தமிழகத்தில் கள்ளுக்கான தடையை நீக்க முடியாது! ஐகோர்ட் கிளையில் தமிழ்நாடு அரசு திட்டவட்டம்!

தமிழ்நாட்டில் கள் இறக்குவதற்கும் விற்பனை செய்வதற்கும் விதிக்கப்பட்டுள்ள தடையை எக்காரணம் கொண்டும் நீக்க முடியாது என்றும், பொது சுகாதாரத்திற்குப் பேராபத்தை விளைவிக்கும் போதை பானங்களைத் தடை செய்வது இந்திய அரசியலமைப்புச் சட்டத்தின் வழிகாட்டு நெறிமுறைகளின்படி அரசின் உறுதியான கொள்கை முடிவு என்றும் சென்னை உயர்நீதிமன்ற மதுரை கிளையில் தமிழ்நாடு அரசு திட்டவட்டமாகப் பிரமாணப் பத்திரம் தாக்கல் செய்துள்ளது.

மதுரையைச் சேர்ந்த வழக்கறிஞர் தீரன் திருமுருகன் என்பவர் சென்னை உயர்நீதிமன்ற மதுரைக் கிளையில் தாக்கல் செய்த பொதுநல மனுவில், தமிழ்நாட்டின் மாநில மரமான பாரம்பரிய பனை மரங்கள், போதுமான பொருளாதார வாய்ப்புகள் மற்றும் வாழ்வாதார உத்தரவாதம் இல்லாத காரணத்தால் நாளுக்கு நாள் பெருமளவில் அழிக்கப்பட்டு வருகின்றன. 

அண்டை மாநிலங்களான கேரளா, கர்நாடகா, ஆந்திரப் பிரதேசம், தெலங்கானா, கோவா மற்றும் புதுச்சேரி போன்ற மாநிலங்கள் மற்றும் யூனியன் பிரதேசங்களில் மதுவிலக்குத் துறையின் கடுமையான கட்டுப்பாடுகள் மற்றும் முறையான உரிமங்கள் மூலம் இயற்கை கள் விற்பனை அரசு அனுமதியுடன் வெற்றிகரமாக முறைப்படுத்தப்பட்டு வருகிறது. 

இதையும் படிங்க: சாஸ்த்ரா பல்கலை. ஆக்கிரமிப்பு நிலத்துக்கு பதில் மாற்று நிலம் பெறலாமே! தமிழக அரசுக்கு சுப்ரீம் கோர்ட் கேள்வி!

அதே பாணியில் தமிழ்நாட்டிலும் உரிய தரக் கட்டுப்பாடு, நவீன ஆய்வகப் பரிசோதனைகள் மற்றும் டிஜிட்டல் கண்காணிப்பு நடைமுறைகளுடன் இயற்கை கள் இறக்கவும், கொண்டு செல்லவும், விற்பனை செய்யவும் தமிழ்நாடு அரசு உரிய அனுமதி வழங்கிட உத்தரவிட வேண்டும் என்று கோரியிருந்தார்.   

இந்த மனு உயர்நீதிமன்ற நீதிபதிகள் சி.வி.கார்த்திகேயன் மற்றும் ஆர்.சக்திவேல் ஆகியோர் அடங்கிய அமர்வு முன்பாக விசாரணைக்கு வந்தது. அப்போது, தமிழ்நாடு அரசின் உள் துறை, மதுவிலக்கு மற்றும் ஆயத்தீர்வுத் துறையின் இணைச் செயலாளர் சார்பில் மிக விரிவான பிரமாணப் பத்திரம் தாக்கல் செய்யப்பட்டது. 

அதில், தமிழ்நாட்டில் கள் இறக்குவது மற்றும் விற்பனை செய்வதற்கு விதிக்கப்பட்டுள்ள தடையை முழுமையாக உறுதிசெய்து கடந்த 2007-ஆம் ஆண்டு டிசம்பர் 19 அன்று சென்னை உயர்நீதிமன்றம் வரலாற்றுச் சிறப்புமிக்கத் தீர்ப்பை வழங்கியுள்ளது. 

பொது சுகாதாரத்திற்குத் தீங்கு விளைவிக்கும் போதைப் பானங்களைத் தடை செய்வது இந்திய அரசியலமைப்புச் சட்டத்தின் பிரிவு 47-ன் கீழ் அரசுக்கு வழங்கப்பட்டுள்ள கொள்கை முடிவு மற்றும் வழிகாட்டு நெறிமுறைகளுக்கு உட்பட்டது. அதேநேரத்தில், பனைத் தொழிலாளர்களின் வாழ்வாதாரத்தைப் பாதுகாக்கும் வகையில் புளிக்காத நீரா பானத்திற்கும், பதநீருக்கும் ஏற்கனவே அரசு அனுமதி வழங்கி உரிய நலத்திட்ட உதவிகளையும் வழங்கி வருகிறது என்று தெரிவிக்கப்பட்டது.   

மேலும் மனுதாரர் முன்வைத்த விமர்சனங்களை அடியோடு மறுத்த அரசுத் தரப்பு, மாநில மரமான பனை மரங்களை அரசு முறையாகப் பராமரிப்பதில்லை என்ற மனுதாரரின் குற்றச்சாட்டு முற்றிலும் ஆதாரமற்றது. கடலோரப் பகுதிகளில் இயற்கை சீற்றங்களைத் தடுக்கும் பொருட்டு மீன்முள் முறை மூலம் சுமார் 120 ஹெக்டேர் பரப்பளவில் பனை மரக் கன்றுகள் நடப்பட்டுப் பாதுகாக்கப்பட்டு வருகின்றன. 

இதுதவிர, அலையாத்தி, சவுக்கு, முந்திரி கன்றுகள் உட்பட மொத்தம் 355 ஹெக்டேர் பரப்பளவில் புதிய மரக்கன்றுகள் நடப்பட்டுள்ளன; சுமார் 700 ஹெக்டேர் பரப்பளவிலான அலையாத்தி காடுகள் சீரமைக்கப்பட்டுப் பாதுகாப்புப் பணிகள் மிகத் தீவிரமாக நடைபெற்று வருகின்றன. எனவே, உண்மைக்கு மாறான குற்றச்சாட்டுகளைக் கொண்ட இந்த மனுவைத் தள்ளுபடி செய்ய வேண்டும் என்று வலியுறுத்தப்பட்டது. 

தொடர்ந்து, இது தொடர்பாக அரசின் கூடுதல் தலைமை வழக்கறிஞர் நேரில் ஆஜராகி விரிவான வாதங்களை முன்வைக்க அவகாசம் கோரப்பட்டதை ஏற்றுக் கொண்ட நீதிபதிகள், வழக்கின் அடுத்தகட்ட விசாரணையை 2 வாரங்களுக்குத் தள்ளிவைத்து உத்தரவிட்டனர்.   

இதையும் படிங்க: குடியிருப்பு உரிமைக்காக போராடிய கம்யூனிஸ்ட் தோழர்கள் மீதான வழக்கை ரத்து செய்க! வீரபாண்டியன் வலியுறுத்தல்!