#TNElectionResults2026: தமிழக சட்டமன்றத் தேர்தல் 2026: வெற்றி பெற்ற திமுக அமைச்சர்கள் யார் யார் தெரியுமா..??

தமிழக சட்டமன்றத் தேர்தலில் ஆளும் திராவிட முன்னேற்றக் கழகம் (திமுக) தலைமையிலான மதசார்பற்ற முற்போக்குக் கூட்டணி கணிசமான சரிவைச் சந்தித்துள்ளது. முதலமைச்சர் மு.க. ஸ்டாலின் கூட தனது தொகுதியில் தோல்வியைத் தழுவியதாக வரும் தகவல்கள் பெரும் அதிர்ச்சியை ஏற்படுத்தியுள்ளன.

சென்னையில் மொத்தம் உள்ள தொகுதிகளில் வெறும் இரண்டு இடங்களில் மட்டுமே திமுக வெற்றி பெற்றிருப்பது கட்சியின் செயல்பாட்டில் குறிப்பிடத்தக்க பலவீனத்தை வெளிப்படுத்துகிறது. இந்தத் தேர்தலில் சுமார் 15 அமைச்சர்கள் தோல்வியைச் சந்தித்துள்ள நிலையில், மீதமுள்ள சில முக்கிய அமைச்சர்கள் மட்டுமே வெற்றி அல்லது முன்னிலைப் போட்டியில் உள்ளனர். இது திமுக அரசின் தொடர்ச்சியைப் பாதிக்கும் வகையில் அமைந்துள்ளது.

வெற்றி பெற்ற மற்றும் முன்னிலையில் உள்ள அமைச்சர்கள்: 

திருச்சி மேற்கு தொகுதியில் அமைச்சர் கே.என். நேரு 4,786 வாக்குகள் வித்தியாசத்தில் தனது எதிராளியை வீழ்த்தி அசத்தியுள்ளார். திருச்செந்தூர் தொகுதியில் அனிதா ராதாகிருஷ்ணன் வெற்றி பெற்றார். திருமயம் தொகுதியில் எஸ். ரகுபதி வெற்றியைத் தக்க வைத்துள்ளார். சென்னையின் முக்கிய தொகுதியான சேப்பாக்கம்-திருவல்லிக்கேணியில் இளம் தலைவர் உதயநிதி ஸ்டாலின் வெற்றி பெற்று திமுகவுக்கு ஆறுதல் அளித்துள்ளார்.

இதையும் படிங்க: 5 மாநிலங்களில் அனல் பறக்கும் வாக்கு எண்ணிக்கை... தமிழ்நாடு டூ அசாம்.. காத்திருக்கும் அதிரடி மாற்றம்...!

திண்டுக்கல் மாவட்டம் ஆத்தூர் தொகுதியில் இ. பெரியசாமி வெற்றி பெறும் நிலையில் உள்ளார். திருவண்ணாமலை தொகுதியில் எ.வெ. வேலு முன்னிலை வகிக்கிறார். குறிஞ்சிபாடி தொகுதியில் எம்.ஆர்.கே. பன்னீர்செல்வம் வலுவான முன்னணியில் இருக்கிறார். திருச்சுழி தொகுதியில் தங்கம் தென்னரசு வெற்றி பெற்றுள்ளார். குன்னம் தொகுதியில் எஸ்.எஸ். சிவசங்கர் வெற்றியை உறுதி செய்துள்ளார்.

திருப்பத்தூர் தொகுதியில் கே.ஆர். பெரியகருப்பன், முதுகுளத்தூர் தொகுதியில் ஆர்.எஸ். ராஜகண்ணப்பன், ஒட்டன்சத்திரம் தொகுதியில் அர. சக்கரபாணி ஆகியோர் முன்னிலையில் உள்ளனர். துறைமுகம் தொகுதியில் பி.கே. சேகர்பாபு, திருவிடைமருதூர் தொகுதியில் கோவி. செழியன், ஆலங்குடி தொகுதியில் சிவ. வீ. மெய்யநாதன் ஆகியோர் வெற்றி பெற்றுள்ளனர். திட்டக்குடி தொகுதியில் சி.வி. கணேசன் முன்னிலை வகிக்கிறார்.

இந்த முடிவுகள் திமுகவுக்குள் பெரும் உலுக்கலை ஏற்படுத்தும் என்று அரசியல் பார்வையாளர்கள் கருதுகின்றனர். கூட்டணிக் கட்சிகளின் ஆதரவு எந்த அளவுக்கு உதவியது, எந்தெந்த தொகுதிகளில் எதிர்பாராத தோல்விகள் ஏற்பட்டன என்பது குறித்த விரிவான பகுப்பாய்வு வரும் நாட்களில் நடைபெறும். தமிழக அரசியல் சூழல் இனி புதிய திருப்பங்களை நோக்கி நகரும் என எதிர்பார்க்கப்படுகிறது. 
 

இதையும் படிங்க: தஞ்சாவூரில் ட்ரோன்கள் பறக்கத் தடை... 130 சிசிடிவி கேமராக்களுடன் தீவிர கண்காணிப்பு... போலீஸ் குவிப்பு...!