியாகின.

சட்டசபை நம்பிக்கை வாக்கெடுப்பில் வெற்றி

புதிய அரசு மீது எதிர்க்கட்சிகள் சந்தேகம் எழுப்பிய நிலையில், சட்டசபையில் நடைபெற்ற நம்பிக்கை வாக்கெடுப்பில் விஜய் தலைமையிலான அரசு பெரும்பான்மை ஆதரவைப் பெற்று வெற்றி பெற்றது. இதனைத் தொடர்ந்து, முந்தைய ஆட்சியின் மக்கள் நலத் திட்டங்கள் தொடரும் என்று முதலமைச்சர் உறுதியளித்தது அரசியல் வட்டாரங்களில் வரவேற்பைப் பெற்றது.

அரசு ஊழியர்களுக்கு சலுகை

ஆட்சிப் பொறுப்பேற்ற சில நாட்களிலேயே அரசு ஊழியர்கள், ஆசிரியர்கள் மற்றும் ஓய்வூதியதாரர்களுக்கான அகவிலைப்படி உயர்த்தப்பட்டது. இதன் மூலம் சுமார் 16 லட்சத்திற்கும் அதிகமானோர் பயனடைந்தனர். புதிய அரசின் முதல் பெரிய நிர்வாக முடிவாக இது பார்க்கப்பட்டது.

முதலீடுகளை ஈர்க்கும் முயற்சி

தமிழகத்தில் தொழில் வளர்ச்சியை ஊக்குவிக்கும் நோக்கில், பல்வேறு தொழில் நிறுவனங்களின் பிரதிநிதிகளுடன் முதலமைச்சர் ஆலோசனை நடத்தினார். உற்பத்தி, வாகனத் துறை மற்றும் ஏற்றுமதி சார்ந்த நிறுவனங்களுடன் நடந்த இந்த சந்திப்புகள் புதிய முதலீடுகளை ஈர்க்கும் முயற்சியாக கருதப்பட்டன. தொழில் வளர்ச்சி மற்றும் வேலைவாய்ப்பு உருவாக்கம் அரசின் முன்னுரிமை எனவும் வலியுறுத்தப்பட்டது.

மக்கள் நலத்திட்டங்களில் கவனம்

அம்மா உணவகங்களின் தரத்தை மேம்படுத்தி, சுவையான மற்றும் சத்தான உணவுகளை வழங்க நடவடிக்கை எடுக்கப்பட்டது. மருத்துவ சேவைகளை விரிவுபடுத்த புதிய வாகனங்கள் பயன்பாட்டுக்கு கொண்டுவரப்பட்டன. மேலும், குறு விவசாயிகளின் பயிர்க்கடன்களில் ஒரு பகுதியை தள்ளுபடி செய்யும் முக்கிய அறிவிப்பும் வெளியிடப்பட்டது. இந்த முடிவு கிராமப்புறங்களில் பெரும் வரவேற்பைப் பெற்றதாகக் கூறப்படுகிறது.

பெண்கள் மற்றும் குழந்தைகள் பாதுகாப்பு

பெண்கள் மற்றும் குழந்தைகள் மீதான குற்றங்களைத் தடுக்க “சிங்கப்பெண்” சிறப்பு அதிரடிப்படை உருவாக்கும் பணிகள் விரைவுபடுத்தப்பட்டன. பாலியல் குற்ற வழக்குகளில் விரைவான விசாரணை மற்றும் கடுமையான தண்டனைகளை உறுதி செய்ய அதிகாரிகளுக்கு நேரடியாக முதலமைச்சர் அறிவுறுத்தினார். குற்றச்சம்பவங்களால் பாதிக்கப்பட்ட குடும்பங்களுக்கு உடனடி நிவாரண உதவிகளும் வழங்கப்பட்டன. இந்த திட்டத்தை முதலமைச்சர் விஜய் இன்று தொடங்கி வைக்கிறார். 

