அதிமுக கூட்டணியில் 3 கட்சிகளுக்கு மட்டுமே இடங்கள் ஒதுக்கீடு! மற்ற கட்சிகளுடன் தொடரும் இழுபறி!

தமிழக அரசியலில் சட்டமன்ற தேர்தல் களம் சூடுபிடித்துள்ள நிலையில், அதிமுக (AIADMK) தலைமையிலான தேசிய ஜனநாயகக் கூட்டணியில் (NDA) தொகுதிப் பங்கீடு இறுதிக்கட்டத்தை எட்டியுள்ளது. இன்று எம்.ஜி.ஆர் மாளிகையில் நடைபெற்ற முக்கியக் கூட்டத்தில் மூன்று முக்கியக் கட்சிகளுடன் மட்டும் ஒப்பந்தம் கையெழுத்தானது, அரசியல் வட்டாரத்தில் பெரும் பரபரப்பை ஏற்படுத்தியுள்ளது.

அதிமுக பொதுச்செயலாளர் எடப்பாடி பழனிசாமி (Edappadi K. Palaniswami) முன்னிலையில் நடைபெற்ற பேச்சுவார்த்தையில், பாஜக உள்ளிட்ட மூன்று கட்சிகளுக்கான இடங்கள் இறுதி செய்யப்பட்டுள்ளன.பாஜக (BJP): 27 தொகுதிகள், பாமக (PMK - அன்புமணி தரப்பு): 18 தொகுதிகள், அமமுக (AMMK): 11 தொகுதிகள். மற்ற கட்சிகளுக்கான இடங்கள் ஒதுக்கப்பட்ட பின், அதிமுக எத்தனை இடங்களில் போட்டியிடும் என்ற அதிகாரப்பூர்வ அறிவிப்பு இன்று இரவுக்குள் வெளியாகும் என எடப்பாடி பழனிசாமி தெரிவித்துள்ளார்.

தமிழ் மாநில காங்கிரஸ் (TMC) தலைவர் ஜி.கே.வாசன் இன்றைய தொகுதிப் பங்கீடு பேச்சுவார்த்தையில் பங்கேற்காதது கூட்டணியில் சலசலப்பை ஏற்படுத்தியுள்ளது. தாங்கள் கேட்ட எண்ணிக்கையிலான தொகுதிகள் ஒதுக்கப்படாததால் அவர் அதிருப்தியில் இருப்பதாகக் கூறப்படுகிறது. இதனால் தமாகா - அதிமுக இடையிலான உறவில் இழுபறி நீடிக்கிறது.

இதையும் படிங்க: அதிமுக மாவட்ட செயலாளர்கள் அவசர கூட்டம்! நாளை எடப்பாடி பழனிசாமி தலைமையில் ஆலோசனை!

ஏமாற்றத்துடன் திரும்பிய இந்திய குடியரசு கட்சி தொகுதிப் பங்கீடு தொடர்பாக பேச இந்திய குடியரசு கட்சி (RPI) தலைவர் செ.கு.தமிழரசன், கிரீன்வேஸ் சாலையில் உள்ள எடப்பாடி பழனிசாமியின் இல்லத்திற்கு நேற்றிரவு வருகை தந்தார். இருப்பினும், ஒரு சில நிமிடங்களிலேயே அவர் வெளியேறினார். நாளை காலை வரும்படி இபிஎஸ் கூறிவிட்டார் எனத் தெரிவித்துவிட்டு அவர் சென்றது, சிறிய கட்சிகளுடனான பேச்சுவார்த்தை இன்னும் சுமுகமாக முடியவில்லை என்பதைக் காட்டுகிறது.

பாஜக, பாமக, அமமுக ஆகிய மூன்று கட்சிகளைத் தவிர, கூட்டணியில் உள்ள மற்ற 9 கட்சிகளுடன் தொகுதிப் பங்கீடு (Seat Sharing) இன்னும் இறுதி செய்யப்படவில்லை. இந்திய ஜனநாயக கட்சி (IJK),புதிய நீதிக் கட்சி (PNK), 
தமிழ்நாடு மக்கள் முன்னேற்றக் கழகம் (TNMK), புரட்சி பாரதம், இந்திய குடியரசு கட்சி (RPI), பெருந்தலைவர் மக்கள் கட்சி, தென்னிந்திய பார்வர்டு பிளாக்,பசும்பொன் தேசிய கழகம் இந்தக் கட்சிகளுடனான பேச்சுவார்த்தை தொடர்ந்து இழுபறியாகவே உள்ளதால், இன்று காலை நடைபெறவுள்ள இரண்டாம் கட்டப் பேச்சுவார்த்தை மிகுந்த முக்கியத்துவம் பெறுகிறது.

பெரிய கட்சிகளுக்கான இடங்களை ஒதுக்கிவிட்டு, சிறிய கட்சிகளைச் சமாதானப்படுத்தும் முயற்சியில் அதிமுக தலைமை இறங்கியுள்ளது. இரவுக்குள் அறிவிப்பு என இபிஎஸ் குறிப்பிட்டிருந்தாலும், சிறிய கட்சிகளின் அதிருப்தி கூட்டணியின் ஒட்டுமொத்த பலத்தைப் பாதிக்குமா என்பது நாளை காலை தெரியவரும்.

இதையும் படிங்க: 2026 தமிழக தேர்தல்: சென்னையில் மின்னணு வாக்குப்பதிவு எந்திரங்கள் குலுக்கல் முறையில் ஒதுக்கீடு!