பாளையங்கோட்டை அரிவாள் வெட்டுச் சம்பவம்: “அரசியல் உள்நோக்கம் இல்லை!” – காவல்துறை அதிரடி விளக்கம்!

தமிழகச் சட்டமன்றத் தேர்தலுக்கான வாக்குப்பதிவு இன்று அமைதியான முறையில் நிறைவடைந்த நிலையில், நெல்லை மாவட்டம் பாளையங்கோட்டையில் அதிமுக பிரமுகரின் மகன் வெட்டப்பட்ட சம்பவம் பெரும் பரபரப்பை ஏற்படுத்தியது. இருப்பினும், இந்தச் சம்பவத்திற்கும் தேர்தலுக்கும் எந்தத் தொடர்பும் இல்லை எனத் திருநெல்வேலி மாநகரக் காவல்துறை அதிகாரப்பூர்வமாக விளக்கம் அளித்துள்ளது.

பாளையங்கோட்டை தொகுதியின் அதிமுக முன்னாள் பகுதி செயலாளர் ஒருவரின் மகன் சங்கர், இன்று மர்ம நபர்களால் அரிவாளால் வெட்டப்பட்டார். தலை மற்றும் கை உள்ளிட்ட இடங்களில் படுகாயமடைந்த அவர், உடனடியாக நெல்லை அரசு மருத்துவமனையில் சிகிச்சைக்காக அனுமதிக்கப்பட்டுள்ளார். முதற்கட்ட விசாரணையில், மது போதையில் இருந்த நண்பர்களுக்கு இடையே ஏற்பட்ட தனிப்பட்ட விரோதமே இந்தத் தாக்குதலுக்குக் காரணம் எனத் தெரியவந்துள்ளது.

இந்தச் சம்பவம் அரசியல் ரீதியான மோதல் எனப் பரவிய வதந்திகளுக்கு முற்றுப்புள்ளி வைத்துள்ள காவல்துறை, இதில் எவ்வித அரசியல் உள்நோக்கமும் கிடையாது எனத் திட்டவட்டமாகத் தெரிவித்துள்ளது. வாக்குச்சாவடியை ஆய்வு செய்யச் சென்றபோது தாக்குதல் நடந்ததாகக் கூறப்பட்ட புகாரைக் காவல்துறை மறுத்துள்ளது.

இதையும் படிங்க: அடிமை அதிமுக-வின் முதுகில் ஏறி வரும் பாஜக-வைத் தடுப்போம்! நெல்லையில் வேட்பாளர்களை ஆதரித்து முதல்வர் ஸ்டாலின்பிரச்சாரம்!

தேர்தல் ஆணையத்தின் விதிமுறைகள் கடுமையாக இருந்த நிலையில், வாக்குச்சாவடியில் வன்முறை நடந்ததாக எழுந்த புகார்களுக்குக் காவல்துறை விளக்கம் அளித்துள்ளது. அரிவாள் வெட்டு நடந்த பகுதிக்கும், வாக்குச்சாவடிக்கும் இடையே அதிக தொலைவு உள்ளது.

பாளையங்கோட்டை தொகுதியில் வாக்குப்பதிவு மிகவும் அமைதியான முறையிலேயே நடந்து முடிந்துள்ளதாகவும், வாக்குச்சாவடி வளாகத்திற்குள் எந்த அசம்பாவிதமும் நடைபெறவில்லை என்றும் போலீஸார் உறுதி செய்துள்ளனர்.

மது போதையில் தாக்குதலில் ஈடுபட்ட மர்ம நபர்கள் குறித்துக் காவல் நிலையத்தில் புகார் அளிக்கப்பட்டுள்ளது. குற்றவாளிகளைப் பிடிக்கத் தனிப்படை அமைக்கப்பட்டுத் தீவிரத் தேடுதல் வேட்டை நடைபெற்று வருகிறது. தேர்தல் முடிந்து இயந்திரங்கள் பாதுகாப்பு மையங்களுக்குக் கொண்டு செல்லப்படும் நிலையில், நெல்லை மாநகரம் முழுவதும் பலத்த போலீஸ் பாதுகாப்புப் போடப்பட்டுள்ளது.

தேர்தல் பரபரப்புகளுக்கு இடையே நடந்த இந்தத் தனிப்பட்ட மோதல் சம்பவம், அந்தப் பகுதியில் சிறிது நேரம் பதற்றத்தை ஏற்படுத்தியது குறிப்பிடத்தக்கது.

இதையும் படிங்க: பெண்கள் உரிமையை பறித்த ஸ்டாலின் கூட்டணியை வீழ்த்துவோம் - திருச்செங்கோட்டில் எடப்பாடி பழனிசாமி அதிரடி!