தமிழக சட்டசபையை கலைத்தார் கவர்னர் அர்லேகர்: வெளியானது அதிகாரப்பூர்வ அறிவிப்பு!

தமிழக அரசியல் வரலாற்றில் ஒரு முக்கியக் கட்டமாக, 16-வது சட்டசபையை கலைப்பதாக ஆளுநர் ராஜேந்திர விஸ்வநாத் அர்லேகர் அறிவித்துள்ளார். கடந்த மாதம் நடந்து முடிந்த சட்டமன்றத் தேர்தல் முடிவுகளின் அடிப்படையில் புதிய அரசு பதவியேற்க உள்ளதைத் தொடர்ந்து, இந்த அதிரடி நடவடிக்கை மேற்கொள்ளப்பட்டுள்ளது.

தமிழகத்தில் 2021-ஆம் ஆண்டு நடைபெற்ற தேர்தலில் வெற்றி பெற்று, மு.க. ஸ்டாலின் தலைமையிலான திமுக அரசு கடந்த ஐந்து ஆண்டுகளாக ஆட்சிப் பொறுப்பில் இருந்தது. இந்நிலையில், கடந்த ஏப்ரல் 23-ஆம் தேதி புதிய சட்டமன்றத் தேர்தல் நடைபெற்றது. கடந்த மே 4-ஆம் தேதி வெளியான தேர்தல் முடிவுகளில், எந்தக் கட்சிக்கும் அறுதிப் பெரும்பான்மை கிடைக்காத சூழல் நிலவியது. இருப்பினும், 108 இடங்களைக் கைப்பற்றி நடிகர் விஜய்யின் தமிழக வெற்றிக் கழகம் (தவெக) தனிப்பெரும் கட்சியாக உருவெடுத்தது. திமுக 59 இடங்களையும், அதிமுக 47 இடங்களையும் பெற்றன.

ஆட்சி அமைக்கத் தேவையான 118 இடங்களை எட்ட, தவெக தலைவர் விஜய் பல்வேறு முயற்சிகளை மேற்கொண்டு வருகிறார். ஏற்கனவே 5 இடங்களை வைத்துள்ள காங்கிரஸ் கட்சி தவெக-விற்குத் தனது ஆதரவை உறுதி செய்துள்ளது. இதன் மூலம் பலம் 113-ஆக உயர்ந்துள்ளது. இன்னும் 5 உறுப்பினர்களின் ஆதரவு தேவைப்படும் நிலையில், விஜய் ஆளுநரைச் சந்தித்து ஆட்சி அமைக்க உரிமை கோரியிருந்தார். இதற்கிடையில், புதிய அரசு அமையும் வரை மு.க. ஸ்டாலினை காபந்து முதல்வராக (Caretaker CM) நீடிக்குமாறு ஆளுநர் அறிவுறுத்தியிருந்தார்.

இதையும் படிங்க: தவெக-விற்கு ஆதரவா? காங்கிரஸ் மேலிடம் அதிரடி உத்தரவு.. கோட்டையை நெருங்கும் விஜய்!

தற்போது, மே 5-ஆம் தேதியுடன் 16-வது சட்டசபை கலைக்கப்படுவதாக ஆளுநர் மாளிகையான ராஜ்பவன் அதிகாரப்பூர்வமாக அறிவித்துள்ளது. "புதிய அரசு பதவியேற்றதும் 17-வது சட்டசபையின் நிகழ்வுகள் முறைப்படி தொடங்கும்" என அரசு அதிகாரிகள் தெரிவித்துள்ளனர். 118 உறுப்பினர்களின் ஆதரவு கடிதத்தைச் சமர்ப்பித்தவுடன், விஜய் தமிழகத்தின் புதிய முதலமைச்சராகப் பதவியேற்பதற்கான அடுத்தகட்ட நடவடிக்கைகள் வேகமெடுக்கும் என எதிர்பார்க்கப்படுகிறது.

இதையும் படிங்க: வரலாறு படைத்த விஜய்: தமிழகத்தின் தனிப்பெரும் சக்தியாக உருவெடுத்த தமிழக வெற்றிக் கழகம்!