நிர்வாக சீர்திருத்தங்கள்

அரசு அலுவலகங்களில் லஞ்சம் மற்றும் அதிகாரப்பூர்வமற்ற பண வசூலை தடுக்க நடவடிக்கைகள் மேற்கொள்ளப்பட்டதாக அமைச்சர்கள் தெரிவித்தனர். டெண்டர் நடைமுறைகள், கட்டிட அனுமதிகள் மற்றும் நகர்ப்புற நிர்வாகத்தில் வெளிப்படைத்தன்மையை உறுதி செய்ய புதிய உத்தரவுகள் பிறப்பிக்கப்பட்டன. முறைகேடுகளில் தொடர்புடைய அதிகாரிகள் மீது இடைநீக்கம் உள்ளிட்ட ஒழுங்கு நடவடிக்கைகளும் மேற்கொள்ளப்பட்டன.

டெல்லி பயணம் மற்றும் மத்திய அரசுடன் பேச்சுவார்த்தை

முதலமைச்சராக பதவியேற்ற பிறகு முதல் முறையாக டெல்லி சென்ற விஜய், பிரதமர் நரேந்திர மோடியை சந்தித்து தமிழகத்தின் பல்வேறு கோரிக்கைகளை முன்வைத்தார். மேகதாது அணை பிரச்சினை, மீனவர் பாதுகாப்பு, மெட்ரோ ரெயில் திட்டங்களுக்கு நிதி ஒதுக்கீடு உள்ளிட்ட முக்கிய விவகாரங்கள் குறித்து மத்திய அரசின் கவனத்தை ஈர்த்தார். பின்னர் மேகதாது அணை திட்டத்திற்கு எதிராக சட்டரீதியான நடவடிக்கைகளும் முன்னெடுக்கப்பட்டன.

கல்வி, குடிநீர் மற்றும் கோவில் நிர்வாகம்

கோடை வெப்பநிலையை கருத்தில் கொண்டு பள்ளிகள் திறப்பு தேதி மாற்றப்பட்டது. மத்திய அரசின் ஜல் ஜீவன் மிஷன் 2.0 திட்டத்தின் கீழ் குடிநீர் வசதிகளை மேம்படுத்த ஒப்பந்தங்கள் கையெழுத்தானது. அதேபோல், முக்கிய கோவில்களில் கூட்ட நெரிசலை கட்டுப்படுத்த ஆன்லைன் முன்பதிவு தரிசன முறையை அறிமுகப்படுத்தும் திட்டமும் அறிவிக்கப்பட்டது.

விளையாட்டு வீரர்களுக்கு ஊக்கம்

சர்வதேச செஸ் போட்டியில் வெற்றி பெற்ற தமிழக வீரர் பிரக்ஞானந்தாவுக்கு அரசு சார்பில் சிறப்பு ஊக்கத்தொகை வழங்கப்பட்டது. இளம் திறமைகளை ஊக்குவிக்கும் அரசின் நோக்கத்தை இது வெளிப்படுத்தியதாக விளையாட்டு ஆர்வலர்கள் கருதுகின்றனர்.

முதல் மாதத்தின் மதிப்பீடு

மொத்தத்தில், விஜய் தலைமையிலான அரசின் முதல் மாதம் மக்கள் நல அறிவிப்புகள், நிர்வாக சீர்திருத்த முயற்சிகள், சட்டம்-ஒழுங்கு நடவடிக்கைகள் மற்றும் மத்திய அரசுடன் உறவுகளை வலுப்படுத்தும் முயற்சிகள் ஆகியவற்றால் கவனத்தை ஈர்த்துள்ளது. இருப்பினும், அறிவிக்கப்பட்ட திட்டங்கள் முழுமையாக நடைமுறைக்கு வருவது, மாநில நிதிநிலையை சீர்செய்வது மற்றும் தேர்தல் வாக்குறுதிகளை நிறைவேற்றுவது போன்ற சவால்கள் இன்னும் அரசின் முன் உள்ளன. ஆட்சியின் அடுத்த கட்ட நடவடிக்கைகளே இந்த புதிய அரசின் வெற்றியை தீர்மானிக்கும் முக்கிய காரணியாக இருக்கும். 

இதையும் படிங்க: உங்க கொத்தடிமை கூட்டமே உங்களுக்கு ஃபுல்ஸ்டாப் வைக்கும்..!! ஸ்டாலினை விளாசிய தவெக..!!