திருவள்ளூர் மாவட்டம் பெரியபாளையம் பகுதியில் கடந்த ஜூன் 21-ஆம் தேதி இயங்கி வந்த இறால் பதப்படுத்தும் தொழிற்சாலையில் ஏற்பட்ட அமோனியா வாயு கசிவு காரணமாக இதுவரை 12 பேர் உயிரிழந்துள்ளனர். இச்சம்பவத்தைக் கண்டித்தும், உயிரிழந்தவர்களின் குடும்பத்தினருக்கு தலா ₹25 லட்சம் இழப்பீடு வழங்க வலியுறுத்தியும், திருவள்ளூர் மாவட்ட ஆட்சியர் அலுவலகம் அருகே மார்க்சிஸ்ட் கம்யூனிஸ்ட் கட்சியின் சார்பில் இன்று மாபெரும் கண்டன ஆர்ப்பாட்டம் நடைபெற்றது. கே. பாலகிருஷ்ணன் தலைமையில் நடைபெற்ற இந்த ஆர்ப்பாட்டத்தில், அரசுக்கு எதிராகக் கண்டன முழக்கங்கள் எழுப்பப்பட்டன.

அதன் பின்னர் செய்தியாளர்களைச் சந்தித்த கே. பாலகிருஷ்ணன், "தொழிற்சாலையில் போதிய பாதுகாப்பு உள்கட்டமைப்பு இல்லாததே இந்த அசாத்திய விபத்திற்குக் காரணமாகும். ஒடிசா மாநிலத்தைச் சேர்ந்த பழங்குடியினப் பெண்களை மிகக் குறைவான ஊதியத்திற்கு அமர்த்தி, கொத்தடிமைகளைப் போல ஆலை நிர்வாகம் நடத்தியுள்ளது. விபத்து நேரிடும் என்று தெரிந்தே அவர்களை அங்குத் தங்க வைத்துள்ளனர். ஆலை உரிமையாளர்கள் கைது செய்யப்பட்டுள்ள நிலையில், இதற்குத் துணையாக இருந்த தொழிலாளர் துறை அதிகாரிகள் இதுவரை கைது செய்யப்படவில்லை. இந்த விவகாரத்தை அரசு மூடுமந்திரமாக முடித்துவிட்டது" என்று கறாராகக் குற்றம் சாட்டினார்.

தொடர்ந்து தற்போதைய சட்டமன்ற விவாதங்கள் குறித்துப் பேசிய அவர், "இவ்வளவு பெரிய விபத்து நேரிட்ட போது சட்டமன்றக் கூட்டத்தொடர் நடந்து கொண்டிருக்கிறது. ஆனால், அங்கு மக்களின் அடிப்படைப் பிரச்சினைகள் விவாதிக்கப்படவில்லை. மாமன்றத்தில் ஒருவர் அப்பாவை காணோம் என்கிறார், இன்னொருவர் மனைவியைக் காணோம் என்கிறார். இதை விவாதிக்கவா தமிழ்நாடு மக்கள் இவர்களைத் தேர்ந்தெடுத்தார்கள்? சபாநாயகர் இந்த விவகாரத்தை 110 விதியின் கீழ் கொண்டு வருவதாகக் கூறி விவாதத்தைத் தடுத்துள்ளார். அரசு அறிவித்துள்ள ₹2 லட்சம் நிவாரணம் எவ்விதத்திலும் போதாது; அதனை ₹25 லட்சமாக உயர்த்த வேண்டும். மேலும், தனியார் பங்களிப்போடு மின் பேருந்துகள் வாங்கும் திட்டத்தில், அதனை யார் இயக்குவார்கள் மற்றும் பராமரிப்பார்கள் என்ற முழு விவரங்களையும் அரசு பொதுவெளியில் வெளியிட வேண்டும்" என்று கேட்டுக்கொண்டார்.

இதையும் படிங்க: அமோனியா வாயுக் கசிவு... அடுத்தடுத்து பறிபோகும் உயிர்கள்... பலி எண்ணிக்கை 10 ஆக உயர்வு..!!

இதையும் படிங்க: வாயு கசிவு விவகாரத்தில் பலி எண்ணிக்கை 7 ஆக உயர்வு; விசாரிக்க அரசு உயர்மட்ட குழுவை அமைத்தார் முதல்வர் விஜய்!