விஜய் வந்தால் கெயினர்! வராவிட்டால் லூசர்! அதிமுக கூட்டணி குறித்து ஜெயக்குமார் அதிரடி பேச்சு!

தமிழக தலைமைத் தேர்தல் அதிகாரி அர்ச்சணா பட்நாயக் தலைமையில் நடைபெற்ற அனைத்துக் கட்சிக் கூட்டத்தில் பங்கேற்ற பின், அதிமுக முன்னாள் அமைச்சர் டி.ஜெயக்குமார் செய்தியாளர்களைச் சந்தித்தார். அப்போது, தேர்தல் நடத்தை விதிகள் அமலாக்கம் மற்றும் நடிகர் விஜய்யின் தமிழக வெற்றிக் கழகத்துடனான கூட்டணி குறித்து அவர் வெளியிட்ட கருத்துகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.

நடிகர் விஜய்யுடன் கூட்டணி குறித்துப் பேச்சுவார்த்தை எதுவும் நடைபெறவில்லை என்று அதிமுக பொதுச்செயலாளர் எடப்பாடி பழனிசாமி ஏற்கனவே பலமுறை தெளிவுபடுத்தியுள்ளார். இருப்பினும், விஜய்யின் அரசியல் எதிர்காலம் குறித்துப் பேசிய ஜெயக்குமார், விஜய் அண்ணா திமுகவின் தலைமையேற்று (கூட்டணிக்கு) வந்தால் அவர் 'Gainer' (லாபமடைபவர்). வரவில்லை என்றால் அவர் 'Loser' (தோற்பவர்) என்று மிக நேரடியாகத் தனது கருத்தைப் பதிவு செய்தார்.

தேர்தல் நடத்தை விதிகள் அமலுக்கு வந்துள்ள நிலையில், அரசியல் கட்சிகளின் விளம்பரங்களை அகற்றுவதில் அதிகாரிகள் பாரபட்சம் காட்டுவதாக அவர் குற்றம் சாட்டினார். எங்கள் தலைவர்களின் படங்கள் இருந்தால் அவற்றை முழுமையாக அகற்றும் அதிகாரிகள், ஆளும் கட்சித் தலைவர்களின் படங்கள் இருந்தால் அவற்றை வெறும் பேப்பர் ஒட்டி மட்டும் மறைக்கிறார்கள். இத்தகைய சின்சியரான சேவகர்கள் யார் என்பதை நாங்கள் கண்டறிந்து வருகிறோம். மே மாதம் (தேர்தல் முடிவுகளுக்குப் பின்) அவர்களுக்கு உண்டான தகுந்த பரிசை நாங்கள் அளிப்போம் என்று அதிகாரிகளுக்கு மறைமுக எச்சரிக்கை விடுத்தார்.

இதையும் படிங்க: அதிமுகவின் 'மெகா' வியூகம்! தொகுதி பங்கீட்டிற்காக 4 பேர் கொண்ட வலுவான குழு அமைப்பு!

விளம்பரங்களை அகற்றும் பணியில் தேர்தல் ஆணையம் பாரபட்சமின்றிச் செயல்படுவதை உறுதி செய்ய வேண்டும் என்றும், ஆளுங்கட்சியின் கைக்கூலிகளாகச் செயல்படும் அதிகாரிகள் மீது நடவடிக்கை எடுக்க வேண்டும் என்றும் அவர் வலியுறுத்தினார்.

அனைத்து மாநிலங்களிலும் மே 4-ஆம் தேதி வாக்கு எண்ணிக்கை நடைபெறவுள்ள நிலையில், "மே மாதம் பரிசு காத்திருக்கிறது" என்ற ஜெயக்குமாரின் பேச்சு, ஆட்சி மாற்றத்தை அதிமுக உறுதியாக நம்புவதைக் காட்டுவதாக அரசியல் விமர்சகர்கள் கருதுகின்றனர்.

இதையும் படிங்க: "அதிமுக தலைமையில் தேஜ கூட்டணி; தனிப் பெரும்பான்மையுடன் ஆட்சி" எடப்பாடியில் இபிஎஸ் பேச்சு!