"நாமக்கல் கவிஞர் மாளிகையில் இடமில்லை!" - முதல்வர் அலுவலக இடமாற்றத்திற்கு தலைமைச் செயலக சங்கம் எதிர்ப்பு!

தலைமைச் செயலக வளாகத்தில் உள்ள நாமக்கல் கவிஞர் மாளிகையின் 10-வது தளத்தில் போதிய இடவசதி இல்லாத சூழலில், முதலமைச்சரின் முகாம முகவரி அலுவலகம் மற்றும் பல்வேறு முக்கிய அரசுத் துறைகளை அங்கு இடமாற்றம் செய்ய மேற்கொள்ளப்பட்டு வரும் முயற்சிகளுக்குத் தமிழ்நாடு தலைமைச் செயலகச் சங்கம் தனது பலத்த எதிர்ப்பைப் பதிவு செய்துள்ளது.

சென்னை தலைமைச் செயலகத்தில் அமைந்துள்ள 10 அடுக்குகள் கொண்ட நாமக்கல் கவிஞர் மாளிகையில் பல்வேறு அரசுத் துறைகளின் முதன்மைச் செயலக அலுவலகங்கள் செயல்பட்டு வருகின்றன. இந்நிலையில், நாமக்கல் கவிஞர் மாளிகையின் 10-வது தளத்தில் போதிய இடவசதி மற்றும் கட்டமைப்பு வசதிகள் இல்லாத நிலையிலும், அங்கு முதலமைச்சரின் அலுவலகம் (CMO) மற்றும் அதனுடன் தொடர்புடைய சில முக்கியச் செயலகத் துறைகளை இடமாற்றம் செய்ய அரசு நிர்வாகம் தரப்பில் முடிவெடுக்கப்பட்டுள்ளதாகத் தகவல்கள் வெளியாகியுள்ளன.

அரசு நிர்வாகத்தின் இந்தத் திடீர் நடவடிக்கை குறித்துத் தமிழ்நாடு தலைமைச் செயலகச் சங்கப் பிரதிநிதிகள் தங்களது கடும் ஆட்சேபனையைத் தெரிவித்துள்ளனர். "ஏற்கனவே 10-வது தளத்தில் குறைந்த அளவிலான இட வசதியே உள்ளது. அங்குப் போதிய உட்கட்டமைப்பு வசதிகளோ அல்லது அரசு ஊழியர்கள் மற்றும் பார்வையாளர்கள் வந்து செல்லக்கூடிய தாராளமான இடவசதியோ இல்லாத சூழலில், முதலமைச்சரின் அலுவலகம் மற்றும் பிற துறைகளை அங்கு மாற்றுவது கடும் சிரமத்தை ஏற்படுத்தும்" எனத் தெரிவித்துள்ளனர்.

இதையும் படிங்க: "அகமதாபாத் விமான விபத்து: இறுதி அறிக்கை அக்டோபரில் தாக்கல்!" - உச்ச நீதிமன்றத்தில் மத்திய அரசு தகவல்!

மேலும், அவசர அவசரமாக மேற்கொள்ளப்படும் இந்த இடமாற்ற நடவடிக்கையைக் கைவிட்டு, ஊழியர்களின் பணிச்சூழலையும் பொதுமக்களின் வசதியையும் கருத்தில் கொண்டு மாற்று ஏற்பாடுகளைச் செய்ய வேண்டும் எனத் தலைமைச் செயலகச் சங்கம் அரசை வலியுறுத்தியுள்ளது. இந்தத் திடீர் எதிர்ப்புத் தலைமைச் செயலக அதிகாரிகளிடையே பெரும் பரபரப்பை ஏற்படுத்தியுள்ளது.

இதையும் படிங்க: குடும்ப பிரச்சனை: அமைச்சர் மரிய வில்சனுக்கு மீண்டும் ஆகஸ்ட் 12-ல் ஆஜராக உத்தரவு!