தமிழக சட்டப்பேரவையில் சமீபத்தில் நடைபெற்ற விவாதங்கள் அரசியல் வட்டாரத்தில் பெரும் கவனத்தை ஈர்த்துள்ளன. தவெக மற்றும் திமுக உறுப்பினர்களுக்கு இடையே டாஸ்மாக், கட்சி நிதி உள்ளிட்ட பல்வேறு விவகாரங்களை மையமாகக் கொண்டு கடுமையான வாக்குவாதங்கள் நடைபெற்ற நிலையில், அவையில் ஏற்பட்ட பரபரப்பை சமாளிக்கும் விதமாக முதலமைச்சர் விஜய் தனது வழக்கமான குட்டிக்கதை பாணியில் பதிலளித்தார்.
அப்போது பேசிய அவர், ஒரு ஊரில் வெயில் அதிகமாக இருந்ததால் கண்ணுக்கு மேலே கை வைத்துக்கொண்டு எதையோ தேடிக்கொண்டிருந்த ஒரு பெரியவரைப் பற்றிய கதையை கூறினார். அருகில் இருந்த சிறுவன் என்ன தேடுகிறீர்கள் என்று கேட்டபோது, “உன் அப்பா இங்கேதான் இருப்பார் என்று சொன்னார்கள், அதனால் தேடிக்கொண்டிருக்கிறேன்” என்று அந்த பெரியவர் கூறியதாக விஜய் நகைச்சுவையாக விவரித்தார்.
இந்தக் கதையை கூறிய பின்னர், நக்கலாகவும் நையாண்டியாகவும் பேசுவது எங்களுக்கும் தெரியும் என்பதை உணர்த்தவே இதை சொன்னதாக முதலமைச்சர் குறிப்பிட்டார். மேலும், எதிர்க்கட்சிகளின் விமர்சனங்களுக்கு ஒவ்வொரு முறையும் பதிலடி கொடுக்காமல் இருப்பது பயத்தினால் அல்ல என்றும், மக்களால் வழங்கப்பட்ட ஆட்சியை பொறுப்புடன் நடத்த வேண்டிய நிதானத்தால்தான் அமைதியை கடைப்பிடிப்பதாகவும் அவர் தெரிவித்தார்.
இதையும் படிங்க: போறவங்க போகட்டும்! இனி பேசி புண்ணியம் இல்ல! அதிமுக நிர்வாகிகளிடம் புலம்பிய எடப்பாடி பழனிசாமி!
விஜய் இந்தக் கதையை கூறிக்கொண்டிருந்தபோது எதிர்க்கட்சி தலைவர் எடப்பாடி பழனிசாமி சிரித்துக் கொண்டிருந்த காட்சி பலரது கவனத்தையும் ஈர்த்துள்ளது. குறிப்பாக “உங்க அப்பாவை காணோம்” என்ற வரி அவையில் ஒலித்தபோது, எடப்பாடி பழனிசாமி மகிழ்ச்சியாக சிரித்துக் கொண்டிருந்த வீடியோ சமூக வலைதளங்களில் வேகமாக பரவி வருகிறது.
இந்த வீடியோவை பகிர்ந்து வரும் பலரும், விஜயின் பேச்சு திமுக தலைமையை குறிவைத்து இருந்ததாகவும், அதனால் அதிமுக தரப்பினரிடையே உற்சாகம் ஏற்பட்டதாகவும் கருத்து தெரிவித்து வருகின்றனர். அரசியல் விமர்சகர்களும் இந்த சம்பவம் சமூக ஊடகங்களில் புதிய விவாதங்களை உருவாக்கியுள்ளதாகக் கூறுகின்றனர். சட்டசபையில் நடந்த இந்த தருணம் தற்போது தமிழக அரசியல் வட்டாரத்தில் அதிகம் பேசப்படும் விஷயங்களில் ஒன்றாக மாறியுள்ளது.
இதையும் படிங்க: அதிமுகவில் மீண்டும் சசிகலா, தினகரன் இணைப்பு! இடைத்தேர்தலுக்கு தயாராகும் எடப்பாடி பழனிசாமி!